Read lumasaaba Khuubala 13 Bible Online

Khuubala 13 - lumasaaba bible

Khuubala 13

¹Umukasya waakanikha isi Musa ari,

²“Khukhwaama mu buli shikuuka she ba Isiraeli, roboramo umuraangilisi mutweela tweela, ubarumane i Kanaani, khuutsya khulaambuula liiswa lyeesi intsya khubawa.”

³Aryo Musa waarumana baaraangilisi bano khukhwaama mu mubiimbi kwe Parani, isi i kaambi ye ba Isiraeli yaba, nga Umukasya n'amulomela.

⁴Kamasiina kaabwe kaaba kari: Shamuwa umusooleli wa Zakuri, khukhwaama mu shikuuka sha Rewubeni;

⁵Shafati umusooleli wa Hori, khukhwaama mu shikuuka sha Simeoni;

⁶Kalebu umusooleli wa Yefune, khukhwaama mu shikuuka sha Yuda;

⁷Igali umusooleli wa Yusufu, khukhwaama mu shikuuka sha Isakaari;

⁸Hosheya umusooleli wa Nuni, khukhwaama mu shikuuka sha Efurayimu;

⁹Paliti umusooleli wa Rafu, khukhwaama mu shikuuka sha Benyamini;

¹⁰Gadiyeli umusooleli wa Sodi, khukhwaama mu shikuuka sha Zebuluuni;

¹¹Gadi umusooleli wa Susi, khukhwaama mu shikuuka sha Yusufu (nisho shikuuka sha Manase);

¹²Amiyeli umusooleli wa Gemali khukhwaama mu shikuuka sha Dani;

¹³Sesuri umusooleli wa Mikaeli, khukhwaama mu shikuuka sha Asheri;

¹⁴Nahabi umusooleli wa Vofusi, khukhwaama mu shikuuka sha Nafutaali;

¹⁵Gewuweli umusooleli wa Maki, khukhwaama mu shikuuka sha Gadi;

¹⁶Kano niko kamasiina ke babaandu beesi Musa aarumana khuutsya khuulaambuula liiswa. Waashuusa lisiina lya Hosheya umusooleli wa Nuni, waamulaanga ari Yoswa.

¹⁷Nga Musa n'arumana babaandu bano mu shibala sha Kanaani, aabalomela ari, “Nga mwaamile ano, ni mutsye kwe ngaaki, mutsye mwoole mu mubiimbi kwe Mwaalo wa Kanaani, mwiilooseleyo khukhwoola mu shibala she tsingoongo.

¹⁸Mutsye mubone shibala isho nga ni shili. Mwaakha mumanye babaandu babashiilimo boola beenga, be kamaani namwe sibali be kamaani ta.

¹⁹Mutsye mubone oba liloba lyamwo liilayi namwe liibi, ni khuumanya babaandu baamwo bamenya mu kaambi busa, namwe mu biriimba bibiilikho tsimako.

²⁰Mutsye mumanye oba liloba lyamwo litsowakho biilyo buulayi namwe ta, ni khuumanya nga shibala isho shilimwo kimisaala namwe ta. Ngana mube banyindaalifu, musuteyo ni kamatuunda kakaatsowa mu shibala sheene isho.” Shaba shiryo, lwekhuuba imbuka iyo yaba imbuka iye kimizabibu khuuroba.

²¹Baryo basaani likhumi na babili bano baatsya balaambuula liiswa ilyo, khukhwaamila ilala mu mubiimbi kwa Zini, khu luwaande lwe mwaalo, khuutsya khwoola khu shiriimba Rehobu, shishaba aambi ni bwinjililo wa Hamasi, khu luwaande lwe ngaaki.

²²Khuunyoowa baatsya boola mu mubiimbi kwe Mwaalo we shibala isho, lwanyuma baatsya boola khu shiriimba sha Heburoni, shishaba shifuurisakho shiriimba sha Zowaani mu Misiri kimiiko musaafu. Ibweene mu Heburoni iyo, baabonayo babetsukhulu be bikuuka bye ba Anakimu bitaru nga nibo Ahimani, Sheshayi, ni Talumayi

²³Baryo ni boola Mwitila Eshikolu, baremayo kusakya kukwaba kulikho kamatuunda ke kimizabibu, kukwaba kusiro naabi, shaakila shaayilila basaani babili khuukusuta nga baakubowele khu kuusaala. Khuuyililakho khu mizabibu kino, baasuta ni kamatuunda pomeguraneti ni kimifigi.

²⁴Shiifwo isho baashilaanga bari Litila lya Eshikolu, lwe tsisakya tse kamatuunda ke kimizabibu tseesi basaani ba Isiraeli baarema khukhwaama ibweene iyo.

²⁵Lwanyuma lwe khuulaambuula liiswa ilyo mu biifukhu kamakhumi kane, basaani tsana baakobola.

²⁶Beetsa isi Musa ni Aroni, atweela ni babaandu ba Isiraeli boosi, i Kadeshi mu mubiimbi kwa Parani, baababoolela byoosi byeesi baabonayo.

²⁷Baalomela Musa bari, “Khwatsiile khwoola mwiiswa lyeesi wakhurumaane khuulaambuula. Ilala lili liiswa liilayi lilirurukukhamwo kamabeele, ni bubuushi bwe ntsukhi.

²⁸Ne khuurusakho ndi babaandu babaalimenyamwo bali be kamaani, ni biriimba byaabwe bili biboofu naluundi bilikho kamatikiiyi. Naluundi khwabooneyo babetsukhulu ba Anaki.

²⁹Ba Amaleki nibo babaamenya mu Mubiimbi kukuuli i bikyele we linaambo ilyo, ne ba Hiti, ni ba Yebusi, ni ba Amori nibo baamenya mu shibala she mu ngoongo, ne ba Kanaani nibo baamenya khu ndulo khwe Nyaantsa imboofu Meditereniani ni luluutsi Yorudaani.”

³⁰Ne Kalebu waabasilisa khaangu nga aloma ari, “Khakhwinyukhilemo khutsye khuyile liiswa ilyo! Naamanyile ndi khuunyalisa buulayi naabi khuuliwaamba.”

³¹Ne basaani tsana beelamwo bari, “Ifwe singene khunyalise khuuwaamba liiswa ilyo ta, lwekhuuba babaandu baayo bali be kamaani naabi khuukhufuurakho ifwe.”

³²Baryo kila basaani tsana bano barakikha khuusaalanisa bilomo bye bubeeyi nga baloma bari, “Liiloba lyeesi khwaboone silinyala ni khuutsowamwo biilyo bibinyala khuuliisa babaandu babaalilimwo ta. Ni babaandu beesi khwabooneyo bali basaani baboofu be kamaani.

³³Ilala khwaboone ni ba Nefilimu, babetsukhulu ba Anaki. Baakhubonekheele nga baaboofu luukali, ni nafwe khwaboombele khwebona nga khufwaana busa nga kamateete, ni nabo nga baakhuboone, ifwe khwabafwaaniile khuryo.”