Read lumasaaba Khuubala 22 Bible Online

Khuubala 22 - lumasaaba bible

Khuubala 22

¹Babaandu ba Isiraeli belooselayo ni lukyeendo lwaabwe, beetsa baara i kaambi yaabwe khu musaleela kwa Mowabu, i bwaamanyaanga wa Yorudaani, shanjelekha wa Yeriko.

²Ne Balaki umusooleli wa Zipori, umuyiinga wa Mowabu, atweela ni babaandu beewe, baaba baawuliile byeesi ba Isiraeli baakhola babaandu ba Amori.

³Ni shishiindi ndi babaandu ba Isiraeli baaba bali baakali naabi, shaakila buuri bukali bwawaamba umuyiinga wa Mowabu atweela ni babaandu beewe boosi.

⁴Isho shaakila babaandu ba Mowabu baalomela baaraangilisi be ba Midiyani bari, “Kuubuli kuukali kwe babaandu ba Isiraeli kulikho kwiitsa khuuhesa buli shiindu shoosi shishikhwibotokheleele, nga n'ubona iwuunwa ni khoomba busa bunyaasi.” Kila umuyiinga Balaki

⁵arumanisa baarume khuutsya isi Balaamu, umusooleli wa Beyori, abe umenya mu shiriimba sha Pesori, shishaba aambi ni luluutsi Efurati mu shibala sha Amawu. Buurume buno bwaloma buri, “Indi khuubona kuubuli kwe babaandu kuukali kukweene babeetsile ano nga baama mu Misiri. Beetsile baasalaniile buli aandu, bafwaana bakana khuyila shisiintsa shase.

⁶Ikhuloomba ndi wiitse unjeete, ubaantsubile lwekhuuba bali baakali naabi. Manya isho shinanyalisa khuubawula, nabawoona khuubarusa khu liswa lino. Ise namanyila ilala ndi, umuundu yeesi isi iwe uwa tsikhabi, aweebwa tsikhabi, ni nooyo isi utsuba, naye atsubibwa.”

⁷Baryo baaraangilisi bano khukhwaama i Mowabu ni mu Midiyani, benyukha baatsya ni kamapeesa ke khuusasulila shitsubo sheesi Balaamu aaba atsya khukhola. Nga booleleyo, baakaanisa Balaamu buurume bubwaama wa Balaki.

⁸Kila Balaamu abalomela ari, “Ni mukonekho ano shiilo shino, ni nase kumukaamba ikhaababoolele sheesi Umukasya anaba wambooleele ise.” Baryo baaraangilisi abo baakonayo shiilo isho.

⁹Mu shilo isho Wele waareeba Balaamu ari, “Babaandu babaakoneele ano mu ntsu yoowo bano, nibo banaanu?”

¹⁰Balaamu welamwo ari, “Balaki umusooleli wa Zipori, umuyiinga wa Mowabu, niye ubarumaane isiindi, nga aloma ari

¹¹iliwo babaandu babaamile i Misiri, bari baasalaniile buli aandu oosi mu shibala. Alikho anoomba ise bari intsye imbatsube, nio manya waanyalisa khuubasoolanisa, waabawoona baatsya.”

¹²Ne Wele welamwo Balaamu ari, “Iwe ukhatsya ni baarume ba Balaki bano ta. Ukhatsya waatsuba babaandu bano babaama mu Misiri, beesi ise namala khaale khuuwa tsikhabi ta.”

¹³Aryo Balaamu wenyukha kumutikhinyi, waaboolela baarume ba Balaki ari, “Ni mwiileyo mu shibala sheenywe. Umukasya waalobile bari ise sinatsya ni nanywe ta.”

¹⁴Baarume bano benyukha beelayo isi Balaki baamulomela bari Balaamu wekaanile khukhwiitsa.

¹⁵Lwanyuma ndi Balaki waarumana baaraangilisi babaandi babafuurakho baakiboole buukali ni shiriifwa.

¹⁶Nabo beetsa isi Balaamu nga bamureerera buurume khukhwaama isi Balaki nga buloma buri, “Naakhwikoontseleele ni wiitse, ikhabawo shishiindu shoosi shishikhukhaanga khukhwiitsa isi indi ta.

¹⁷Ilala kane ikhusasule buulayi naabi, naluundi ikhukholele buli shoosi sheesi kane ukane. Naakhwikoontseleele niwiitse, untsubile babaandu bano.”

¹⁸Ne Balaamu welamwo baarume bano nga abalomela ari, “Abe Balaki akhaamba ise intsu yeewe yoosi iyitsuulemo ifeetsa namwe zaabu, sinyala naaminyaala naatsya, naakhola shishiindu shoosi sheesi Umukasya Wele wase akhaandakiile khuukhola ta.

¹⁹Ne ni mukonekho ano ndi shiilo shino, nga basheenywe ni baakhola. Nase khaanyoowe imanye sheesi Umukasya anamboolela.”

²⁰Mu shilo isho ndi luundi Wele waalomela Balaamu ari, “Noola babaandu bano beetsile khuukhulaanga iwe, khuutsya mu Mowabu, yinyukha wiŋoonaŋoone utsye ni nabo. Ne, uli ni khuukanikha sheesi kane imbe naakhubooleele.”

²¹Kuryo kumutikhinyi ukwo, Balaamu wenyukha, wekhala khu sikilya yeewe, waatsya ni baaraangilisi be Mowabu.

²²Ne Wele lirima lyaamuwaambila Balaamu, lwekhuuba enyukha waatsya ni nabo. Kila Balaamu n'aba nga ali khu sikilya yeewe atsya, nga ali atweela ni bayeeti beewe, Malayika w'Omukasya weetsa weemikha iburaangisi khu mukhoosi kweewe.

²³Isikilya ya Balaamu yaabona malayika nga weemile iburaangisi ni lurima mu mukhono kweewe, yaarura khu mukhoosi, yaatsya mwiiswa. Ne Balaamu waakhupa isikilya, nga akana ikobole khu mukhoosi.

²⁴Lwanyuma kila malayika w'Omukasya tsana atsya weemikha khu khayila khaakyeekhe akari e kimikuunda kye kimizabibu, nga buli khu lubeka khulikho liitikiiyi.

²⁵Ne isikilya ni yabona malayika uyo luundi, yaakhakakho khukhwimiinilisa khu lubeka lutweela lwe litikiiyi, shaakila shikyele sha Balaamu shaaŋuukha. Balaamu ndi waakikhupa luundi.

²⁶Awo ndi malayika waarurawo, welooselayo iburaangisi, waatsya weemikha mu shifwo shinyelele naabi mweesi isikilya ikhanyala yaashuukha namwe yemiinilisa khuubirira khu ndulo ta.

²⁷Kila isikilya ni yabona malayika w'Omukasya uyo, yaakona aasi. Balaamu lirima lyaamuniina naabi, waarakikha khuukikhupa ni miimbo yeewe.

²⁸Nga byaabeele biryo, Umukasya waanyalisa isikilya khuukanikha, kila ireeba Balaamu iri, “Shiina sheesi ise ikhukholile kila ukhupile ise kimiluundi kino kitaru?”

²⁹Balaamu waakiilamwo ari, “Lwekhuuba waakholile ise khuuba umuundu umusilu naabi! Imba nga ubeele ni lurima, khali naakhukhoonyile!”

³⁰Nayo isikilya yaamwiilamwo iri, “Ise siindi niyo isikilya yoowo isi ubeele ukyeendatsakilakho imbuka yoosi? Ne manya iliwo shishiindu shoosi sheesi nakhukholatsakakho ndi?” Balaamu naye weelamwo ari “Taawe.”

³¹Abweene ni abweene awo, Umukasya waabiimbula tsimoni tsa Balaamu, waabona malayika nga weemikhile ibweeni khu mukhoosi, ni lurima mu mukhono kweewe. Shaakila Balamu wenama aasi, nga waafunikhiliila kumurwe kweewe khwiloba.

³²Kila malayika amulomela ari, “Lwashiina iwe ukhupile isikilya yoowo kimiluundi kino kitaru? Ise niye ubeele naashinjiliile intsila yoowo, lwekhuuba singana iwe waatsya khu lukyeendo lwa Mowabu luno ta.

³³Ne isikilya yoowo nga yimboone ise, yaaba nga ishuukha khurura khu mukhoosi kimiluundi kino kitaru. Niyo ilekha khukhola iryo, khali ise nakhwiirire iwe, ne njilekha niyo iba inamu.”

³⁴Balaamu naye welamwo malayika w'Omukasya ari, “Ise noonakile. Abe naakhushimanyakho ndi iwe niye uwiimikhile khu mukhoosi khukhuuntsakamisa ta. Ne ari siinga iwe waambaasa uri shili shiibi ise khukhwilooselayo, khayo ishuukhe niile ingo.”

³⁵Malayika waamwiilamwo ari, “Niwiloosele ni lukyeendo lwoowo atweela ni basaani bano. Ne waakha khuukanikha byeesi kane ikhuboolele byonyene.” Aryo Balaamu welooselayo ni baaraangilisi babaama wa Balaki.

³⁶Ne Balaki n'awulila ari Balaamu ali khukhwiitsa, waarura ibulafu, waatsya khumwakaanilila mu shiriimba Ari, shishaba khu ndulo khwe luluutsi Arinoni, khu lwaakha lwa Mowabu.

³⁷Kila Balaki alomela Balaamu ari, “Lwashiina kila ukheetsa isi ndi kumuluundi kukwanyoowa, nga ni nakhurumanisa? Wambaasa uri sinyala khuukhusasula ta kila?”

³⁸Balaamu naye waamwiilamwo ari, “Ari bona neetsile. Ne waambaasa uri ise ndi ni bunyala khuukanikha shoosi sheesi ingana? Kane inganikhe byeesi Wele anamboolela khuukanikha byonyene.”

³⁹Lwanyuma baryo boombi Balaki ni Balaamu baatsya mu shiriimba sha Kiriyasi Huzosi.

⁴⁰Ibweene iyo, Balaki waakhoonya tsikhaafu ni kamasheese, waabiwaanayo nga tsisaayilo, waakaanisakho tsinyama tsitsiindi isi Balaamu atweela ni baaraangilisi beesi aaba ni nabo.

⁴¹Kumutikhinyi kukweelakho, Balaki waayila Balaamu mu shiriimba Bamosi Bayaali. Ibweene iyo nga Balaamu anyala khubonakho batweela khu baandu ba Isiraeli.