Read lumasaaba Yona 3 Bible Online

Yona 3 - lumasaaba bible

Yona 3

¹Ndi luundi Umukasya waakanikha isi Yona, nga amuloma ari;

²“N'utsye i Nineve, shiriimba shiboofu isho, ubaboolele buurume bweesi nakhuwa.”

³Yona waawulila Umukasya, wenyukha waatsya i Nineve. Shiriimba isho Nineve shaba shiboofu naabi, shaakila shaamuyilila biifukhu bitaru khuushikyeendamo shoosi.

⁴Yona waakyeenda mu shiriimba, ni lwanyuma lwe shifukhu shitweela, waarakikha khuureewula babaandu. Waabalomela ari, “Mu biifukhu kamakhumi kane khukhwaama shaleelo, Nineve shikhaabe shaahelile.”

⁵Babaandu be Nineve baafukiilila buurume bwa Wele. Isho shaakila baarekekhawo imbuka iye khuubuya intsala, lwe khukhwookesanisa kumutaambo kwaabwe. Baryo baalaangilila khuubuya intsala, na buli mutweela khu nibo, oba umukhulu, oba umukyeekhe, baakwaara bikwaaro bibyakholebwa khukhwaama mu makoongwe, lwe khukhwibiiyisa.

⁶Lwanyuma kamakhuuwa kano ni kaatsya koola w'omuyiinga we Nineve, weyabulamo bikwaaro bye buyiinga, naye wakwaara bikwaaro byeene bya makoongwe. Wenyukha waarura khu shitsoloŋo sheewe, wekhala mwifukhuulu.

⁷Umuyiinga waarusa shiilakilo mu Nineve mwoosi, nga shiloma shiri, “Shino shili shiilakilo khukhwaama w'omuyiinga, ni baakhulu beewe boosi: Ikhabawo umuundu yeesi, namwe shisolo shoosi; ikhaafu namwe lisheese, khuulyakho shishiindu shoosi namwe khuunywakho kameetsi ta.

⁸Ne khayo buli muundu akwaare bikwaaro bya makoongwe, abe yakhaba na bisolo byeene. Buli mutweela aakha khuuloomba isi Umukasya Wele, ni kumwoyo kweewe kwoosi, arure mu byoonako byeewe byoosi ni bituluungu.

⁹Winyoola manya luukanile Wele anyala waashuusakho lirima lyeewe, waakhuwaambila shiisa, khwaalekha khuhela ta.”

¹⁰Aryo Wele n'abona byeesi babaandu baakhola, nga baakamisile bubwoonaki bwaabwe, naye waabawaambila shiisa, waalekha khubahesa nga n'aba waashambaasile ta.