Read lumasaaba Khuubala 20 Bible Online

Khuubala 20 - lumasaaba bible

Khuubala 20

¹Baryo babaandu ba Isiraeli, lituuli lyoosi, beetsa boola mu mubiimbi kwa Zini, mu mweesi kukuunyoowa, baakhola i kaambi yaabwe i Kadeshi. Nga bali ibweene iyo, Miriamu waafwa, baamusiikha iyo.

²Ibweene iyo babaandu bano sibaabayo ni kameetsi ta, kila beetsa baabuusana isi Musa ni Aroni,

³beluŋuunya luukali nga baloma bari, “Khali shaba shilayi ifwe nafwe khuba khukhwafwiila atweela ni babandaayeefwe babaafwiila iburaangisi we lisari ly'Omukasya!

⁴Lwashiina inywe mwakhureerire ifwe ano mu mubiimbi kuno? Ari bona ifwe atweela ni bibyaayo byeefwe khutsya khuhela!

⁵Lwashiina mwakhurusa ifwe mu Misiri, khukhureera mu shifwo shino she kumutaambo? Bona mbaamwo biilyo bibyoomu, mbaamwo kimifigi, namwe kimizabibu, namwe kamatuunda kakafwaana biibeya ta. Naluundi bona muno mbaamwo kameetsi ke khuunywa ta!”

⁶Lwanyuma Musa ni Aroni baarura isi lituuli lye babaandu bano lyaba, baatsya a mulyaango kwe lisari, bewunamila kimirwe kyaabwe aasi khwiloba. Shiriifwa sh'Omukasya shabafusilisa,

⁷kila Umukasya alomela Musa ari,

⁸“Bukula imiimbo yoowo iye khukhwitiila. Lwanyuma iwe ni waandaayo Aroni mulaange babaandu boosi beetse atweela, ulakile lulwaanda lwamemo kameetsi, nga boosi baloleleele. Musaambo yino kane ubawe kameetsi ke khuunywa nibo babeene, atweela ni bibyaayo byaabwe.”

⁹Aryo Musa waatsya, waabukula imiimbo yeewe, nga Umukasya n'amulakila.

¹⁰Kila Musa ni Aroni balaanga atweela lituuli lye babaandu boosi, baabuusana iburaangisi we lulwaanda. Musa waabalomela ari, “Inywe banabumiinyi, ni mureekerese! Ifwe khunyala khwabarusila kameetsi khukhwaama mu lwaanda luno?”

¹¹Lwanyuma wenyusa imiimbo yeewe mu ngaaki, waatoongola lulwaanda kimiluundi kibili, kameetsi kapomookha khuulwaamamwo, babaandu boosi baanywa atweela ni bibyaayo byaabwe byeene.

¹²Ne Umukasya wekiitsa Musa ni Aroni, nga aloma ari, “Lwekhuuba inywe simubeele ni khuufukiilila musiise ta, muryo mwalekha khumbeesa ise shiriifwa mu moni tse babaandu ba Isiraeli bano, ari singene mubaraangilile khuubayila mu shibala isho sheesi nabasuubisa khuubawa ta.”

¹³Shino shakholekha mu shifwo she Meriba[2], mweesi babaandu ba Isiraeli beluŋuunyila khu Mukasya, ni naye aryo wabokesanisa ari ali umukhosefu.

¹⁴Musa waarumana baarume khukhwaama mu kaambi yaabwe iyaba i Kadeshi, khuutsya isi umuyiinga wa Edomu, nga bamuyilila buurume bari, “Ifwe khuli babandaayo babeene, babaandu ba Isiraeli. Waamanya buulayi bukosi bwoosi bweesi khwabiramo.

¹⁵Bakuuka beefwe baatsya bamenya i Misiri, khuumala imbuka indeeyi. Ne ba Misiri baakyelawo baakhubirisa buubi naabi,

¹⁶ne ni khwelootsela Umukasya lwe buyeeti, aakhuwulila khulila khweefwe. Lwanyuma waarumana malayika, uweetsa wakhuraangilila wakhurusayo mu Misiri. Ni aluno ari, bona khuli ano i Kadeshi, khu lwaakha khu bweene ni linaambo lyoowo.

¹⁷Ari khukhuloomba khuri ukhufukiilise khubirirekho mu linaambo lyoowo ilyo. Ifwe atweela ni bibyaayo byeefwe, singene khuborokhekho khukhwaama khu ntsila, khutsye mu nimilo tseenywe, namwe mu matuunda keenywe ta. Naluundi singene khunywekho kameetsi khukhwaama musebele tseenywe ta. Ifwe kane khumenyatsake khu ntsila khwonyene, khukhwoolesa ni khulibiramwo busa khutsye.”

¹⁸Ne umuyiinga wa Edomu wabeelamwo ari, “Ise sinabafukiilisakho khuubirira mu shibala shase shino ta! Ne siinga mukhakakho muri, ise kane ikhuumbe ni liiye lyase khubebwakale.”

¹⁹Babaandu ba Isiraeli nabo baamwiilamwo bari, “Ifwe khukhusuubisa khuri kane khumenye busa khu ntsila, ne siinga ifwe babaandu, namwe bibyaayo byeefwe bitsya byaanywa khu meetsi koowo, khulikasasulila. Ne sheesi khuloomba busa khuri, ukhufukiilise khubire.”

²⁰Ne Umuyiinga wa Edomu welamwo luundi ari, “Inywe simunyala mwabirira mu shibala shino ta!” Lwanyuma ba Edomu bano baakhuumba ni liiye lye kamaani lilyeene, baatsya khukhwibwakala babaandu ba Isiraeli.

²¹Musaambo iyo, babaandu ba Edomu baakhaasisa babaandu ba Isiraeli khuubirirakho mushibala shaabwe. Baryo ba Isiraeli bakhalawo khuutsya khuubirira khu ntsila ikiindi.

²²Lwanyuma lwayo babaandu boosi ba Isiraeli baakyeenda, baama i Kadeshi baatsya boola khu lukiingi Hori,

²³lulwaba khu lwaakha ni shibala sha Edomu. Ibweene iyo khu lukiingi Hori, Umukasya waalomela Musa ni Aroni ari,

²⁴“Aroni, s'utsya khwambukha, winjile mu shibala sheesi nasuubisa khuuwa babaandu baase ba Isiraeli ta. Ari bona utsya khufwiila ano, lwekhuuba iwe atweela ni Musa mwaminyaalila shilakilo shase sheesi nabawa khu meetsi ke Meriba.

²⁵Nashiryo iwe Musa, yila Aroni, atweela n'umusooleli weewe Eliyazaari, mwiitse khu ngaaki khu lukiingi Hori.

²⁶Lwanyuma waabulekho khu Aroni bikwaaro ibyo bye busaayi, ubikwaarise umusooleli weewe Eliyazaari. Abweene awo niwo isi Aroni atsya khufwiila.”

²⁷Aryo Musa waawuliilisa byeesi Umukasya aamulomela, baaniina khu lukiingi Hori, nga babaandu boosi baloleleele.

²⁸Ni boolayo, Musa waabulakho khu Aroni bikwaaro bye busaayi, waabikwaarisa umusooleli weewe Eliyazaari. Lwanyuma Aroni wafwiila ibweene iyo khu lukiingi. Baryo Musa ni Eliyazaari baakobola khukhwaama khu lukiingi.

²⁹Ne babaandu ba Isiraeli ni baashimanya bari Aroni waamalile khuufwa, baasola khulweewe khuumala biifukhu kamakhumi kataru.