Read lumasaaba Khuubala 21 Bible Online

Khuubala 21 - lumasaaba bible

Khuubala 21

¹Umuyiinga umu Kanaani, uwe Aradi, shisiintsa she mwaalo she mu mubiimbi kwe Kanaani, n'awulila bari babaandu ba Isiraeli balikho babira beetsila khu mukhoosi kwe shishaalo sha Asarimu, waatsya waabebwakala, wawaambakho baalala khu nibo, waabayila nga baabowe.

²Kila ba Isiraeli bakhola shishitsubo isi Umukasya nga baloomba bari, “Iwe siinga ukhuyeeta ifwe khwaawula babaandu ba Kanaani bano, kane khuhesele ilala biriimba byaabwe.”

³Aryo Umukasya waawulila khuuloomba khwaabwe, waabayeeta, khuuwula ba Kanaani bano, baahesela ilala ni biriimba byaabwe byeene. Isho shaakila balaanga shiifwo isho bari Horuma[3].

⁴Babaandu ba Isiraeli baasimbula khukhwaama khu lukiingi Hori, baatsya nga bebotokhelela shibala sha Edomu, baatsya khukhwoola khu nyaantsa imboofu Imbesemu. Ne nga ni baaba bakyeenda, babaandu tsana bawamwo khukhwikhalilikha.

⁵Isho shaakila ndi baarakikha khukhwiluŋuunya isi Wele ni khu Musa, nga baloma bari, “Inywe shiina kila mwakhureera ifwe, mwaakhurusa khukhwaama mu Misiri, muri nio khuhelele mu mubiimbi kuno? Lwekhuuba ano bona mbaawo kameetsi, naluundi sikhushinyalisa khuulya biilyo bye kumutaambo bino ta.”

⁶Isho shaakila Umukasya waarumana tsindemu tse buutwa, tseetsa tsaabalumaka, ni babaandu ba Isiraeli baakali baafwaka.

⁷Babaandu baalala beetsa isi Musa baamulomela bari, “Khufukiilila, ilala khwaayonakisa, khwaakhomaka Umukasya, khwaakhomaka ni nawe. Ne ari yikoontselela isi Umukasya, arusewo tsindemu tsino.” Aryo Musa waaloomba.

⁸Lwanyuma Umukasya kila alomela Musa ari, “Kholayo indemu khukhwaama mu buroonzi, ukiwanikhe imurwe khu murongooro. Nio buli muundu yeesi isi indemu ilumile, ni enyusa tsimoni tseewe waakilolakho, singene afwe ta.”

⁹Aryo Musa waakholayo indemu khukhwaama mu buroonzi, waakiwanikha imurwe khu murongooro. N'umuundu yeesi isi indemu yaluma, uwenyusa tsimoni tseewe waalola khu ndemu ya buroonzi iyo, aawonesebwa.

¹⁰Lwanyuma babaandu ba Isiraeli belooselayo ni lukyeendo lwaabwe, baatsya baara i kaambi i Obosi.

¹¹Nga baarurire i Obosi, belooselayo baatsya baara i kaambi yaabwe i Iye-Abarimu, shiifwo shishaba mu mubiimbi kwe bwaamanyaanga wa Mowabu.

¹²Khukhwaama abweene awo, belooselayo boola mu Litila lya Zeredi.

¹³Khukhwaama abweene awo, belooselayo baatsya baakhalisa Luluutsi Arinoni, baatsya baara i kaambi yaabwe mu mubiimbi kwa Mowaabu kukwesaane ni shibala sha Amori. Luluutsi Arinoni ilwo lwaba khu lwaakha lwe ba Mowabu ni ba Amori.

¹⁴Isho shaakila mu Shiitabo she Buusoolo bw'Omukasya, shiloma shiri, “Shiriimba sha Wahebu she mu shisiintsa sha Sufa, ni kamatila ke Luluutsi Arinoni,

¹⁵ni kumwiikha kwe mu matila kukuutsya kwoola mu shiriimba sha Ari, kwaatsya kwoola khulwaakha ni Mowabu.”

¹⁶Khukhwaama i Arinoni, ba Isiraeli baatsya boola aambi ni shiriimba sha Beeri, abweene awo niwo isi Umukasya aalomela Musa ari, “Laanga babaandu bano khukhwiitsa atweela, ni nase kane imbawe kameetsi.”

¹⁷Khu mbuka iyo kila babaandu ba Isiraeli beemba kumweenya kuno bari, “Kaarubukhile! O kameetsi kaarubukhile! Khakhukakaanile ni kumweenya!

¹⁸Isebele iyalimibwa ni be muungo mw'omuyiinga atweela ni baaraangilisi be babaandu, Yalimibwa isi imiimbo iye buyiinga yokeselela.” Baryo baakyeenda khukhwaama mu mubiimbi baatsya baara i kaambi yaabwe aambi ni Matana.

¹⁹Ni khukhwaama i Matana iyo, belooselayo paka i Nahaliyeli, khukhwaama i Nahaliyeli baatsya i Bamosi,

²⁰ni khukhwaama i Bamosi iyo, bekhilila mu litila lye khwiiswa lye ba Mowabu, mwisina mwe lukiingi Pisiga, lululolelaniile ni kumubiimbi.

²¹Lwanyuma babaandu ba Isiraeli baarumanisa buurume isi Sihoni, umuyiinga wa Amori nga buloma buri;

²²“Khuloomba ukhulekhe khubirirekho busa mu shibala shoowo. Khukhusuubisa khuri singene khuborokhe khuurura khu mukhoosi kweefwe ta, khuutsya mu nimilo namwe mu mikuunda kyeenywe kye kimizabibu ta. Naluundi singene khunywekho kameetsi khukhwaama musebele tseenywe ta.”

²³Ne Sihoni waalekha khufukiilila babaandu ba Isiraeli khuubirira mu shibala sheewe ta. Ne shonyene ndi walaanga atweela liiye lyeewe lyoosi, waakhuumba waatsya mu mubiimbi khukhwibwakala ba Isiraeli aambi ni shiriimba Jahazi.

²⁴Ne ba Isiraeli baakhoonya umuyiinga uyo, babawulila ilala mu busoolo ubwo, bawaamba liiswa lyaabwe khukhwaamila ilala khu Luutsi Arinoni, lulwaba khu lubeka lwe mwaalo, khuuniina khukhwoola khu litila lya Yaboko, khu lubeka lwe ngaaki. Nga waabirisilekho iyo, yabayo babaandu ba Amoni, ate nga nibo khu lwaakha lwaabwe baaba nga baalukhiinga luukali naabi.

²⁵Baryo babaandu ba Isiraeli bawaamba biriimba byoosi bye ba Amori, ni khuyililamwo Heshiboni, ni bibyaalo byoosi bibibotokhelelewo, baabimenyamwo.

²⁶Heshiboni shaba shiriimba shikhulu sha Sihoni, umuyiinga wa Amori, uwasoolanisa umuyiinga wa Mowabu uwanyoowa, wawaambaka liiswa lyaabwe khulola kwe ngaaki, khuutsya khwoola khu Luutsi Arinoni.

²⁷Isho nisho shishakila babaandu ba Amori baarona lunikha luluwaamba khu Heshiboni nga luloma luri, “Yiitsa i Heshiboni, shombekhebwe bushaakha! Lekha shiriimba sh'omuyiinga Sihoni, shombekhebwe!

²⁸Lutweela khukhwaama mu shiriimba shino sha Heshiboni, liiye lya Sihoni lyarura nga kumulilo kukuutindiima. Kwaatsya kwoosha shiriimba sha Ari mu Mowabu, kwahesa ni bakasya be mu bikoongo bye ngaaki we Luluutsi Arinoni.

²⁹O inywe babaandu ba Mowabu, nga kumutaambo kwaabanyoolile! Inywe mweesi babesaaya wele Kyemoshi, kwaabafuurire, wele weenywe walekhile babaandu beewe, ni bakhaana beewe wabalekhile khukhwikyela baabowe b'omuyiinga Sihoni uwe ba Amori.

³⁰Baryo babetsukhulu baabwe boosi baahela khukhwaamila ilala i Heshiboni, khuutsya khwoola i Diboni, kumulilo kwatsya kwasalanila khukhwoolela ilala i Nofa shishiili aambi ni Medeba byoosi byahelela ilala, byawawo.”

³¹Baryo babaandu ba Isiraeli bamenya mu shibala she ba Amori.

³²Musa waarumana babaandu khuutsya khuyama babone isaambo shiina ifuura buulayi iye khukhwibwakala Jazeri. Lwanyuma babaandu ba Isiraeli baatsya bawaambaka bibyaalo byayo, atweela ni biriimba bibibotokhelelewo, bawoonakamwo babaandu ba Amori babaaba bamenya mubweene umwo.

³³Lwanyuma babaandu ba Isiraeli baashuukha, baawaamba kumukhoosi kukulola kwe Bashani, isi umuyiinga Ogo aaba nga awula. Umuyiinga yuno Ogo waraangilila liiye lyeewe lyoosi, lyeetsa mu busoolo khusoolanisa ba Isiraeli i Edireyi.

³⁴Ne Umukasya waalomela Musa ari, “Ukhaba ni khuurya lwa Ogo ta. Ise kane ikhuyeete khuumuwula niye atweela ni babaandu beewe boosi, ni liiswa lyeewe lyoosi. Ni nawe kane umukhole shishiindu shitweela sheene sheesi wakhola Sihoni, umuyiinga we ba Amori, uwawulatsaka nga asiintsiila i Heshiboni.”

³⁵Baryo ba Isiraeli baakhoonya umuyiinga Ogo, ni basooleli beewe beene, ni babaandu beewe boosi, yalekha khubawo na mutweela uwawonakho ta. Lwanyuma babaandu ba Isiraeli baayila liiswa lyeewe.