Read lumasaaba Khuubala 30 Bible Online

Khuubala 30 - lumasaaba bible

Khuubala 30

¹Umukasya waalomela Musa khuuwa babaandu ba Isiraeli bilakilo bino:

²Siinga umuundu yeesi akhola shisuubiso isi Umukasya, namwe wetsuba khuubakho ni sheesi akhola, aakha khukhwoolelesa sheesi aba wasuubisile ni kumunwa kweewe.

³Namwe siinga umwaana uwe khaana uuba nga ashiimenya mu ntsu mwa paapa weewe, akhola shisuubiso shoosi,

⁴ne siinga paapa weewe awulila sheesi aba wasuubisile, ne walekha khuubakho ni shishiindu shoosi sheesi amulomayo ta, shisuubiso sheesi umwaana umukhaana uyo aba wakholile, shili ni khukhwoolelesebwa.

⁵Ne siinga paapa weewe akhaandisa shisuubiso isho khu mbuka nyene iyo, umwaana umukhaana uyo sishimwakhila khukhwoolelesa shisuubiso isho ta. Umukasya kane amwiiyakhile, lwekhuuba paapa weewe aba waakhufukiilisana ni shisuubiso isho ta.

⁶Ne siinga umwaana umukhaana uyo akyelawo waakhwaalikha, lwanyuma lwe khukhola shisuubiso, namwe khukhwitsuba ni kumunwa kweewe nga waayubakilisile,

⁷ne umuseetsa weewe waashiwulila, namwe waashimanyakho, ne walekha khuubakho ni sheesi aloma ta, namwe khuushikhaandisa ta, shisubiso isho namwe khukhwitsuba ukhwo, khuba khuli ni khukhwoolelesebwa.

⁸Ne siinga umuseetsa weewe awulila shisuubiso isho namwe shishitsubo isho, ne waashikhaandisa khu mbuka nyene iyo isi ashiwuliililekho, Umukasya kane eyakhile umukhasi uyo.

⁹Ne siinga umukhasi yeesi aba namulekhwa, namwe nga waayaawukhana n'umuseetsa weewe, niye shimwaakhilila ilala khukhwoolelesa shisuubiso ni khukhwitsuba khweesi aba waakholile.

¹⁰Ne siinga umukhasi umukhwaalikhe akhola shisuubiso, namwe wetsuba nga ali mu ntsu mw'omuseetsa weewe,

¹¹ne umuseetsa weewe waashiwulila ne ndi walekha khuubakho ni khuumukhaandisa ta, shisuubiso isho, namwe khukhwitsuba ukhwo khuba khuli ni khukhwoolelesebwa.

¹²Ne siinga umuseetsa weewe akhaandisa sheesi umukhasi asuubisile, namwe sheesi etsubile khu mbuka nyene isi ashikholeele, sishaakhila umukhasi uyo khukhwoolelesa shisuubiso isho ta, n'Umukasya kane amwiiyakhile.

¹³Aryo umuseetsa w'omukhasi uyo anyala wahangasa, namwe waakhalamwo shisuubiso shoosi namwe khukhwiitsuba khwoosi khweesi aba waakholile.

¹⁴Ne ndi siinga umuseetsa weewe alekha khuulomakho ilomo yoosi iye khukhaandisa sheesi umukhasi weewe aba waalomile khu shifukhu sheene isho, aryo aba waafukiilisanile ni shisuubiso isho, namwe khukhwitsuba ukhwo.

¹⁵Ne siinga aliindakho shifukhu shaabirawo, lwanyuma lwe khuuwulila byeesi umukhasi alomile, nio waakyelawo waakhalamwo namwe waakhaandisa shisuubiso namwe khukhwitsuba ukhwo, umuseetsa uyo kane afune shitaambiso lwe buubi bw'omukhasi weewe.

¹⁶Bino nibyo biilakilo byeesi Umukasya aawa Musa khuuwa bibiwaamba khu kholakana iliwo akari o musaani n'umukhasi weewe, namwe akari a paapa n'umwaana weewe umukhaana, ushiili khukhwaalikha ta, nga ashiili muungo mweewe.