Read lumasaaba Khuubala 2 Bible Online

Khuubala 2 - lumasaaba bible

Khuubala 2

¹Lwanyuma Umukasya waawa Musa ni Aroni biilakilo

²bibiwaamba khusaambo isi ba Isiraeli baakha khuurekekhamwo tsikaambi tsaabwe: “Nga ba Isiraeli bakhola tsikaambi tsaabwe, buli shikuuka shaakha khuukhwiireerawo ibendela, ni aasi a buli bendela, abewo tsiingo tse mu shikuuka isho. Tsikaambi tsino tsaakha tsirekekhebwe khukhwibotokhelela Lisari Likhosefu, ne nga sitsaakha khuuba aambi ni nalyo ta.

³“Ibwaamanyaanga we Lisari Likhosefu, yaakha khuurebwayo lituuli lye bikuuka bibiili aasi e bendela ya Yuda. Ne umuraangilisi we babaandu be mu shikuuka sha Yuda niye Nahashoni, umusooleli wa Aminadabu.

⁴Lituuli lyeewe kane lyoolese baselikhale kimikaanda musaafu, bikana bine, ni bitoondo bisesaba (74,600).

⁵Shikuuka shishikane shiilekho kane shibe shikuuka sha Isakaari. N'umuraangilisi waabwe kane abe Nesaneli, umusooleli wa Zuwari.

⁶Lituuli kane lyoolese baselikhale kimikaanda kiraano, bikana bine ni bitoondo bine (54,400).

⁷Shikuuka shishikane shiilekho kane shibe shikuuka sha Zebuluni. N'umuraangilisi waabwe kane abe Eliyabu, umusooleli wa Heloni.

⁸Lituuli lino kane lyoolese baselikhale kimikaanda kiraano, bikana musaafu, ni bitoondo bine (57,400).

⁹Baryo baselikhale boosi babaareebwawo be mu kaambi ya Yuda yoosi, iyabamo bikuuka bitaru ibyo, atweela boola kumweeka mutweela, kimikaanda shinaane, bikana bisesaba, ni bitoondo bine (186,400). Baselikhale bano be mu kaambi ya Yuda nibo babanyoowa khuuraangila khukhuumba khukhwiiloosela ni lukyeendo.

¹⁰“Khu lubeka lwe mwaalo, yaakha khuureebwayo lituuli lye bikuuka bibiili aasi e bendela ya Rewubeni. Ne umuraangilisi we babaandu be mu shikuuka sha Rewubeni niye Elizuri, umusooleli wa Shedewuri.

¹¹Lituuli lyeewe kane lyoolese baselikhale kimikaanda kine, bikana bisesaba, ni bitoondo biraano (46,500).

¹²Shikuuka shishikane shiilekho kane shibe sha Simeoni. N'umuraangilisi waabwe kane abe Shelumieli, umusooleli wa Zurishadaayi.

¹³Lituuli lino kane lyoolese baselikhale kimikaanda kiraano, bikana syeenda, ni bitoondo bitaru (59,300).

¹⁴Shikuuka shishiindi shishiilakho kane shibe sha Gadi. N'umuraangilisi waabwe kane abe niye Eliyasafu, umusooleli wa Dewuweli.

¹⁵Lituuli lino kane lyoolese baselikhale kimikaanda kine, bikana biraano, bitoondo bisesaba, ni kamakhumi karaano (45,650).

¹⁶Baryo baselikhale boosi babaareebwawo be mu kaambi ya Rewubeni, iyabamo bikuuka bitaru ibyo, atweela boola kumweeka mutweela, kimikaanda kiraano, shikana shitweela, bitoondo bine ni kamakhumi karaano (151,450). Baselikhale be mu kaambi ya Rewubeni bano boosi nibo babeelakho khuuba be khabili khukhuumba khukhwiiloosela ni lukyeendo.

¹⁷“Lwanyuma ba Levi batsye nga baasutile Lisari Likhosefu, atweela ni tsibendela tsaabwe, nga bakyeendela akari e tsikaambi tsino. Bikuuka bibiramile byoosi bikyeendele mu lwantsaango, nga tsikaambi tsaabwe ni tsili, buli muungo nga muli aasi e bendela yaabwe.

¹⁸“Khu lubeka lwe bukwanyaanga, yaakha khuureebwayo lituuli lye bikuuka bibiili aasi e bendela ya Efurayimu. Ne umuraangilisi we shikuuka sha Efurayimu niye Elishama, umusooleli wa Amihudi.

¹⁹Lituuli lino kane lyoolese baselikhale kimikaanda kine, ni bitoondo biraano (40,500).

²⁰Shikuuka shishikane shiilekho kane shibe sha Manase. N'umuraangilisi waabwe kane abe Gamalyeli, umusooleli wa Pedahizuri.

²¹Lituuli lino kane lyoolese baselikhale kimikaanda kitaru, bikana bibili, ni bitoondo bibili (32,200).

²²Shikuuka shishikane shiilekho nisho sha Benyamini. N'umuraangilisi waabwe kane abe Abidani umusooleli wa Gidiyoni.

²³Lituuli lino kane lyoolese baselikhale kimikaanda kitaru, bikana biraano, ni bitoondo bine (35,400).

²⁴Baryo baselikhale babareebwawo be mu kaambi ya Efurayimu, iyabamo bikuuka bitaru ibyo, atweela boola kumweeka mutweela, bikana shinaane, ni shitoondo shitweela (108,100). Baselikhale be mu kaambi ya Efurayimu bano boosi nibo babeelakho khuuba be khaataru khukhuumba khukhwiiloosela ni lukyeendo.

²⁵“Khu lubeka lwe ngaaki yaakha khuureebwayo lituuli lye bikuuka bibiili aasi e bendela ya Dani. Ne umuraangilisi we shikuuka sha Dani niye Ahiyezeri umusooleli wa Amishadayi.

²⁶Lituuli kane lyoolese baselikhale kimikaanda kisesaba, bikana bibili, ni bitoondo musaafu (62,700).

²⁷Shikuuka shishikane shiilekho nisho sha Asheri. N'umuraangilisi waabwe kane abe niye Pagieli umusooleli wa Okurani.

²⁸Lituuli lino lyoolesa baselikhale kimikaanda kine, shikana shitweela, ni bitoondo biraano (41,500).

²⁹Shikuuka shishikane shiilekho nisho sha Nafutali. N'umuraangilisi waabwe niye Ahira umusooleli wa Enani.

³⁰Lituuli lino lyoolesa baselikhale kimikaanda kiraano, bikana bitaru, ni bitoondo bine (53,400).

³¹Baryo baselikhale babareebwawo mu kaambi ya Dani, iyabamo bikuuka bino bitaru, atweela boola kumweeka mutweela, kimikaanda kiraano, bikana musaafu, ni bitoondo bisesaba (157,600). Baselikhale be mu kaambi ya Dani bano boosi nibo babaakane baseembeyo khukhuumba khukhwiiloosela ni lukyeendo.”

³²Khuuyilila atweela, babaandu ba Isiraeli boosi, baabalibwa nga basintsiila khu tsiingo tsaabwe. Baselikhale baaruungikhibwa nga basiintsiila khu matuuli kaabwe, nga boosi atweela boola kimyeeka kisesaba, bikana bitaru, bitoondo biraano ni kamakhumi karaano (603,550).

³³Babaandu beesi bakhaabala ta, baaba nibo ba Levi bonyene, khuusiintsiila khu bilakilo byeesi Umukasya aawa Musa.

³⁴Musaambo iyo, ba Isiraeli baakhola bibiindu byoosi byeesi Umukasya aalakila Musa. Baryo baaruungikha tsikaambi tsaabwe nga baasiintsiila khu bukuuka bukyeekhe ni tsiingo tsaabwe, nga buli shikuuka shili aasi e bendela yasho. Musaambo iyo baaba nga bakhuumba khukhwiiloosela ni lukyeendo.