Read lumasaaba Yona 4 Bible Online

Yona 4 - lumasaaba bible

Yona 4

¹Shikholwa shino sishasangaasa Yona ta, shaakila waakhalala naabi.

²Shikila aloomba ari, “O Umukasya, shino sishili nisho sheesi naloma nga ishiili khurura ingo ta? Shino nisho shishakila naakhakakho khuutitukhila i Tarushishi. Ise namanya ndi iwe uli Wele we shiisa luundi uwe bubweela, s'uyuubakilisa khuukhalala ta. Buli mbuka wokyesanisa khuukana, ukhalawo khaangu khuulekha khutsiinisa umuundu ta.

³Ninashiryo, O Umukasya, ikhwikoontselela ndi undusemo buulamu bwase, shiba nashilayi ise naafwa!”

⁴Kila Umukasya amwiilamo ari, “Iwe uli na bunyala shiina bwe khuukhalala?”

⁵Yona aryo wakyeenda waarura mu shiriimba, nga abirira mu shilibwa she bwaamanyaanga. Waatsya wekholelayo lisari, wekhala mu shiniini shalyo, waaliinda nga akana abone shinaanu shishiitsya khukholekha khu Nineve.

⁶Lwanyuma Umukasya waaba waaŋoonaŋoonile shisaala khuutsowa, shaamukholela shishiniini khuumubiimbakho lwe kumuumu, nio ewulile buulayi. Yona wekhoya naabi lwe shisaala isho.

⁷Ne ni bwasha kumutikhinyi mamilimili khu shifukhu shisheelakho, Umukasya waarumana liisa lyaalya shisaala tsana, shaaniaala.

⁸Inyaanga ni yarura, Wele waareera imbewo imbile khukhwaama ibwaamanyaanga, ni kumuumu kwebaandulila khu murwe kwa Yona, shaakila waawamo kamaani. Shikila Yona wewulila ari khali afwiile, kila aloma ari, “Abe shiba nashilayi ise naafwa!”

⁹Ne Umukasya waareeba Yona ari, “Uli nabunyala shiina khuukhalala lwe shisaala.” Yona weelamo ari, “E, e, indi ni khuukhalala. Naakhalaale khuukhalala khuukali naabi khukhuuntsolesa ni khuufwa.”

¹⁰Umukasya waamuloma luundi ari, “Iwe kumutaambo kukhuwaambila shisaala sheesi ukhaabyaala, namwe sheesi ukhaaraambilila ta. Shishibawo kumutikhinyi, ne angoloobe shaaba shaaweelewo.

¹¹Mu shiriimba Nineve umwo mulimo babaandu babaatuumisa mu mukaanda mutweela ni bikana bibili (12,000) babaakhanyala khukhwaawula shilayi ni shiibi ta. Naluundi mulimo ni bibyaayo biikali! Iwe waambaasa uri sishili shilayi ise khuuwaambila shiriimba shiboofu shiryo shiisa?”