Read lumasaaba Khuubala 12 Bible Online

Khuubala 12 - lumasaaba bible

Khuubala 12

¹Musa ayila umukhasi uwe Kushi. Isho shaakila Miriamu ni Aroni baamwikiitsa.

²Baaba nga baloma bari, “Umukasya uyu akanikhila mu Musa yenyene? Nafwe wakhukhukanikhatsakilamo ta?” Umukasya wawulila khukhwiluŋuunya khwaabwe.

³Ate nga Musa aaba umusaani umuwolu naabi, aaba umuwolu khufuura babaandu boosi babaaba khu shibala shoosi.

⁴Kila khaangukho Umukasya aboolela Musa, ni Aroni, ni Miriamu khukhwiitsa abwinjililo e Lisari Likhosefu. Baryo bondaru baatsya.

⁵Umukasya weetsila mwifuumbi, wemikha amulyaango kwe Lisari, waalomela Aroni ni Miriamu khukhwisyeenda aambi.

⁶Waabalomela khuurekeeresa buulayi, nga abaloma ari, “Siinga nga ibawo umuŋoosi yeesi akari mwiinywe, ise nirumbula is'ali khubirira mu khubonekhelwa ni mu marooro.

⁷Ne seshili shiryo isi umwakaanisi wase Musa ta. Niye naamurawo khuuba umuraangilisi we babaandu baase ba Isiraeli.

⁸Nga inganikha ni naye, khuukanikha imoni khu moni, mbaawo niye sheesi ise imubisabisa, namwe natalaanda ni tsingano ta. Niye ni khukhuumbonakho waayimbonakho! Lwashiina inywe mweŋuluŋuunyile khulw'omwakaanisi wase Musa?”

⁹Aryo Umukasya lirima lyaamuniina khulwa Aroni ni Miriamu. Lwanyuma waarurawo waatsya,

¹⁰ni lifuumbi lilyabawo khu Lisari Likhosefu lyaatsya. Lubaluba, shihaafu she kumubili kwa Miriamu sheetsulakho bikeenge, shaakhosa shiri tswee. Aroni ni eshebukha waabona shishakholikha khu Miriamu, nga waakhosile,

¹¹waalomela Musa ari, “Musakhulu, ukhakhuwa ifwe shitaambiso, lwekhuuba khwakholile shishiindu she busilu nga shino ta.

¹²Ukhalekha shihaafu sha Miriamu shaabola shafwaana nga sh'omwaana usaalikhile nga waafwiilile mu nda mwa maayi weewe ta.”

¹³Kila Musa aloomba isi Umukasya nga aloma ari, “O Wele, naakhwikoontseleele, n'umuwonese.”

¹⁴Ne Umukasya waamwiilamo ari, “Iba nga paapa weewe uwamufuutsile kamare mu moni mweewe, khali abeele ni kumutaambo kwe khuuswaala khuumala biifukhu musaafu. Nashiryo ni mumulekhe amenye ibulafu we kaambi khuumala biifukhu musaafu, nio lwanyuma mumukobose.”

¹⁵Aryo Miriamu baamwikalila ibulafu we kaambi khuumala biifukhu musaafu. Babaandu ba Isiraeli sibenyukha khuurakikha lukyeendo ta, khukhwoolesa Miriamu n'amala khukobola.

¹⁶Lwanyuma lwayo benyukha khukhwaama i Hazerosi, baatsya bakholayo i kaambi ikiindi mu mubiimbi kwe Parani.