Read lumasaaba Khuubala 17 Bible Online

Khuubala 17 - lumasaaba bible

Khuubala 17

¹Umukasya waalomela Musa ari,

²“Lomela babaandu ba Isiraeli, bakhuwe iwe tsimiimbo likhumi na tsibili, nga buli ndweela yaama khu muraangilisi mutweela, khu bikuuka likhumi na bibili bye ba Isiraeli. Khu buli imiimbo, uronekho lisiina ly'omuraangilisi we shikuuka isho,

³ne urone lisiina lya Aroni khu miimbo iye shikuuka sha Levi. Lwa buli shikuuka shitweela, ibewo imiimbo iya buli muraangilisi ushiraangilila.

⁴Lwanyuma ubuusanise tsimiimbo tsino tsoosi, utsiyile mu lisari, utsire iburaangisi we Sanduuku iye Kamakaambila, isi ikhwakaananila iwe.

⁵Ni miimbo iy'omuundu isi kane indobore khuuba umusaayi wase, kane imelekho kamasaafu. Indyo musaambo iyo, kane nakaamise khukhwiluŋuunya khweesi babaandu ba Isiraeli bakhwiluŋuunyakho khwiiwe.”

⁶Aryo Musa waatsya wakanikha isi babaandu ba Isiraeli, nga ababoolela byeesi Umukasya aamulakila. Baryo buli mutweela khu baaraangilisi baabwe baamuwa tsimiimbo tsaabwe tse khukhwitiila, tsoosi atweela nga tsili tsimiimbo likhumi na tsibili, nga ni iya Aroni nayo ilimwo.

⁷Lwanyuma Musa waayila tsimiimbo tsino, waatsira iburaangisi we Sanduuku iye Kamakaambila y'Omukasya, mu Lisari Likhosefu.

⁸Khu shifukhu shisheelakho, Musa weelayo mu lisari, waanyoola nga imiimbo iya Aroni, uwabawo khulwe shikuuka sha Levi, yaba yamelilekho kamasaafu, nga yaamalile khuurakho bimuli, ni bimuli nga byaamilemo kamatuunda kakaali khuuroba.

⁹Musa waasuta tsimiimbo tsana likhumi na tsibili, waatsirusa ibulafu khukhwaama mu lisari, waatsiyila khuutsokesa babaandu ba Isiraeli boosi. Babaandu boosi baatsibona, lwanyuma buli muraangilisi waabukulamwo imiimbo yeewe.

¹⁰Ne Umukasya ndi waalakila Musa ari, “Yiisayo imiimbo ya Aroni mukari lisari. Ukire aambi ni Sanduuku iye Kamakaambila, kibiikhe ibweene iyo, khuuba nga she khuureewula isi abo babaakane baminyaale. Siinga babaandu bano balekha khwaakamisa khukhwiluŋuunya khwaabwe isi ise, kane bahele boosi.”

¹¹Musaambo iyo, Musa waakhola byoosi byeesi Umukasya aamulakila khukhola.

¹²Lwanyuma kila babaandu ba Isiraeli boosi balomela Musa bari, “Ari bona ifwe khutsya khuhela khuwewo! Khutsya khuwawo!

¹³Ari yakhaba umuundu khukhwisyeendakho busa aambi ni Lisari Likhosefu ly'Omukasya, aakha khuufwa. Isho shookesa shiri ari ifwe khutsya khuhelela ilala!”