Read lumasaaba Khuubala 19 Bible Online

Khuubala 19 - lumasaaba bible

Khuubala 19

¹Lwanyuma Umukasya waalakila Musa ni Aroni khuuwa ba Isiraeli biilakilo, nga aloma ari,

²“Mulakile babaandu ba Isiraeli babareerere inywe ikhaafu imbesemu, ikhalikho ni buuleme bwoosi ta, naluundi isi bakhabowatsakakho likyooki lyoosi khuukilimisa ta.

³Muryo mukiwaambise umusaayi Eliyazaari, bakiyile ibulafu we kaambi, lwanyuma bakikhoonye nga Eliyazaari mweene waaloleleele.

⁴Lwanyuma umusaayi Eliyazaari kane ayile kamalasile kaayo, asiikhemo lulwaala lweewe, akawaanyake kimiluundi musaafu, nga waaloleleele lubeka lwe Lisari.

⁵Lwanyuma ikhaafu yoosi iramile, nga waayiliilekho ni lihaafu lyeene, ni tsinyama, ni kamalasile kakaaramile, ni bye muunda byeene, bili ni khukhwookhebwa ni kumulilo iburaangisi w'omusaayi.

⁶Lwanyuma umusaayi abukule kukyeenga kwe kuusaala kedari, ni shishaangwe, atweela ni lukoye lubesemu, nabyo abituume mu mulilo kukuuli khukhwoosha tsinyama.

⁷“Nga isho shaaweele, umusaayi ali ni khuusiinga bikwaaro byeewe, esiinge kumubili kweewe mu meetsi. Lwanyuma lwayo anyala wenjila mu kaambi, ne shonyene ndi kane arame nga ali umunyaalu, khukhwoolesa angoloobe.

⁸N'umusaani ukhola kwe khukhwoosha inyama iye khaafu iyo, naye aakha khuusiinga bikwaaro byeewe, ni khukhwiisiinga kumubili kweewe umweene mu meetsi, ne khuurusakho ndi kane arame nga ali umunyaalu khukhwoolesa angoloobe.

⁹Ne umuundu ukane abe nga s'ali umunyaalu ta, aakha khuutsya khuyoola likoshe lilyaamile mu khaafu iyookhebwele, alibuuse mu shifwo shimiliwu ibulafu we kaambi. Likoshe lino kane libiikhibwe nio balitabulatsake mu meetsi, kakaakane karaambisibwe mu khusiinga bibyoonako ni khuubirusawo.

¹⁰Umuundu uutsya khuubuusa likoshe lino naye aakha khuusiinga bikwaaro byeewe, ne kane arame nga ali umunyaalu khukhwoolesa angoloobe. Shino kane shirame nga shiilakilo sheesi babaandu ba Isiraeli baakha khuuloondelelatsaka, atweela ni babeetswa babaali akari mu nibo.”

¹¹Umukasya waloma luundi ari, “Umuundu yeesi ukane awaambe khu mulaambo kw'omuundu kwoosi, kane arame nga ali umunyaalu khuumala biifukhu musaafu.

¹²Nashiryo umuundu uyo aakha khukhwisiinga mu meetsi ke khupyeluusa khu shifukhu she khataru, indi elekho khukhwisiinga luundi khu shifukhu she kumusaafu, lwanyuma lwaawo kane abe nga waapyeluukhile. Ne siinga alekha khukhwisiinga khu shifukhu she khataru ni she kumusaafu isho ta, kane arame nga ali umunyaalu.

¹³Ne umuundu yeesi ukane awaambe khu mulaambo kw'omuundu, ne walekha khukhwipyeluusa nga esiinga mu meetsi tsana kakapyeluusa ta, kane arame nga ali umunyaalu. Nashiryo umuundu uyo kane abe nga wanyaalutile i Lisari ly'Omukasya likhosefu, naluundi singene abalikhe luundi khuuba mutweela khu baandu baase ba Isiraeli ta.

¹⁴“Ne siinga umuundu afwiila mu lisari mukari, umuundu yeesi uuba nga ali mu lisari ilyo mukari, n'umuundu ukuundi yeesi uwiinjilamwo, kane ekyele umunyaalu khuumala biifukhu musaafu.

¹⁵Inyuungu yoosi ikane ibe nga ili mu lisari, n'enga yaakhubiimbibwakho khu ngaaki ta, nayo kane ibe inyaalu.

¹⁶“N'umuundu yeesi ukane awaambe khu mulaambo kw'omuundu isi bakhoonyeele mwirome, namwe ufwiile busa, namwe khuwaambakho khu likuumba ly'omuundu, namwe khuuwaambakho khu ŋani, kane arame nga ali umunyaalu khuumala biifukhu musaafu.

¹⁷“Khuurusawo bunyaalu ubwo, umuundu uuli umumiliwu abukule likoshe lilyaama mu khaafu tsana imbesemu, iyookhebwa lwe khurusawo shishoonako, aliyile, alire mu nyuungu, atubaasemo kameetsi khukhwaama mu luutsi.

¹⁸Umuundu mweene uyo abukule shishaangwe, ashisiikhe mu meetsi iko, akawaanyake khu lisari, ni khu buli shiindu shoosi shishiili mu lisari ilyo, ni khu baandu babaali mukari mweene. Naluundi umuundu tsana umumiliwu uyo, awaanyake kameetsi ako kakaatubaasibwilemo likoshe ni khu muundu ukuundi yeesi uuba nga waawaambile khu likuumba ly'omuundu, namwe khu mulaambo kw'omuundu ufwiile, namwe khu ŋani.

¹⁹Umuundu umumiliwu uyo kane awaanyake kameetsi khu muundu umunyaalu khu shifukhu she khataru, ni khu she kumusaafu khumupyeluusa. Aryo khu shifukhu she kumusaafu kane abe nga umupyeluuse, lwanyuma asiinge bikwaaro byeewe, umweene esiinge buulayi kumubili kweewe, khukhwoola angoloobe abe nga wapyeluukhile.

²⁰“Ne umuundu yeesi ukane abe umunyaalu, ne wekaana khukhwipyeluusa, kane arame nga umunyaalu, lwekhuuba bakhumuwaanyakakho kameetsi ke khupyeluusa ta. Nashiryo umuundu uyo aba woonakisile i Lisari ly'Omukasya, aba s'akhila luundi khuuba mutweela khu baandu ba Isiraeli ta.

²¹Shilakilo shino kane shibatsake shiryo singene shiyuukhekho ta. Umuundu ukane awaanyatsake kameetsi ke khuupyeluusa, naye aakha asiinge bikwaaro byeewe. N'umuundu yeesi ukane awaambekho khu meetsi keene kano, kane arame nga umunyaalu khukhwoolesa angoloobe.

²²Ni shishiindu shoosi sheesi umuundu umunyaalu kane awaambatsakekho, kane shikyelatsake shinyaalu, n'umuundu ukuundi yeesi ukane awaambe khu shiindu sheene isho, kane naye abe umunyaalu khukhwoolesa angoloobe.”