Read lumasaaba Yona 2 Bible Online

Yona 2 - lumasaaba bible

Yona 2

¹Nga Yona ali muunda mukari mwe kunyeeni, waaloomba isi Umukasya Wele weewe.

²Nga aloma ari, “Ise ni naba mu mutaambo kumukali, nakhwilootsela iwe, O Umukasya, ni nawe waantsilamo. Ni naba nga ndi aasi imakoombe, ise nakhwilootsela lwe buyeeti, iwe waantsilamo khuuloomba khwase.

³Iwe wanduuma ise aasi mu shisiba she mu nyaantsa, ni kameetsi kaaba nga kelyebula khukhuuntsibotokhelela tsimbeka tsoosi. Khuulebana khwe kameetsi khwoowo khwe kamaani khwaambirirakho.

⁴Ulwo ise nambaasa ndi iwe waamboonele ise khukhwaama mu moni tsoowo, nga imanya ndi s'indilayo luundi khuubonakho Lisaayilo lyoowo Likhosefu ta.

⁵Kameetsi kaamilila ise ilala luundi kaangokela mu shisiba sheesi nabamo. Kumusiru kwe mu nyaantsa kwantsibowelela kumurwe kwase.

⁶Ise nesiikha aasi ilala isi tsinjiinji tsirakikhila. Ise naba namanyiile ilala ndi indi umubowe ibweene iyo biilo ni biilo. Ne iwe, O Umukasya Wele wase, wakobosa buulamu bwase khukhwaama aasi mwiilowo.

⁷Bulamu bwase ni bwaba nga bubuwetsekhelela musiise, nakhukhebulila iwe, O Umukasya. Ni nawe nga uli mu Lisaayilo lyoowo Likhosefu, wawulila khuuloomba khwase.

⁸Abo boosi babesaaya bifwaani bibikhalimo ta, baba baarurire khu Wele ubawaambila shiisa.

⁹Ne ise nga niimba kumweenya kwe khukhuruuya iwe, kane imbaaneyo isaayilo isi iwe, O Umukasya. Ise kane nolelese isho shoosi sheesi nitsubile. Lwekhuuba buwonesi bwaama isi iwe wenyene.”

¹⁰Umukasya waalakila kunyeeni tsana khuukhanya Yona khu ndulo khwe nyaantsa. Ni nayo iryo yeetsa yaamukhanya.