Read lumasaaba Khuubala 31 Bible Online

Khuubala 31 - lumasaaba bible

Khuubala 31

²“Ingana iwe wiliyaase babaandu ba Midiyani ubawe shitaambiso lweesho sheesi baakhola khu baandu ba Isiraeli. Ne lwanyuma lwayo ukhaafwe.”

³Lwanyuma Musa waalomela babaandu ari, “Nimuroboreyo batweela khu basaani, baabalile bye buusoolo byaabwe, batsye bebwakale Midiyani, khuubeliyaasa nga Umukasya n'ashikana.

⁴Khukhwaama mu buli shikuuka, kane muroboreyo basaani baboola shikana shitweela (1,000) khuutsya mu busoolo.”

⁵Baryo baaroborayo basaani shikana shitweela (1,000) khukhwaama mu buli shikuuka, boolesayo baselikhale kumukaanda mutweela ni bikana bibili (12,000), babaabalila bye busoolo.

⁶Musa waabasiindikha khuutsya khuusoolana, basaani shikana shitweela khukhwaama mu buli shikuuka. Ni Finehasi umusooleli w'omusaayi Eliyazaari, aatsya ni nabo nga waasutile bibiindu biikhosefu bye lisari atweela ni tsikhoombi tse khuurewula.

⁷Baryo baatsya baasoolanisa ba Midiyani, nga Umukasya umweene n'alakila Musa, beeraka basaani boosi.

⁸Mu baandu beesi beeraka mwabamo baayiinga baraano be ba Midiyani nga nibo Evi, Rekemu, Zuri, Huri, ni Reba. Beeriramo ni Balaamu umusooleli wa Beyori.

⁹Baryo babaandu ba Isiraeli bawaambaka bakhasi be mu Midiyani, atweela ni babaana bakyeekhe beene, baayilaka ni tsikhaafu ni kamasheese kaabwe keene, atweela ni bye buyiindifu byaabwe bibiindi.

¹⁰Booshaka ni biriimba byaabwe mweesi baamenyatsaka atweela ni tsikaambi tsaabwe tseene.

¹¹Beyilila bibiindu byeesi baanuulaka byoosi, nga mulimo babaandu beesi baawaambaka atweela ni bibyaayo byeene.

¹²Lwanyuma bareera baabowe bano, atweela ni bibiindu byoosi isi Musa ni isi umusaayi Eliyazaari, nga bali atweela ni babaandu ba Isiraeli babaaramile boosi, babaaba bali mu kaambi yaabwe khu musaleela kwa Mowaabu, aambi ni Yorudaani, shanjelekha wa Yeriko.

¹³Musa n'umusaayi Eliyazaari, atweela ni baaraangilisi babaandi ba Isiraeli babaaramile, baarura ibulafu we kaambi, khuutsya khwakaanila liiye.

¹⁴Ne Musa lirima lyamuniina khulwe baakhulu be liiye babaaraangilila bikana, ni naabo babaaraangilila bitoondo, babaakobola khukhwaama mu busoolo.

¹⁵Kila Musa abareeba ari, “Lwashiina mulekhile bakhasi nga baalamu?

¹⁶Inywe simushebulila muri babeene bano nibo babaaloondelela kamakhula ka Balaamu, naluundi nibo babaakila babaandu ba Isiraeli baashuukha baarura khu Mukasya i Peyori, nisho shaakila kitsali wakhoonyaka babaandu b'Omukasya ta?

¹⁷Ari ngana mukhoonyake babaana besiinde boosi, naluundi ngana mukhoonyake bakhasi boosi babaakonakho ni basaani.

¹⁸Ne mukhakhoonyaka bakhasi babaashiili khuukonakho ni basaani ta. Munyala mwaabalekha nga baalamu, khuuba babeenywe.”

¹⁹Kila Musa eloosela khulomela baselikhale ari, “Siinga ibawo umuundu yeesi khwiinywe uwakhoonyelekho umuundu yeesi, namwe uwawaambilekho khu mulaambo kwoosi, ali ni khuurama ibulafu we lisari khuumala biifukhu musaafu. Khu shifukhu she khataru ni khu she kumusaafu, mwaakha khukhwipyeeluusa inywe mwabeene, atweela ni babaandu beesi mwawaambile.

²⁰Lwanyuma mwisiinge mwipyeeluuse buli shikwaaro shoosi, na buli shiindu shoosi shishakholebwa khukhwaama mu mahafu, namwe mu bwooya bwe mbusi, namwe shishiindu shoosi shishakholebwa khukhwaama mu kuusaala.”

²¹Umusaayi Eliyazaari weeloosela khuuboolela baselikhale babaakobola khukhwaama mu busoolo ari, “Shino nisho shishikanibwa khukhwaama mu shilakilo sheesi Umukasya aalakila Musa:

²²Izaabu yonyene, ni feetsa, ni buroonzi, ni ayoni, ni tiini, ni liidi,

²³na buli shishiindu shishiindi shoosi sheesi kumulilo kukhanyala kwoosha ta, shaakha khuubirira mu mulilo, nio shibe shikwalaafu. Ne lwanyuma shaakha khuusiingibwa ni kameetsi ke khuupyeeluusa. Ne shishiindu shishiindi shoosi sheesi kumulilo kunyala kwoosha, shaakha khuupyeeluusibwa ni kameetsi.

²⁴Ne khu shifukhu she kumusaafu, musiinga bikwaaro byeenywe, nio lwanyuma mube bakwalaafu. Nga isho shaweele, muryo nio munyalise khukhwiilayo mu kaambi.”

²⁵Umukasya waalomela Musa ari,

²⁶“Iwe wamweene n'umusaayi Eliyazaari atweela ni baaraangilisi be tsiingo babaandi, muli khuubalilila mumanye buukali bwe babaandu ni bisolo byeesi mwawaambile.

²⁷Mubikabananisemo bisiintsa bibili, akari e baselikhale babaatsya khuusoolana, ni babaandu babaaramile baabusheele.

²⁸Khukhwaama khu shisiintsa sheesi baselikhale babaasoolana mu busoolo bali ni khuuyila, khu buli bitoondo biraano bye babaandu beesi mwawaambayo, namwe tsikhaafu, namwe tsisikilya, namwe kamasheese, namwe tsimbusi, murusakho shitweelatweela, khuuwaanayo nga kumukabo isi Umukasya.

²⁹Muyile kumukabo kuno, mukuwaaneyo isi umusaayi Eliyazaari, khuuba nga shiwaanwa sha buraawa isi Umukasya.

³⁰Ne khukhwaama khu shisiintsa she bibiindu isi babaandu ba Isiraeli ba busheele, khu buli kamakhumi karaano ke babaandu beesi mwawaambayo, namwe tsikhaafu, namwe tsisikilya, namwe kamasheese, namwe tsimbusi, khu bino murusakho shitweelatweela, mubiwaaneyo isi ba Levi babaaloolelela Lisari Likhosefu ly'Omukasya.”

³¹Baryo Musa ni Eliyazaari baakhola sheesi Umukasya aabalakila khuukhola.

³²Bibiindu bibyaramakho khwiibyo byeesi baselikhale baarama nabyo byaba byoola biri: Kamasheese kimyeeka kisesaba, kimikaanda musaafu, ni bikana biraano (675,000),

³³tsikhaafu kimikaanda musaafu ni bikana bibili (72,000),

³⁴tsisikilya kimikaanda kisesaba ni shikana shitweela (61,000),

³⁵ni bakhasi abe babaakhaakonatsakakho n'umuseetsa yeesi ta, baboola kimikaanda kitaru ni bikana bibili (32,000).

³⁶Shisiintsa shitweela sheesi baselikhale babaasoolana mu busoolo shaba shiri: Kamasheese kimyeeka kitaru, kimikaanda kitaru, bikana musaafu ni bitoondo biraano (337,500),

³⁷khu tsino kumukabo kukwawaanibwayo isi Umukasya kwaba bitoondo bisesaba ni kamakhumi musaafu na tsiraano (675);

³⁸Tsikhaafu tsaba kimikaanda kitaru ni bikana bisesaba (36,000), khu tsino tsitsawaanibwayo isi Umukasya tsaba kamakhumi musaafu na tsibili (72);

³⁹Tsisikilya natso tsaba kimikaanda kitaru, ni bitoondo biraano (30,500), khu tsino tsitsawaanibwayo isi Umukasya tsaba kamakhumi kasesaba na ndweela (61),

⁴⁰ni babaandu baaba kumukaanda mutweela ni bikana bisesaba (16,000), khu bano babaawaanibwayo isi Umukasya baaba kamakhumi kataru na babili (32).

⁴¹Aryo Musa waawa umusaayi Eliyazaari kumukabo kuno, kukwaba shiwaanwa sha buraawa isi Umukasya, nga Umukasya umweene n'alakila.

⁴²Ni shisiintsa shishaweebwa babaandu ba Isiraeli, sheesi Musa aawulakho khukhwaama khu bye baselikhale babaatsya mu busoolo, shaba shiri,

⁴³shisiintsa shitweela she babaandu shaba kamasheese kimyeeka kitaru, kimikaanda kitaru, bikana musaafu ni bitoondo biraano (337,500),

⁴⁴tsikhaafu natso kimikaanda kitaru, ni bikana bisesaba (36,000);

⁴⁵Tsisikilya kimikaanda kitaru ni bitoondo biraano (30,500),

⁴⁶ni babaandu baaba kumukaanda mutweela ni bikana bisesaba (16,000).

⁴⁷Khukhwaama khu shisiintsa shitweela she bibiindu bye ba Isiraeli, ni khu baandu baabwe beesi baawaamba, Musa aatsya nga abukulakakho kamakhumi karaano, nga Umukasya n'amulakila, waabiwa ba Levi, nga nibo babaaba baloolelela Lisari Likhosefu ly'Omukasya.

⁴⁸Lwanyuma baakhulu be liiye, nga nibo babaaba baakhulu be bikana, ni baakhulu be bitoondo, baatsya isi Musa,

⁴⁹baamulomela bari, “Musakhulu, ifwe babaakaanisi boowo khwaamile khuubala baselikhale be mu liiye lyeefwe beesi khuloolelela, khwaanyoolile nga boosi baliwo.

⁵⁰Nashiryo bona khwaareerire biwaanwa isi Umukasya, byeesi buli mutweela khuusifwe khwawaamba khukhwaama khu ba Midiyani, nga nibyo bino: Bubuuma bwe zaabu, bubuuma bwe khukhwiisabikha khu makhono ni mu milo, tsintsiyi, bubuuma bwe khu maru, ni matoongo. Bino khwaabireerire nga biwaanwa bye khuusikula isi Umukasya, nio eloosele khuukhutseeta ifwe buulayi.”

⁵¹Baryo Musa n'umusaayi Eliyazaari baakaanila biwaanwa bye zaabu ibyo, bibyareerebwa nga bubuuma bwe khukhwiisabikha.

⁵²I zaabu iyo yoosi isi Musa ni Eliyazaari baakaanila khukhwaama khu baakhulu be liiye be bikana, ni bitoondo yoolesa buukali aambi tsikilo bitoondo bibili (200).

⁵³Ne buli mutweela khu baselikhale aaba nga werusiilekho khaale bibiindu bibyaba bibyeewe.

⁵⁴Musaambo iyo, Musa n'umusaayi Eliyazaari baakaanila i zaabu khukhwaama khu baakhulu be baselikhale be bikana ni be bitoondo, baabireera mu Lisari Likhosefu ly'Omukasya, khuuba nga shishebuliso isi ba Isiraeli.