Read lumasaaba Khuubala 29 Bible Online

Khuubala 29 - lumasaaba bible

Khuubala 29

¹Khu shifukhu shishinyoowa she kumweesi kwe kumusaafu, muli ni khuubuusana atweela lwe khukhwisaaya, mulekhe khukholakho kumulimo kwoosi ta. Khu shifukhu khweene ikhwo, muli ni khukhwikhoya nga mufuura tsikhoombi.

²Muli ni khuureera khu sheeso sh'Omukasya, shiwaanwa she khukhwoosha she wuunwa isooleli ndweela, limiiku litweela, ni kamasheese kamasooleli ke kumwiiko mutweela kwe buukhulu musaafu, nga byoosi mbaawo shishiilikho buuleme bwoosi ta. Bino byoosi muli ni khuubyoosha nga isaayilo intsoshe iyintsikhoyesa.

³Muwaaneyo shiwaanwa she buufu buunose naabi tsikilo tsitaru, nga bwaatubaasibwilemo ni kamafura ke kuusaala ku olivu, khuutsiila atweela ni saayilo iye wuunwa, khuuba nga shiwaanwa she biilime. Ni buufu bweene tsikilo tsibili khuutsiila atweela ni saayilo iye limiiku,

⁴ni kilo ndweela iye buufu buunose naabi, nga bwaatubaasibwilemo ni kamafura ke kuusaala ku olivu, bwaakha khuuwaanibwayo khuutsiila atweela ni lisheese lisooleli litweela.

⁵Mwaakha ni khuuwaanayo ni ndurume ndweela, shiwaanwa lwe khusiinga bibyoonako bye babaandu.

⁶Muli ni khuuwaanayo biwaanwa bino, nga mubiloosela khu biwaanwa bibiwaanibwayo bibyooshe bya busheele, bye shifukhu shishinyoowa mu mweesi, bye biilime bibyoomu, ni bye viini. Lisuusi lilikane liniine mu ngaaki khukhwaama khu biwaanwa bino liwunye buulayi khukhuuntsikhoyesa ise.

⁷Khu shifukhu she likhumi she kumweesi kwe kumusaafu, muli ni khuubuusana atweela lwe khukhwisaaya. Khu shifukhu khweene ikhwo, mwaakha khukhwiitaambisa kimibili kyeenywe nga simulyakho shishiindu shoosi ta, naluundi mukhakholakho kumulimo kwoosi ta.

⁸Naluundi muli ni khuuwaanayo shiwaanwa shishooshe isi Umukasya, nga mureera khu sheeso sheewe iwuunwa isooleli ndweela, limiiku lilyahaangalila ilala litweela, ni kamasheese kamasooleli musaafu, kakoolesa kumwiiko mutweela buukhulu. Ne nga khu bino byoosi, ikhabawo na shitweela shishiilikho buuleme bwoosi ta.

⁹Muwaaneyo ni tsikilo tsitaru tse buufu buunose naabi, nga bwatubaasibwilemo ni kamafura ke kuusaala ku olivu, khuutsiila atweela ni shiwaanwa she wuunwa, khuuba nga nasho shiwaanwa she biilime bibyoomu. Tsikilo tsibili tse buufu bweene nga bwatubaasibwilemu ni kamafura ke ku olivu, khuutsiila atweela ni shiwaanwa she limiiku,

¹⁰ni kilo ndweela iye buufu bweene, nga bwatubaasibwilemu ni kamafura ke ku olivu, khuutsila atweela ni shiwaanwa sha buli lisheese lisooleli litweela lye kumwiiko mutweela.

¹¹Muwaaneyo ni ndurume ndweela khuuba shiwaanwa she khuusiinga bibyoonako bye babaandu. Indurume yino ili ni khuuwaanibwayo nga itsiila atweela ni shiwaanwa she khuuloomba khukhwiiyakhila bibyoonako sha busheele, ni biwaanwa bibiindi bya busheele, nga bye biilime bibyoomu, ni bye viini.

¹²Khukhwaamila khu shifukhu she likhumi na biraano, she kumweesi kwe kumusaafu, muli ni khuubuusana atweela lwe khukhwisaaya. Mu khubuusana khuno, mwaakha khuuba ni kamayiiya ke kamasari, lwe khukhuushebulila ise, khuumala biifukhu musaafu bibuufu.

¹³Khu shifukhu shishinyoowa khu nibyo, muli ni khuuwaanayo shiwaanwa she khukhwoosha isi Umukasya, khuuba nga isilikakha iwunya buulayi. Muli ni khuureera khu sheeso sh'Omukasya tsiwuunwa tsisooleli likhumi na tsitaru, kamamiiku kamakhulu kabili, ni kamasheese kamasooleli likhumi na kane, kakoolesa kumwiiko mutweela buukhulu. Bisolo bino byoosi nga sibilikho ni buuleme bwoosi ta.

¹⁴Muwaaneyo ni tsikilo tsitaru tse buufu buunose naabi, nga bwatubaasibwilemo ni kamafura ke kuusaala ku olivu, khuutsiila atweela ni shiwaanwa she wuunwa ndweela, khuuba nga nasho shiwaanwa she biilime bibyoomu. Tsikilo tsibili tse buufu bweene, nga bwatubaasibwilemo kamafura ke ku olivu, khuutsiila atweela ni shiwaanwa sha buli limiiku litweela,

¹⁵ni kilo ndweela iye buufu ubwo nga bwatubaasibwilemo ni kamafura ke ku olivu, khuutsila atweela ni shiwaanwa sha buli lisheese lisooleli litweela lye kumwiiko mutweela.

¹⁶Muli ni khuuwaanayo indurume ndweela khuuba nga isaayilo iye bibyoonako, nga itsiila atweela ni biwaanwa bibyooshe bya busheele, ni biwaanwa bye biilime bibyoomu, ni shiwaanwa she viini.

¹⁷Khu shifukhu shishikhola khabili, muli khuwaanayo tsiwuunwa likhumi na tsibili, kamamiiku kabili, kamasheese kamasooleli ke kumwiiko mutweela kwe buukhulu likhumi na kane. Ne bisolo bino sibili ni khuubakho buuleme bwoosi ta.

¹⁸Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

²⁰Khu shifukhu she khataru, muli ni khuuwaanayo tsiwuunwa likhumi na ndweela, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta.

²¹Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

²³Khu shifukhu she khaane, muli ni khuuwaanayo tsiwuunwa likhumi, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta.

²⁴Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

²⁶Khu shifukhu she kharaano, muli ni khuuwaanayo tsiwuunwa syeenda, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta.

²⁷Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

²⁹Khu shifukhu she khasesaba, muli ni khuuwaanayo tsiwuunwa shinaane, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta.

³⁰Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

³²Khu shifukhu she kumusaafu, muli ni khuuwaanayo tsiwuunwa musaafu, kamamiiku kabili, ni kamasheese kamasooleli ke kumwiiko mutweela kwe buukhulu, likhumi na kane. Ne bisolo bino sibili ni khuubakho ni buuleme bwoosi ta.

³³Biwaanwa bino byoosi, muli ni khuubiwaanilakho biwaanwa bibiindi bibiitsiilakho, nga ni shikanibwa khu shifukhu shishinyoowa.

³⁵Khu shifukhu she shinaane, muli ni khuubuusana luundi lwe khukhwisaaya, mulekhe khukholakho kumulimo kwoosi ta.

³⁶Muli ni khuureera khu sheeso sh'Omukasya, shiwaanwa she khukhwoosha she wuunwa isooleli ndweela, limiiku litweela, ni kamasheese kamasooleli ke kumwiiko mutweela kwe buukhulu musaafu, nga byoosi mbaawo shishiilikho buuleme bwoosi ta. Bino byoosi muli ni khuubyoosha nga isaayilo intsoshe iyintsikhoyesa.

³⁷Muli ni khuuwaanayo shiwaanwa she biilime bibyoomu shishaakhila, ni shiwaanwa she viini, khuutsiila atweela ni shiwaanwa sha buli shisolo, nga shiilakilo ni shiloma.

³⁸Muli ni khuuwaanayo indurume ndweela khuuba nga isaayilo iye bibyoonako, nga itsiila atweela ni biwaanwa bibyooshe bya busheele, ni biwaanwa bye biilime bibyoomu, ni shiwaanwa she viini.

³⁹Biwaanwa bino kane mubiwaanatsakeyo isi Umukasya khu mbuka inyene iyareebwawo iye kamayiiya, khukhwiisaaya, atweela ni khuuwaana biwaanwa bya buli saambo, byeesi muli ni khuuwaanayo, nga mwabeene mwikanisa, namwe khuuwaanayo lwe bisuubiso byeesi mukhola.

⁴⁰Aryo Musa waaboolela babaandu ba Isiraeli biilomo byoosi byeesi Umukasya aamulomela khuubaboolela, bibiwaamba khu tsisaayilo.