Read lumasaaba Khuubala 32 Bible Online

Khuubala 32 - lumasaaba bible

Khuubala 32

¹Babaandu be mu shikuuka sha Rewubeni, ni sha Gadi, baaba bali ni bibyaayo biikali naabi. Ne ni baabona bari liiswa lya Jazeri ni Gileyadi lili lye kamaayilo kamalayi ke bibyaayo,

²baatsya isi Musa n'umusaayi Eliyazaari, ni isi baaraangilisi babaandi ba Isiraeli, babalomela bari,

³“Bisiintsa bya Atarosi, Diboni, Jazeri, Nimura, Heshiboni, Eleyale, Sebamu, Nebo, ni Bewoni,

⁴nga nibyo bisiintsa byeesi Umukasya aakhuyeeta khwaawula, bili biilayi naabi khukhwaayisilamo bibyaayo, ate nga ifwe babaakaanisi boowo khuli ni bibyaayo biikali naabi.

⁵Iwe siinga uba nga waashisiimile, n'ukhuwe ifwe liiswa lino libe lilyeefwe, khulekhe khwaambukha luluutsi luno Yorudaani ta.”

⁶Musa naye weelamo babaandu be mu shikuuka sha Gadi ni sha Rewubeni ari, “Ari inywe mukana murame ano, nga ba Isiraeli basheenywe bali khuutsya mu busoolo?

⁷Lwashiina muli khuukana khuumalamwo basheenywe kamaani ke khuukhalisa khuutsya mu shibala sheesi Umukasya abaweele?

⁸Iyo niyo isaambo nyene ndweela isi bakuuka beenywe baakhola, khu mbuka isi nabarumanila khukhwaama i Kadeshi Barineya, khuutsya khulambuula liiswa.

⁹Baakyeenda baatsya boola mwitila lya Eshikolu, baatsya baabona liiswa, lwanyuma baakobola baamalamwo babaandu ba Isiraeli babaaramile kamaani, nga babalomela bari sishinyalikha khukhwiinjila mu shibala sheesi Umukasya aabasuubisa khuubawa isho ta.

¹⁰Lwe shisheene isho, lirima ly'Omukasya lyaniinaniina khu shifukhu khweene ikhwo, wetsuba nakhwitsuba nga aloma ari,

¹¹mbaawo n'umuundu na mutweela, khuubo babaama mu Misiri, baboolesa kimiiko kamakhumi kabili ni khuuniina ngaaki, babaalitsya babone luundi benjile mu shibala sheesi aasuubisa Iburayimu, Isaaka, ni Yakobo ta. Lwekhuuba nibo sibaafukiilisa byeesi Umukasya atsya khukhola ta.

¹²Baaba boosi khurusakho Kalebu, umusooleli wa Jefune umu Keni, ni Yoswa, umusooleli wa Nuni, nibo bonyene babaloondelela Umukasya ni kumwoyo kwaabwe kwoosi.

¹³Ni lirima ly'Omukasya lyaba liikali naabi isi ba Isiraeli, shaakila Umukasya waabayila baakyeendaanila mu mubiimbi khuumala kimiiko kamakhumi kane, khukhwoolesa nga kumuboolo kwaabo babooneka kwaaweelewo.

¹⁴Ari bona nanywe mwenyukhiilemo, kumuboolo kwe baboonaki babeene nga bakuuka beenywe ni baaba, nanywe mulikho mukhola shishiindu nisho shitweela sheene, khukhwiiloosela khuukhalasa Umukasya ni khufuurisakho.

¹⁵Ne siinga mwiloosela khukhwikaana mwalekha khuuloondelela Umukasya, indi luundi kane antsukhe babaandu bano mu mubiimbi kuno. Ari ikwo kane kube musaango kweenywe!”

¹⁶Lwanyuma kila babaandu be mu shikuuka sha Rewubeni ni sha Gadi besyeenda aambi ni Musa bamulomela bari, “Ari ifwe khukana khukhwombekha kamataala ke bibyaayo byeefwe ano, khwombekhe ni biriimba bye kamatikiiyi khulwe bakyelama beefwe ni babaana beefwe.

¹⁷Ne ifwe fwabeene, kane khwiireekekhe, khwisabikhe bye busoolo, khwitubaase khu ba Isiraeli basheefwe khuutsya mu busoolo, khukhwoolesa ni kane khubonele ilala khuri nabo boolele mu shifwo shaabwe. Ne nga babaana ni baakyelama beefwe kane babe nga baaliindibwile buulayi mu mako tse kamatikiiyi.

¹⁸Ifwe singene khukobolakeyo ingo weefwe ta, khukhwoolesa nga buli muundu wa Isiraeli wekhaale watelelile mu shifwo sheewe shisheene.

¹⁹Ifwe singene khufune buusikha bwe liiswa shanjelekha wa Yorudaani ta, lwekhuuba busikha bweefwe buli khu lubeka luno lwe bwaamanyaanga wa Yorudaani.”

²⁰Kila Musa abalomela ari, “Inywe siinga muba nga mumwoomiisa sheesi mulomile, khali mwandyaabaliile bye buusoolo byeenywe, mutsya khusoolanila Umukasya.

²¹Naluundi siinga mufukiilisa mwaatsya nga mwaabaliile bye buusoolo byeenywe shanjelekha wa Yorudaani ni ba Isiraeli babaaramile boosi, khukhwoolesa nga Umukasya waamalile khuwoonamwo baasiku beenywe,

²²liryo liiswa ilyo kane libe nga lyawaambibwile. Lwanyuma lwayo nio mukobole mu liswa lyeenywe lino, nga muli balekhuule busa, nga mbaawo she khukhwiwaambilisakho isi Umukasya namwe ba Isiraeli basheenywe ta. Ni liiswa lino kane libatsake lilyeenywe.

²³Ne siinga mulekha khukhwoolelesa khusuubisa khweenywe ukhwo, kane mube nga mwoonakisile isi Umukasya, muryo muweebwe shitaambiso.

²⁴Nashiryo, nimwombekhele bakyelama beenywe atweela ni babaana beenywe biriimba, mwombakhe ni kamataala lwe kamasheese ni tsimbusi tseenywe. Ne mwaakha mubonele ilala muri mwoolelesa sheesi mwasuubisa.”

²⁵Baryo babaandu be mu shikuuka sha Gadi ni sha Rewubeni beelamwo Musa bari, “Ifwe baakulwa boowo kane khukhole nga n'ukhulakiile.

²⁶Bakyelama beefwe ni babaana beefwe atweela ni kamasheese ni tsikhaafu tseefwe kane barame ano mu biriimba bya Gileyadi.

²⁷Ne buli mutweela khwiifwe babaakaanisi boowo, babaamalile khukhwaabalila bye busoolo, kane khwambukhe khutsye khuusoolana buusoolo bw'Omukasya, nga iwe musakhulu n'ulakiile.”

²⁸Lwanyuma kila Musa awa umusaayi Eliyazaari ni Yoswa umusooleli wa Nuni biilakilo bibibawaambakho, atweela ni baaraangilisi be bikuuka bya Isiraeli byoosi.

²⁹Waabalomela ari, “Siinga babaandu be mu shikuuka sha Gadi ni sha Rewubeni, baabalila bye buusoolo byaabwe baambukha luluutsi Yorudaani khuutsya khuusoolana busoolo, nga Umukasya n'alakila, nilwe buyeeti bwaabwe ubwo, mwaawula baasiku, mweyilila liiswa ilyo, mwaakha khuubawa shisiintsa she liiswa lya Gileyadi khuuba lilyaabwe.

³⁰Ne siinga bekaana baalekha khuukhalisa luluutsi Yorudaani ni nanywe ta, bali ni khuufuna kumukabo kwaabwe mu shisiintsa sha Kanaani, nga bikuuka bibiindi byoosi ni bitsya khufuna.”

³¹Baryo basaani be mu shikuuka sha Gadi ni sha Rewubeni nabo beelamwo bari, “Ifwe khuli babaakaanisi boowo, naluundi kane khukhole shoosi sheesi Umukasya akhulomeele khuukhola.

³²Kane khwambukhe luluutsi Yorudaani, khutsye mu Kanaani, nga khwaabaliile bye buusoolo byeefwe. Ne liiswa lye buusikha bweefwe kane libe khu lubeka luno lwe bwaamanyaanga we luluutsi.”

³³Aryo Musa waakabila babaandu be mu shikuuka sha Gadi, ni sha Rewubeni, atweela shisiintsa shitweela she shikuuka sha Manase, liiswa lilyaba ly'omuyiinga Sihoni uwe ba Amori, ni lilyaba ly'omuyiinga Ogo uwa Bashani, ni khuuyililakho biriimba bibyebotokhelelawo.

³⁴Baryo babaandu be mu shikuuka sha Gadi bombekha biriimba bya Diboni, Atarosi, Aroweri,

³⁵Aturosi-Shofani, Yazeri, Yogubeha,

³⁶Besi-Nimura, ni Besi-Harani. Boombekha tsimako tse kamatikiiyi khuubibotokhelela, naluundi boombekha ni kamataala ke bibyaayo byaabwe.

³⁷Babaandu be mu shikuuka sha Rewubeni nabo boombekha biriimba bya Heshiboni, Eleyale, Kiriyasayimu,

³⁸Nebo, ni Bayaali-Mewoni (kamasiina kano baakyelawo bakashuusa), atweela ni Sibuma. Biifwo bino bibyoombekhebwa bushaakha baabityuukha kamasiina kakaandi.

³⁹Babaandu be mu khakuuka khakyeekhe kha Makiri, umusooleli wa Manase, bebwakala shisiintsa sha Gileyadi, baawaambaka biriimba byayo, baatsya baabimenyamwo, baawoonamwo ba Amori babaabimenyatsakamwo.

⁴⁰Aryo Musa waakabila babaandu ba Makiri shisiintsa sha Gileyadi, baryo nabo baamenyatsaka mubweene umwo.

⁴¹Yayiri khukhwaama mu shikuuka sha Manase waatsya webwakala naluundi wawaambaka ni bibyaalo byayo, waabityuukha lisiina ari Havosi Yayiri.[4]

⁴²Noba naye waatsya webwakala luundi wawaamba shiriimba sha Kenasi, atweela ni bibyaalo bibibotokhelelewo, waabityuukha lisiina ari Noba.