Read lumasaaba Khuubala 14 Bible Online

Khuubala 14 - lumasaaba bible

Khuubala 14

¹Baryo babaandu ba Isiraeli nga baamala khuuwulila bilomo bye baalaambuuli babaatsya khuulaambuula Kanaani, baakhupa luwuungu lwe kamaani shiilo isho shoosi.

²Babaandu baatsya beluŋuunya isi Musa ni Aroni, nga baloma bari, “Ifwe khuba nga khukhwafwiila mu Misiri, khali sha khuyeeta! Namwe khuba nga khukhwafwiila ano mu mubiimbi!

³Lwashiina Umukasya ali khuukhuyila ifwe mu Kanaani, ari khutsye khwiiribwile iyo, ni baakyelama beefwe atweela ni babaana beefwe babawaambake? Shandibeele shilayi ifwe khukobolayo mu Misiri.”

⁴Lwanyuma kila beelomela bonyene bari, “Khayo khwiroborere umuraangilisi uweefwe, khwiileyo i Misiri.”

⁵Isho shaakila Musa ni Aroni beenamisa kimirwe kyaabwe khwiloba aasi mu khuloomba, nga bali iburaangisi we lituuli lye babaandu ba Isiraeli boosi.

⁶Yoswa umusooleli wa Nuni, ni Kalebu umusooleli wa Yefune, nga nibo babaaba batweela khuubo babaatsya khuulaambuula liiswa, boonuulaka bikwaaro byaabwe,

⁷nga balomela babaandu bari, “Ifwe liiswa lyeesi khwatsiile khuulaambuula lili liiswa liilayi naabi.

⁸Siinga Umukasya aba nga waakhusiimile ifwe, ilala kane akhuraangilile akhuyile, akhuwe liiswa ilyo lilitsuulemwo kamabeele ni bubuukhi bwe ntsukhi.

⁹Nashiryo, mukhamiinyaalila Umukasya ta. Naluundi mukharya lwe babaandu babaamenya khu liswa ilyo ta. Ifwe kane khutsye khubafuure, lwekhuuba Umukasya ali khu luwaande lweefwe, singene bakhunyale ta. Ni nashiryo, mukharya ta.”

¹⁰Ne lituuli lye babaandu bano lyoosi lyariisariisa khuukhupa Musa ni Aroni babeere. Ne khaangukho, shiriifwa sh'Omukasya sheetsa shaafusilisa Lisari Likhosefu.

¹¹Kila Umukasya alomela Musa ari, “Babaandu kane boolese eena khukhuundekelesa ise bari? Kane boolese eena khuulekha khufukiilisa byeesi ise imbakholela, abe yakhaba nga nakhola bye khukhwiyaangisa biikali bibyeene mu moni tsaabwe?

¹²Ari indi khuutsya khuubahesa boosi nga mbasiindikhila buulwaale burafu naabi. Ne ari iwe ndi khuutsya khukhukalusa khuuba paapa we linaambo, liliili lye kamaani lilifuurakho lilyaabwe.”

¹³Kila Musa elamwo isi Umukasya ari, “Iwe wamweene warusa babaandu bano khukhwaama mu Misiri, nga uraambisa kamaani koowo. Nashiryo siinga ba Misiri bawulila sheesi uli khuutsya khukhola,

¹⁴kane bashiboolelekho babaandu be mu Kanaani. Babaandu ba Kanaani bano baamala khaale khuushiwulilakho bari iwe Umukasya uli ni nafwe, lwekhuuba ubonekha mu tsimoni tse babaandu, ni baba nga baaboone lifuumbi lyoowo lyeemikhile angaaki eefwe, naluundi baakhubona nga ukyeenda utsya ibweeni weefwe, nga lifuumbi likhuraangilila kumuusi, ni kumulilo mu shilo.

¹⁵Nashiryo iwe siinga wiiraka babaandu boowo bano, kamanaambo kakaawulilaka lubuyi lwoowo kane kalome kari

¹⁶iwe wakhoonyakiile babaandu boowo mu mubiimbi, lwekhuuba waakhunyalisa khuuboolesa mu shibala sha Kanaani sheesi wabasuubisa khuubawa ta.

¹⁷Nashiryo, O Umukasya, ikhuloomba ndi iwe ukhwookesanise kamaani koowo, nga wamweene ni wakhulomela uri,

¹⁸iwe uli Wele uwe shiisa naluundi uwiyakhila. Naluundi waloma uri iwe s'ukhalalaka khaangu ta, nga wiyakhila bubwoonaki ni bumiinyi bwoosi. Ne waloma uri uliwa shitaambiso buli mutweela ukhola buubi, khuutubaasakho ni babaana baabwe, ni babetsukhulu ni bimiila byeene.

¹⁹Ni naari, ikhuloomba ndi wiyakhile babaandu boowo, khuusiintsiila khu khukana khwoowo khuukali naabi khukhuukhawawo ta, nga n'ubeele ubeyakhilatsakila, khukhwaamila khu mbuka isi wabarusila mu Misiri.”

²⁰Lwanyuma Umukasya naye weelamwo Musa ari, “Nga n'uloombile, naabeyakhiile.

²¹Ne ikhusuubisa ndi nga ise n'ishiili Umukasya Umulamu, naluundi nga shiriifwa shase ni shishitsula mu shibala shoosi,

²²ikhwitsubila ndi mbaawo na mutweela khu baandu bano uliinjilakho mu shibala isho ta. Lwekhuuba babaandu bano baboone shiriifwa shase, ni bye kamakaanga byase byeesi nakhola khu ba Misiri, ni byeesi ikholile mu mubiimbi muno, ne belooseele busa khukhuuminyaalila ni khukhuukhakilisa ise kimiluundi mikali.

²³Sibakhenjileyo khuubonakho shibala sheesi nasuubisa khuushiwa bakuuka baabwe ta. Mbaawo na mutweela khuubo babaantsikaanile ise uliinjilamwo ta.

²⁴Ne umwakaanisi wase Kalebu s'ali nga babaandi babaaramile ta. Aryo lwekhuuba niye wabeele ni khuufukiilila musiise, khuuloondelela byoosi byeesi ingana, kane imufukiilile niye enjile mu shibala sha Kanaani, ni babetsukhulu beewe balimenya mu bweenemwo.

²⁵Ne bona ba Amaleki ni ba Kanaani bamenya mu matila ke mu Kanaani. Nashiryo ikhukana kumukaamba kumutikhinyi, mwinyukhe mushuukhe mwibotokhelele, muwaambe intsila iye kumubiimbi, ilola kwe nyaantsa Imbesemu.”

²⁶Lwanyuma Umukasya waakanikha isi Musa ni Aroni,

²⁷nga abalomela khuuwa babaandu ba Isiraeli buurume buno, “Babaandu baboonaki bano kane boolese eena khukhuuntsiluŋuunyakho? Ise naaluwile lwe khukhwiluŋuunya khweesi baantsiluŋuunyakho!

²⁸Ari tsya mubaboolele muri, ise netsuubiile ilala ndi indi khuutsya khubakholela sheesi mwakanile.

²⁹Mulikho mutsya khufwiila ano mu mubiimbi, ni kimilaambo kyeenywe kitsya khusaalanisibwa mu mubiimbi muno mwoosi. Khukhwaama nga nimwiluŋuunyile khusiise, mbaawo umusaani na mutweela khusiinywe uwoolesa kimiiko kabili ni khuufuurisawo,

³⁰ulinyalisa khukhwiinjila mu shibala sheesi nabasuubisa khuubawa shibe shisheenywe ta, khuurusakho Kalebu, umusooleli wa Yefune, ni Yoswa umusooleli wa Nuni bonyene.

³¹Ne babaana beenywe bakyeekhe beesi mwaba mwaayiyembelela muri bakhaabawaambake, nibo beesi indereera bamenye mu shibala sheesi inywe mwalobile.

³²Ne inywe mwabeene mutsya khufwiila ano mu mubiimbi, kimilaambo kyeenywe kisalanisibwe muno.

³³Babaana beenywe batsya khukyeendaana mu mubiimbi muno khuumala kimiiko kamakhumi kane, nga babonabona lwe bumiinyi bweenywe, khukhwoolesa inywe mweesi ni mulimala khuufwa muwewo.

³⁴Mutsya khubonabona lwe bibyoonako byeenywe kimiiko kamakhumi kane kamabuufu, nga buli kumwiiko mutweela kubawo lwe shifukhu shitweela khu biifukhu kamakhumi kane, byeesi baalaambuuli baayila khuulaambuula shibala. Ni neesho kane mumanye khukhukhalasa ise sheesi khumanyisa.

³⁵Iŋaŋasila ilala ndi babaandu bano babaali baboonaki, babewumbile atweela khukhuuntsiluŋuunyakho, batsya khuhelela ano mu mubiimbi. Ise Umukasya samweene niye ushikanikhile, ilala bakhaafwiile muno.”

³⁶Baryo basaani likhumi khu beesi Musa aarumana khuutsya khuyama liiswa, nio lwanyuma bakobola nga bali ni kamakhuuwa kamabi kakaakila babaandu baarakikha khukhwiluŋuunya khu Mukasya,

³⁷nibo babaakobola baakanikha buubi khu liswa, Umukasya waasiindikha buulwaale buubi naabi, bwaabahesa boosi.

³⁸Ne Yoswa umusooleli wa Nuni, ni Kalebu umusooleli wa Yefune, waabalekhawo nga balamu.

³⁹Aryo Musa n'amala khuuboolela babaandu ba Isiraeli bilomo bino byeesi Umukasya aabawa, baalila naabi.

⁴⁰Kila benyukha kumutikhinyi mamilimili, beŋoonaŋoona khuuniina batsye mu shibala she tsingoongo sha Kanaani. Baaloma bari, “Ari ifwe khakhwinyukhe khutsye mu shibala sheesi Umukasya aakhusuubisa. Ilala ifwe khwayoonaka.”

⁴¹Ne Musa wabeelamwo ari, “Lwashiina ndi mulikho muminyaalila shilakilo sh'Omukasya? Byeesi mulikho mukhola sibinaraamba ta!

⁴²Mukhakhakakho mwaatsya ta. Baasiku beenywe kane babafuuntsakilile, lwekhuuba Umukasya umweene s'ali ni nanywe ta.

⁴³Nga ni mutsya, mulikho mutsya khwakaanana ni ba Amaleki, ni ba Kanaani, babaakane babaakhupe babawule muhele, lwekhuuba Umukasya umweene s'ali ni nanywe ta, lwekhuuba mwekaanile khuuloondelela Umukasya.”

⁴⁴Ne babaandu ba Isiraeli baalekelesa byeesi Musa aababoolela, bekhuula baakhuumba baatsya mu shibala she tsingoongo sha Kanaani, abe yakhaba nga i Sanduuku iye Kamakaambila y'Omukasya siyaba ni nabo ta, ni Musa umweene naye s'aba ni nabo ta.

⁴⁵Lwanyuma ba Amaleki ni ba Kanaani beekhaka khukhwaama mu shibala shaabwe she tsingoongo, baafuntsakilila ba Isiraeli, baabatimisa nga babaloondakho, khuutsya khwoolela ilala mu shiriimba sha Horuma.