Read lumasaaba Khuubala 18 Bible Online

Khuubala 18 - lumasaaba bible

Khuubala 18

¹Umukasya waalomela Aroni ari, “Iweewe, basooleli boowo atweela ni ba Levi, mwaakha khukhwityuukha buufunisi bubuwaambakana ni bikosi bye khukhwakaanisa mu Lisari Likhosefu. Naluundi iwe wamweene, atweela ni basooleli boowo mwenyene, mumukane mube ni buufunisi bwe khukhwakaanisa nga basaayi.

²Lwanyuma mulooselekho babandaayeenywe be mu shikuuka sha Levi, khuubawo nga bayeeti beenywe, nga inywe mwabeene mulikho mwakaanisa mu Lisari Likhosefu.

³Nibo bali ni khukhwoolelesa busa bufunisi bwaabwe bwe khuubayeeta inywe mu Lisari Likhosefu. Ne sibali ni khukhwisyeenda aambi ni bibiindu bikhosefu bye mu lisari, namwe khukhwisyeenda aambi ni shisheeso ta. Siinga isho shikholebwa, nibo atweela ni nawe wamweene, muba muhela.

⁴Nibo bali ni khukhwitubaasakho khwiiwe, banyale khukhwoolelesa bufunisi bwaabwe mu Lisari Likhosefu, ne mbaawo umuundu ukuundi yeesi ukhaakhila khuukhola kumulimo ukwo, uwiitsa aambi ni nawe ta.

⁵Nashiryo iwe atweela, ni basooleli boowo mwenyene, mumuuli ni khukhwoolelesa buufunisi bwe khukhwakaanisa mu lisari lyase likhosefu ni khu Sheeso, nio lirima lyase lilekhe khukhwiloosela khukhuuniina khulwe babaandu ba Isiraeli ta.

⁶“Ise samweene niye uwarobora babandaayeenywe ba Levi khukhwaama mu ba Isiraeli boosi, khuuba shiwaanwa she khubayeeta isi muli. Nibo bali bawoonge isi samweene, khukhwakaanisa mu lisari lyase likhosefu.

⁷Ne iwe atweela ni basooleli boowo, muli ni khukhwoolelesa bufunisi bwe busaayi, bubuwaambakana ni neebyo byoosi bibiili khu sheeso, ni mu shifwo shishifuura bukhosefu. Indikhubawa bufunisi buno bwe khukhuuntsakaanisa ise nga basaayi, lwekhuuba shili shiwaanwa isi samweene, ne umuundu ukuundi yeesi uwiryeekharyeekha bari eetsa aambi ni bibiindu bye mu Lisari Likhosefu, ali ni khukhwiiribwa.”

⁸Lwanyuma Umukasya waalomela Aroni ari, “Ari bona ise ndi khuukhuwa iwe biwaanwa bya buraawa byeesi babaandu bareera isi indi, bibikhali biwaanwa bye khukhwookhebwa ta. Ise ndi khuukhuwa iwe atweela ni basooleli boowo, biwaanwa ibyo byeesi baba bandereere ise, khuuba bibyoowo biilo ni biilo.

⁹Khu biwaanwa bino bibifuura bukhosefu, bibikhookhebwele ni kumulilo khu sheeso ta, kane bibatsake bibyeenywe: Biilyo byeesi bakyesa bibyoomu byoosi, biwaanwa bibikane biwaanibweyo lwe bibyoonako, ni neebyo bibikane biwaanibweyo lwe khuŋoona bibiindu bibyaborokha.

¹⁰Khukhwaama nga bibiindu nibili bikhosefu, mwaakha khubiliila mu shifwo shikhosefu, naluundi byaakha khuliibwa ni besaani bonyene.

¹¹“Ni khuuloosela khu byeene ibyo, biwaanwa bibiindi bya buraawa byeesi ba Isiraeli kane bawaanatsakeyo isi ise, kane bibatsake bibyeenywe. Naabibaweele inywe, iwe atweela ni basooleli boowo, ni khutubakho ni bakhaana boowo, biilo ni biilo. Buli mutweela khu be muungo mwoowo uuli umukwalaafu, niye ukane abilyatsakekho.

¹²Ari bona ise ndi khuubawa inywe bibiindu bibifuura buulayi, byeesi babaandu ba Isiraeli baasuta baareera, nga bino: Kamafura ke kuusaala ku olivu, iviini, ni biilyo bibyoomu.

¹³Khu bilimwa byaabwe byeesi bakyesa bibinyoowela ilala, atweela ni kamatuunda khukhwaama mu mikuunda kyaabwe, byoosi naabibaweele, bili bibyeenywe. Babaandu kane bawaaneyo bino byoosi isi indi, nashiryo umuundu yeesi uwe muungo mwoowo ubilyakho, ali ni khuuba nga wapyeeluusibwile buulayi.

¹⁴“Buli shiindu shoosi mu Isiraeli, shishikane shibe nga shanuulibwile mu busoolo, ne nga shawaanibwiileyo ilala isi ise, kane shibatsake shisheenywe.

¹⁵“Buli musooleli umukiboole yeesi, namwe shiikiboole she shishaayo sheesi ba Isiraeli kane bawaanatsakeyo isi ise Umukasya, kane shibatsake shisheenywe. Ne khuurusakho ndi nga ali umwaana umusiinde bali ni khuuwaanayo shishiindu nio akile bamukule bamwiiseyo. Ni musaambo niyo ndweela, shishaayo shoosi shishikhali shikwalaafu, nasho bali ni khuuwaanayo shishiindu, nio nasho bashikule bashiseyo.

¹⁶Umwaana umusiinde umukiboole aakha khuukulibwa esibweyo nga woolesile kumweesi mutweela, ni buukusi kane bube bisiintsa biraano bye feetsa byoonyene, nga bapima khusiintsiila khu bipimo bibiiliwo.

¹⁷Ne buli shiikiboole she khaafu, namwe she likheese, namwe she mbusi, sishaakhiile khukhwisibwayo ta, isho shiba shawulibwile khuuba shishase. Nashiryo bibyeene ibyo byaakha khuuwaanibwayo nga tsisaayilo tsintsoshe, ni kamafuki kaabyo mukawaanyake khu sheeso, ni kiminaawa kyatso mukyooshe, isilikakha iniine mu ngaaki, khuuba shishiwunya buulayi isi Umukasya.

¹⁸Ne inyama yabyo, kane ibaatsake iyeenywe, nga nimutela khuulya inyama iye tsimbafu, ni shinama she takho, khukhwaama khu tsisaayilo tsa buraawa.

¹⁹“Khukhwaama ni shaleelo shino, ise ndi khuukhuwa iwe, ni basooleli boowo, atweela ni bakhaana boowo, biwaanwa bikhosefu byoosi, byeesi babaandu ba Isiraeli kane bandeeratsake ise. Shilayilo shino kane shibatsake shiryo biilo ni biilo, naluundi kane ibatsake indakaano ikhashuusibwamo ta, isi ise Umukasya ikholile ni nawe atweela ni babetsukhulu boowo.”

²⁰Indi luundi Umukasya waalomela Aroni ari, “Iwe singene ufunekho kumukabo kwe liiswa lyaabwe, khuuba lilyoowo ta. Ise Umukasya, niye ukane akhuwatsake iwe byoosi byeesi kane wiyeetesatsake.”

²¹Umukasya waaloma ari, “Ise naweele ba Levi buli shitweela she likhumi sheesi babaandu ba Isiraeli bareera isi indi. Shino kane shibatsake nga kumukheemba kwaabwe lwe bubwakaanisi bweesi baakaanisa mu Lisari Likhosefu.

²²Nashiryo ba Isiraeli babaaramile sibaakhila khukhwisyeenda aambi ni Lisari Likhosefu ta, siinga bashikhola kane beererekho kumusaango kwe khuufwa.

²³Ne khukhwaama ni shaleelo shino, ba Levi bonyene nibo babaakane babe babaakaanisi be mu Lisari Likhosefu, naluundi nibo bonyene nibo babaakane betyuukhe bufunisi khu lwayo. Shino shili shilakilo shishikane shibatsakewo biifukhu byoosi, shibawaamba khwiinywe, ni babetsukhulu beenywe babaalilawo lwanyuma. Ba Levi singene babe ni shishiindu shoosi shishiili shishaabwe khubwaabwe nga buusikha mu Isiraeli ta.

²⁴Lwekhuuba isi nabaweele nibo shitweela she likhumi, sheesi babaandu ba Isiraeli baandeerera ise khuuba shiwaanwa sha buraawa. Isho nisho shishikilile ise naabalomakho ndi singene babe ni shishiindu shoosi she buusikha mu Isiraeli ta.”

²⁵Luundi ndi Umukasya waalakila Musa

²⁶khuuboolela ba Levi ari, “Ni muba nga mwakaaniile shitweela she likhumi khukhwaama khu baandu ba Isiraeli khuuba bibyeenywe, nanywe mwaakha khuubukulakho shitweela she likhumi she bibiindu byeene ibyo, mushiwaaneyo isi ndi.

²⁷Shitweela she likhumi shino, kane shiyilibwe khuuba nga shiwaanwa sheesi umulimi awaanayo khukhwaama khu bilime byeewe bibyoomu ni iviini ishaakha.

²⁸Muryo musaambo iyo, kane muwaanatsakeyo isi Umukasya, shitweela she likhumi khukhwaama khu biindu byeesi mubuusanisile khukhwaama khu baandu ba Isiraeli boosi. Muryo bino kane mube mwabiwaanileyo khulw'Omukasya isi umusaayi Aroni.

²⁹Mu biwaanwa bino byoosi, muroboramwo bibifuura buulayi, khuubiwaanayo isi Umukasya.

³⁰Muryo nga mwaamalile khuuwaanayo biwaanwa bibifuura buulayi ibyo, mwibiikhile bibiramile, nga ba Isiraeli babaaramile nabo ni bebuungila bilime byaabwe bibyoomu ni iviini.

³¹Bibiramile bino byoosi munyala mwabiliila aandu oosi atweela ni be muungo mweenywe, lwekhuuba kuli kumukheemba kweenywe lwe bubwakaanisi bweenywe isi Lisari Likhosefu.

³²Muryo singene mubekho ni kumusaango kwoosi lwe khubilya ta, siinga muba nga mwaamalile khuuwaanayo bibifuura buulayi isi Umukasya. Ne muli ni khukhwitsiliilisa naabi, khuubona muri biwaanwa byeesi ba Isiraeli bareerire birama nga bikwalaafu. Ne siinga mulyakho khu nibyo nga bibifuura buulayi bishiili khuuwaanibwayo isi ndi ta, kane mwiiribwe.”