Read lumasaaba Khuubala 24 Bible Online

Khuubala 24 - lumasaaba bible

Khuubala 24

¹Ari Balaamu aaba waashimanyiile ilala ari Umukasya aamukanisa niye khuuwa babaandu ba Isiraeli tsikhabi. Nashiryo waalekha khuutsya luundi khuwentselesa bye khuuloma ta, nga n'akhola kimiluundi kikyanyoowa ta. Khu luno, emikha busa waalosa tsimoni tseewe khu lubeka lwe kumubiimbi,

²waabona babaandu ba Isiraeli nga bebuusile mu tsikaambi tsaabwe, shikuuka khu shikuuka. Umwoyo wa Wele waamwiikhakho,

³waakanikha bilomo bino bye buŋoosi ari, “Buŋoosi bwase, ise Balaamu umusooleli wa Beyori, bilomo by'omusaani ubona buulayi naabi.

⁴Buŋoosi buno bwiitsa isi ise nga bwaama isi Wele. Nga naawunguusile tsimoni tsase mu marooro nabona Wele umunyali wa byoosi, nga naakwiile aasi, naluundi nga naafunyikhiliile tsimoni tsase:

⁵O baandu ba Isiraeli, nga kamasari keenywe kabonekha buulayi!

⁶Nga tsimbibilo tse kamasheendu tsitsiili mu nyilili, nga tsinimilo tsitsiili khu ndulo khwe luluutsi. Inywe muli busa kimisaala kimileeyi kyeesi Umukasya umweene aabyaala, nga kimisaala kya kedali kikitsowa aambi ni kameetsi.

⁷Mulifuna kameetsi ke fula kamakali, mulibalaaha mufwaane nga kuusaala kukuuli aambi ni kameetsi. Umuyiinga weenywe akhaabe uwe kamaani naabi khufuurakho umuyiinga Agaga ni buyiinga bweewe bulibalaaha naabi.

⁸Wele aabaraangilila wabarusa khukhwaama mu shibala she Misiri; Umweene abasoolanila wafwaana nga iyeeyi iye mwirome. Kane muwule baasiku beenywe boosi, mufuniaakake kamakuumba kaabwe mu bipatu busa, nga mubawunaka ni bufumo bwe buyiingo.

⁹Inywe mukona aasi mwebuula nga italanyi, nga yaakonile aasi, mbaawo umuundu unyala waakinyusawo ta. Umuundu yeesi ubawa inywe tsikhabi, kane aweebwe tsikhabi; Ne umuundu yeesi ukane abatsube, naye kane atsubibwe.”

¹⁰Ne Balaki n'awulila bino, lirima lyaamuniina naabi, waakhupa mukhono, kila alomela Balaamu ari, “Ise nakhulaangile ndi wiitse untsubile baasiku baase bano, ne mu miluundi kitaru kino, iwe waabaweele busa tsikhabi.

¹¹Ari yinyukha uyubekho wiileyo khaangu ingo woowo. Ise nakhusuubisile ndi kane ikhusasule buulayi busa, ne ari khukhwaama nga Umukasya n'akhukhaangile khuukhola sheesi ingana, siinakhusasula ta.”

¹²Balaamu waamwiilamwo ari, “Ise nabooleele baarume boowo beesi wandumanayo indi

¹³abe Balaki akhaamba ise intsu yeewe nga yitsuulemo ifeetsa, namwe zaabu, sinyala naminyaalila Umukasya, nakhola shishiindu shoosi mu makyesi kaase busa ta. Sheesi Umukasya aloma nisho sheesi kane ikhole.”

¹⁴Balaamu waalooselakho ari, “Ari bona ise ndi khukhwiilayo ingo isi babaandu baase, ne indi khuukhulekhela khuureewula khu byeesi babaandu ba Isiraeli bali khuutsya khukhola khu baandu boowo mu biseela bibiitsa iburaangisi.”

¹⁵Lwanyuma kila aloma buŋoosi ari: “Buŋoosi bwase, ise Balaamu umusooleli wa Beyori, bilomo by'omusaani ubona buulayi naabi.

¹⁶Buŋoosi buno bwiitsa isi ise nga bwaama isi Wele. Nga nawunguusile tsimoni tsase mu marooro nabona Wele umunyali wa byoosi, nga naakwiile aasi, naluundi nga nafunyikhiliile tsimoni tsase:

¹⁷Indi khuubona linaambo lya Isiraeli, ne indibonela mu biseela bye buraangisi, byeesi indimanyilekho bishiili khwoolelela ari ta. Lutweela umuyiinga aliitsawo khukhwaama mu Isiraeli, Umweene uyo alibonekha nga inieniesi. Alirura nga imiimbo, alikhupa ahese baaraangilisi ba Mowabu, amilyaangulake babaandu ba Seezi.

¹⁸Alikhupa awule babaandu ba Edomu, ayile liiswa lyaabwe. Babaandu ba Isiraeli baliloosela busa khuuba babafuura.

¹⁹Khubirira mu linaambo lya Isiraeli, bunyala bulibonekha ni babaandu babaaramawo be mu biriimba balihelela ilala.”

²⁰Lwanyuma ndi Balaamu waaloolelela, waabona babaandu ba Amaleki, nabo waabakanikhakho buŋoosi buno: “Linaambo lya Amaleki lili likhulu naabi mu manaambo koosi, Ne khu ntsakamo, litsya khuhelela ilala.”

²¹Indi mu khubonekhelwa khweewe, waabona linaambo lye ba Keni, nabo wabakanikhakho buŋoosi buno: “Bambaasa bari shiifwo sheesi bamenyamwo shilimwo lukoosi, Shafwaana nga shiiswi shishili khu lwaanda;

²²Bano boosi batsya khuhela, Nga ba Asiriya beetsile baabayilile nga baabowe.”

²³Balaamu waalooselakho buŋoosi buno ari: “Ne naanu ulinyalisa khuuwonakho Nga Wele waarakikhile bye khuuhesa khuno?

²⁴Tsimeeri tsilyaama mu Sayipuraasi, Nga tsireera babaandu babaalibwakala Asiriya ni Eberi. Ne lwanyuma lwa byoosi, Sayipuraasi shisheene nasho shilihela.”

²⁵Lwanyuma lwe khuumala khuukanikha bino byoosi, Balaamu wenyukha weelayo ingo weewe, ni Balaki naye waatsya iweewe.