Read lumasaaba Khuubala 23 Bible Online

Khuubala 23 - lumasaaba bible

Khuubala 23

¹Balaamu waalomela Balaki ari, “N'untsombekhele ano bibyeeso musaafu, lwanyuma ureere tsiwuunwa musaafu ni kamamiiku musaafu nako.”

²Aryo Balaki waakhola nga Balaamu n'amulomela, lwanyuma boombi baawaanayo tsisaayilo, nga khu buli sheeso bawaanilakho iwuunwa ndweela ni limiiku litweela.

³Lwanyuma Balaamu waamulomela ari, “Iwe rama nga weemikhilekho ano aambi ni biwaanwa byoosi, ise aliwo isi indi khuutsyakho senyene. Ibweene iyo manya Umukasya kane ambonekhele. Nga waambonekheele, ise kane ingobole ikhuboolele byoosi byeesi kane abe waambooleele.” Aryo waakyeenda waatsya waaniina khu khakiingi khu ngaaki.

⁴Ibweene iyo, Umukasya waabonekhela Balaamu. Kila Balaamu amuloma ari, “Nombakhileyo bibyeeso musaafu, ni khu buli shisheeso, naawaaniilekho iwuunwa ndweela ni limiiku litweela.”

⁵Abweene awo, Umukasya waawa Balaamu buurume bwe khuukanikha, lwanyuma waamulomela khukhwiilayo isi Balaki.

⁶Nga weelileyo, waanyoola Balaki atweela ni baaraangilisi babaandi be mu Mowabu, beemikhile aambi ni biwaanwa bye khukhwoosha.

⁷Balaamu wenyusa likono waaloma ari, “Balaki umuyiinga wa Mowabu waandeerire ise ano, khukhwaama mu njiinji tsa Siriya, ari niitse intsube Yakobo inganikhe bilomo bye khuutsuba khu Isiraeli!

⁸Ne ise inyala ndyeena khuutsuba uyo isi Wele akhaatsuba ta? Namwe inganikha ndyeena bye khuutsuba khuuyo isi Umukasya akhaatsuba ta?

⁹Khukhwaama khu ngaaki khwe tsinjiinji, imbabona buulayi busa, nga ndi khu njiinji, imbalolelela buulayi naabi, Lili linaambo lilimenya lyonyene busa, Nibo bali babaandu babawulila Wele, khufuurakho kamanaambo kakaandi!

¹⁰Babetsukhulu ba Yakobo bali busa nga lifukhuulu buukali; Bali baakali naabi mbaawo unyala khuubabala ta. Khayo ise ifwe khuufwa khwe bakhosefu ba Wele; Khayo intsakamo yase ibe iye lukoosi!”

¹¹Kila Balaki waalomela Balaamu ari, “Iwe ndi waakhola ise shiina shino? Ise ikhuloombile ndi wiitse untsubile baasiku baase. Ne ari bona sheesi waama khukhola, waabaweele busa tsikhabi!”

¹²Naye Balaamu waamwiilamo ari, “Ise mbaawo shishiindu shiindi sheesi inyala naaloma ta, khuurusakho khuukanikha isho sheesi Umukasya aba waandakiile khuukanikha.”

¹³Lwanyuma ndi kila Balaki alomela Balaamu ari, “Yiitsa khutsye mu shifwo shishiindi. Mu sheene isho, kane ubonekho bakyeekhe bari khu nibo, nio unyalise khuubaantsubila buulayi.”

¹⁴Aryo kila ayila Balaamu mu mukuunda kwa Zofimu, kukuuli khu ngaaki khu lukiingi Pisiga. Ibweeneyo ndi wombekhayo bibyeeso musaafu, khweesi aawaanilakho tsisaayilo, nga khu buli sheeso iwuunwa ndweela ni limiiku litweela.

¹⁵Balaamu ndi waalomela Balaki ari, “Yiimikha ano aambi ni tsisaayilo tsintsoshe. Khayo intsye iyo senyene, khukhwakaanana ni Wele.”

¹⁶Nga Balaamu ali ibweene iyo, Umukasya waamubonekhela, waamuwa buurume bubuundi, lwanyuma waamuloma khuukobolayo isi Balaki.

¹⁷Aryo Balaamu waakobola, waanyoola Balaki nga ashiimikha aambi ni tsisaayilo tsintsoshe, atweela ni baaraangilisi babaandi be mu Mowabu. Kila Balaki amureeba ari, “Shiina sheesi Umukasya aama khukanikha?”

¹⁸Balaamu waamwiilamwo buŋoosi buno: “Yinyukha, urekereese byeesi ntsya khuloma, iwe Balaki umusooleli wa Zipori,

¹⁹Wele s'ali nga babaandu unyala waawombesa ta, namwe niye s'ali umuundu busa unyala waashuusakho bibyambaaso byeewe ta. Niye buli sheesi asuubisa shoosi, ashikhola, na buli sheesi aloma shoosi, ashoolelesa.

²⁰Ise naafunile shiilakilo khukhwaama isi Wele khuuwa tsikhabi, Niye umweene nga waamalile khaale khuuwa tsikhabi, ise mbaawo sheesi inyala naakhola khuushishuusamwo ta.

²¹Niye waakhubonakho bukosi bwoosi mu Yakobo uyo ta, namwe buubi bwoosi mu buulamu bwa Isiraeli bwe buraangisi ta. Umukasya Wele umweene ali ni nabo; Babeene bamulaangilila bari niye ali umuyiinga waabwe.

²²Wele niye uwabareera khukhwaama i Misiri; Bali ni kamaani nga ke iyeeyi iye mwirome.

²³Mbaawo bye bulakusi bibinyala byareerebwa, namwe bye bulosi bibinyala byakanikhibwa khu Isiraeli ta; Shitweela sheesi babaandu banyala baloma shili ndi, ‘Ni mubone sheesi Wele akholile!’

²⁴Ari babaandu ba Isiraeli bano bali busa nga italanyi iye kamaani: Ikhanyala yaawola khuurusakho nga yaamalile khuuluma sheesi ili khuyiima, khuurusakho nga yaamalile khuunuuna kamafuki ke shisolo shayo!”

²⁵Lwanyuma kila Balaki alomela Balaamu ari, “Iwe siinga uba nga s'uli khuutsya khubatsuba ta, ni khuubawa tsikhabi, ukhabawa ta!”

²⁶Balaamu naye welamwo ari, “Ise sikhubooleele ndi, mbaawo shishiindu shoosi sheesi inyala naloma ta, khurusakho sheesi Wele umweene anaba nga waanomeele khuukanikha?”

²⁷Balaki ndi waalomela Balaamu ari “Yiitsa khutsye khukhakekho shiifwo shishiindi. Manya ibweene iyo, Wele kane akhufukiilile untsubile babaandu ba Isiraeli bano.”

²⁸Aryo waayila Balaamu khu ngaaki khwe lukiingi Peyori lululoleleele kumubiimbi.

²⁹Balaamu ndi waamulomela ari, “Yoombekha ano bibyeeso musaafu, lwanyuma undereere tsiwuunwa musaafu, ni kamamiiku nako musaafu.”

³⁰Aryo Balaki waakhola nga Balaamu n'amulomela, wahaanayo iwuunwa ndweela ni limiiku litweela khu buli sheeso.