Read lumasaaba Khuubala 26 Bible Online

Khuubala 26 - lumasaaba bible

Khuubala 26

¹Lwanyuma lwa kitsali uwahesa babaandu khukhwaakama, Umukasya waalomela Musa ni isi Eliyazaari ari,

²“Ingana ubale babaandu ba Isiraeli, umanye bali beenga khukhwaama mu buli muungo. Ruunga luruungo lwe basaani khukhwaamila khu miiko kamakhumi kabili khuuniina angaaki, babanyala khukhwitubaasa khu liiye khuutsya mu busoolo khuusoolana.”

³Khu mbuka yino abe babaandu ba Isiraeli bebuusile mu kaambi tsaabwe khu ngoongo tsa Mowaabu, shanjelekha wa Yorudaani. Musa ni Eliyazaari babalomela

⁴khukhola sheesi Umukasya aabalomela, khuubala babaandu baboolesa kimiiko kamakhumi kabili ni khuuniina angaaki. Babaandu ba Isiraeli babeetsa khukhwaama mu Misiri, baaba nibo bano:

⁵Be shikuuka sha Rewubeni, uwaba umusooleli umukhulu uwa Yakobo, bukuuka bufwiiti bwaba nibwo Hanoku, Palu,

⁶Hezironi, ni Karimi.

⁷Boosi atweela boola kimikaanda kine, bikana bitaru, bitoondo musaafu, ni kamakhumi kataru (43,730).

⁸Be muunda ya Palu, yaba Eliyabu

⁹ni basooleli ba Eliyabu baaba nibo Nemuweli, Dasani ni Abiramu. Baabili bano Dasani ni Abiramu nibo abe beesi babaandu baarobora, neendi nibo babaaloondelela Kora, baakhaandisanisa Musa, ni Aroni atweela n'Umukasya.

¹⁰Babeene bano nibo beesi Umukasya ekulila liloba lyaasama lyaamila, baafwiila atweela ni Kora, ni baloondeleli beewe boosi. Ni khu mbuka nyene niyo ndweela, kumulilo kweetsa kwaahesa babaandu bitoondo bibili ni kamakhumi karaano (250), nibo bekyela she khuureewula isi babaandu.

¹¹Ne basooleli ba Kora nibo sibaahela ta.

¹²Be mu shikuuka sha Simeoni, baaba mu bukuuka bukyeekhe nga buno: Kha Nemuweli, Yamini, Yakini,

¹³Zera, ni Shawulu.

¹⁴Bukuuka buno bwoolamwo babaandu kimikaanda kibili, bikana bibili, ni bitoondo bibili (22,200).

¹⁵Be mu shikuuka sha Gadi, baaba mu bukuuka bukyeekhe nga buno: Kha Zefoni, Hagi, Shuni,

¹⁶Ozuni, Eri,

¹⁷Arodi, ni Areli.

¹⁸Bukuuka buno bwoolamwo babaandu kimikaanda kine, ni bitoondo biraano (40,500).

¹⁹Basooleli ba Yuda nga nibo Eri ni Onani, baafwiila mu shibala sha Kanaani.

²⁰Be mu shikuuka sha Yuda babaaramawo, baaba mu bukuuka bukyeekhe nga nibwo: Kha Shela, kha Perezi, ni kha Zera.

²¹Khakuuka kha Perezi khaabamwo ba Hezironi, ni ba Hamuli.

²²Buno nibwo bukuuka bwe shikuuka sha Yuda, nga babaandu boosi atweela boola kimikaanda musaafu, bikana bisesaba ni bitoondo biraano (76,500).

²³Be mu shikuuka sha Isakaari, baaba mu bukuuka bukyeekhe nga buno: Kha Tola, Puwa,

²⁴Yashubu, ni Shimuroni.

²⁵Bukuuka buno bwoosi bwoola babaandu kimikaanda kisesaba, bikana bine, ni bitoondo bitaru (64,300).

²⁶Be mu shikuuka sha Zebuluuni, baaba mu bukuuka bukyeekhe nga buno: kha Seredi, Eloni, ni Yahileeli.

²⁷Bukuuka buno bwoosi bwoola babaandu kimikaanda kisesaba ni bitoondo biraano (60,500).

²⁸Bikuuka bya Yusufu byaba bibili, lwekhuuba niye aaba paapa we basooleli babili nga nibo Manase ni Efurayimu.

²⁹Be mu shikuuka sha Manase baaba mu bukuuka buno: Kha Makiri, Makiri yuno nga niye uwaba paapa wa Gileyadi. Ni Gileyadi waamamwo lisaaye lino:

³⁰Bukuuka bwaba Iyezeri, Heleki,

³¹Asiriyeli, Shekemu,

³²Shemida, ni Heferi.

³³Zelofehadi umusooleli wa Heferi s'asaalakho babaana besiinde ta, ne aafuna bakhaana bonyene. Ni kamasiina kaabwe baaba Mahila, Nowa, Hogula, Milika, ni Tiruza.

³⁴Bukuuka bwe mu Manase buno bwoolamwo babaandu kimikaanda kiraano, bikana bibili ni bitoondo musaafu (52,700).

³⁵Be mu shikuuka sha Efurayimu baaba mu bukuuka buno: Kha Shusela, Bekyeri, ni Tahani.

³⁶Be khakuuka kha Erani, baasaalikhana khukhwaama mu Shusela.

³⁷Bukuuka bukyeekhe bwa Efurayimu buno bwoolamwo babaandu kimikaanda kitaru, bikana bibili, ni bitoondo biraano (32,500). Bukuuka buno nibwo bubwarubukha khukhwaama mu Yusufu.

³⁸Be mu shikuuka sha Benyamini baaba mu bukuuka bukyeekhe nga buno: Kha Bela, Ashibeli, Ahiramu,

³⁹kha Shefufamu, ni kha Hufamu.

⁴⁰Be bukuuka bukyeekhe bwa Aridi ni Naamani, baasaalikhana khukhwaama mu Bela.

⁴¹Be bukuuka bwa Benyamini buno boola babaandu kimikaanda kine, bikana biraano, ni bitoondo bisesaba (45,600).

⁴²Be mu shikuuka sha Dani baaba khakuuka khakyeekhe kha Shuhamu,

⁴³Nga boosi atweela boola kimikaanda kisesaba, bikana bine, ni bitoondo bine (64,400).

⁴⁴Be mu shikuuka sha Asheri, baaba mu bukuuka bukyeekhe nga buno: Kha Imuna, Ishivi, ni Beriya.

⁴⁵Be bukuuka bukyeekhe bwa Heberi ni Malikiyeli baasaalikhana khukhwaama mu Beriya.

⁴⁶Asheri aasaala umwaana umukhaana isi baalaanga bari Sera.

⁴⁷Bukuuka buno bwoosi atweela bwoolamwo babaandu kimikaanda kiraano, bikana bitaru, ni bitoondo bine (53,400).

⁴⁸Be shikuuka sha Nafutaali baaba mu bukuuka bukyeekhe buno: Kha Yahizeeli, Guni,

⁴⁹Yezeri, ni kha Shilemu.

⁵⁰Bukuuka bukyeekhe buno bwoosi bwoolamwo babaandu kimikaanda kine, bikana biraano, ni bitoondo bine (45,400).

⁵¹Babaandu boosi basaani ba Isiraeli beesi baabala boola kimyeeka kisesaba, shikana shitweela, bitoondo musaafu, ni kamakhumi kataru (601, 730).

⁵²Umukasya ndi waalomela Musa ari,

⁵³“Kabananisamwo liiswa lya Kanaani mu bikuuka bino, nga usiintsiila khu bukali bwe babaandu babaali mu buli shikuuka.

⁵⁴Shikuuka shishiilimwo babaandu baakali khufuurakho, ushiwa liiswa liikali, ni shikuuka shifwiiti khufuurakho, nasho ushiwa liiswa likyeekhekho. Nashiryo buli shikuuka kane shiweebwe liiswa khusiintsiila khu bukali bwe babaandu babaashililmwo.

⁵⁵Ne liiswa ilyo kane ulikabananisemo nga ukhupa khakokha, usiintsiila khu masiina ke baakuuka ba buli shikuuka.

⁵⁶Umanye uri liiswa lili ni khuukabananisibwamwo nga ukhupa khaakokha, khuusiintsiila khu bukali namwe bukyeekhe bwe shikuuka.”

⁵⁷Be shikuuka sha Levi baaba mu bukuuka bukyeekhe buno: Kha Gerishoni, Kohasi, ni Merari.

⁵⁸Mu shikuuka sha Levi shino mwabamwo bukuuka bubuundi nga buno: Kha Libuni, Heburoni, Mahili, Mushi, ni kha Kora. Umu Levi Kohasi niye uwaba paapa wa Amuramu.

⁵⁹Lisiina ly'omukhasi wa Amuramu aba bari Yokebedi, umukhaana wa Levi, uwasaalibwila mu Misiri. Yokebedi yuno ni Amuramu baasaala basooleli babili, Aroni ni Musa, atweela n'umukhaana mutweela isi baalaanga bari Miryamu.

⁶⁰Aroni aasaala basooleli bane nga nibo Nadabu, Abihu, Eliyazaari, ni Isamari.

⁶¹Ne Nadabu ni Abihu baafwa nga baawaanayo kumulilo kukukhaaba kumukhosefu isi Umukasya ta.

⁶²Ba Levi be seetsa beesi baabala babaaba nga boolesa kumweesi mutweela ni khuuniina angaaki, boola buukali kimikaanda kibili ni bikana bitaru (23,000). Bano nibo baababala khulwayo busa, nga sibabatubaasa mu ba Isiraeli babaaramile ta, lwekhuuba nibo sibaabakho ni kumukabo kwe liiswa mu Kanaani nga ba Isiraeli babaandi ta.

⁶³Babaandu ba Isiraeli bano nibo beesi Musa n'umusaayi Eliyazaari baabala, nga bashiili khu musaalela kwa Mowaabu, shanjelekha we luluutsi Yorudaani, nga ushiili khwaambukha i Yeriko ta.

⁶⁴Ne mu baandu bano, simwabamwo n'umuundu na mutweela uwaba ashiili mulamu, khu baandu beesi Musa ni Aroni baanyoowa khuubalila mu mubiimbi kwa Sinaayi ta.

⁶⁵Lwekhuuba abe Umukasya waamala khaale khuuloma ari boosi balifwa, bahelele mu mubiimbi, khurusakho Kalebu, umusooleli wa Yefune, ni Yoswa, umusooleli wa Nuni bonyene.