Read lumasaaba Khuubala 33 Bible Online

Khuubala 33 - lumasaaba bible

Khuubala 33

¹Eyino niyo isaambo isi babaandu ba Isiraeli beruungikhamwo mu lukyeendo lwaabwe, nga ni baalurakikha khukhwaama i Misiri, nga bali mu matuuli kaabwe, aasi e buraangilisi bwa Musa ni Aroni.

²Musa waatsya nga arona luruungo lwe biifwo byeesi baatsya nga bawolelamwo, nga Umukasya umweene n'amulakila. Eyino niyo isaambo isi lukyeendo lwarungikhibwamo khukhwaama mu bifwo byeesi baarakikhilamwo.

³Babaandu ba Isiraeli baarakikha lukyeendo khukhwaamila i Ramusesi, khu shifukhu she likhumi na biraano she kumweesi kukuunyoowa, nga nisho shishaba shifukhu shishiila khu she Khuubirakho. Baryo babaandu bano baakhuumba khurura mu Misiri, nga ba Misiri boosi baabaloleleele.

⁴Khu mbuka yino ba Misiri baaba balikho basiikhaka kimilaambo kye basooleli baabwe baakiboole, beesi Umukasya aakhoonyaka. Shino shokyesanisa shiri Umukasya wawulile ba wele be mu Misiri boosi.

⁵Baryo babaandu ba Isiraeli baarura i Ramusesi, baatsya baawolela i Sukosi.

⁶Nga baarurire i Sukosi, baatsya baara i kaambi yaabwe i Esamu, shishaba khu ndulo khwe kumubiimbi.

⁷Nga baamile i Esamu, baakobolayo inyuma i Pi-Hahirosi, shishaba i bwaamanyaanga wa Bayaali-Zefoni, baara i kaambi yaabwe i Migidolu.

⁸Barura i Pi-Hahirosi, baambukha inyaantsa Imbesemu, baatsya mu mubiimbi. Baakyeenda lukyeendo lwe biifukhu nga bitaru, boola mu mubiimbi kwa Esamu, baatsya baara i kaambi yaabwe i Mara.

⁹Khukhwaama i Mara iyo, beelooselayo baatsya baara i kaambi yaabwe i Elimu, isi baanyoola tsisebele tse kameetsi likhumi na tsibili, ni kimisaala kamasheendu kamakhumi musaafu.

¹⁰Khukhwaama i Elimu, beloosela baatsya baawolela aambi ni nyaantsa isi balaanga bari Imbesemu.

¹¹Nga baamile awo, beloosela baatsya baawolelakho mu mubiimbi kwa Sini.

¹²Nga baamile mu mubiimbi kwa Sini ikwo baatsya baawolelakho i Dofuka.

¹³Baama i Dofuka baatsya baawolela i Alushi.

¹⁴Baama i Alusi, baatsya baawolela i Refidimu, shiifwo mweesi bakhaanyoola kameetsi ke khuunywa ta.

¹⁵Nga baamile i Refidimu, baatsya baawolelakho mu mubiimbi kwa Sinaayi.

¹⁶Khukhwaama mu mubiimbi kwa Sinaayi ukwo, baatsya baawolelakho i Kiburosi Hataava.

¹⁷Nga baamile i Kiburosi Hataava, baatsya baawolela i Hazerosi.

¹⁸Khukhwaama i Hazerosi baatsya i Risima.

¹⁹Nga baamile i Risima, baatsya baawolelakho i Rimoni Perezi.

²⁰Khukhwaama i Rimoni Perezi baatsya baawolelakho i Libuna.

²¹Khukhwaama i Libuna, baatsya i Risa.

²²Nga baamile i Risa, baatsya baawolelakho i Kehelasa.

²³Khukhwaama i Kehelasa, baatsya baawolela khu lukiingi Sheferi.

²⁴Nga baarurire khu lukiingi Sheferi, baatsya baawolela i Harada.

²⁵Nga baamile i Harada, baatsya baawolelakho i Makhelosi.

²⁶Khukhwaama i Makhelosi, baatsya i Tahasi.

²⁷Nga baamile Tahasi, baatsya baawolelakho i Tera.

²⁸Nga baarurire i Tera, baatsya i Misika.

²⁹Baama i Misika, baatsya baawolelakho i Hashimona.

³⁰Khukhwaama i Hashimona, baatsya i Moserosi.

³¹Nga baamile i Moserosi, baatsya baawolelakho i Bene Yakani.

³²Khukhwaama i Bene Yakani, baatsya i Hori Hagidigadi.

³³Nga baamile i Hagidigadi, baatsya i Yotibasa.

³⁴Khukhwaama i Yotibasa, baatsya baawolelakho i Aburona.

³⁵Nga baarurire i Aburona, baatsya i Eziyoni Geberi.

³⁶Nga baamile i Eziyoni Geberi, baatsya i Kadeshi, mu mubiimbi kwa Zini.

³⁷Lwanyuma baasiimbula khukhwaama i Kadeshi, baatsya khu lukiingi Hori, luluuli khu lwaakha ni shibala sha Edomu.

³⁸Umukasya waalakila umusaayi Aroni khuuniina khu ngaaki khwe lukiingi Hori, ibweene iyo isi aafwiila, khu shifukhu shishinyoowa she kumweesi kwe kharaano, mu mwiiko kwe kamakhumi kane khukhwaama nga ba Isiraeli baarura mu shibala she Misiri.

³⁹Aroni aafwa nga oolesa kimiiko kye buukhulu shitoondo shitweela ni kamakhumi kabili na kitaru (123), khu lukiingi Hori.

⁴⁰Yaba khu mbuka yino isi umuyiinga wa Aradi, umu Kanaani, uwaba amenya mu mubiimbi kwe mwaalo wa Kanaani, aawulila bibiwaamba khu khwiitsa khwe babaandu ba Isiraeli.

⁴¹Baryo babaandu ba Isiraeli nga baarurire khu lukiingi Hori, baatsya baawolelakho i Zalumona.

⁴²Nga baamile i Zalumona baatsya i Punoni.

⁴³Khukhwaama i Punoni, baatsya baawolelakho i Obosi.

⁴⁴Nga baamile i Obosi, baatsya i Iye Abarimu, shishaba khu lwaakha ni Mowabu.

⁴⁵Nga baamile i Iye Abarimu, baatsya baawolelakho i Diboni Gadi.

⁴⁶Khukhwaama i Diboni Gadi, baatsya i Alumoni Dibulasayimu.

⁴⁷Nga baarurire i Alumoni Dibulasayimu, baatsya baawolelakho mu njiinji tsa Abarimu, aambi ni lukiingi Nebo.

⁴⁸Khukhwaama mu njiinji tsa Abarimu, baatsya baawolelakho khu musaleela kwa Mowabu, aambi ni luluutsi Yorudaani, shanjelekha wa Yeriko.

⁴⁹Ibweene iyo i kaambi yaabwe yaamalatana khu musaleela kwa Mowaabu kwoosi khukhwaamila i Besi-Yeshimosi, khuutsya khukhwoolela ilala i Abeli Shitimu.

⁵⁰Khu mbuka isi ba Isiraeli baaba nga bashiili khu musaleela kwa Mowabu, aambi ni luluutsi Yorudaani, shanjelekha wa Yeriko, Umukasya waalomela Musa

⁵¹khuuwa babaandu ba Isiraeli bilakilo bino ari, “Nga mwambukhile luluutsi Yorudaani khukhwiinjila mu Kanaani,

⁵²mwaakha khuuwonelamwo ilala babaandu abe babaamenyamwo. Mwaakhiile khukhwoonakisila ilala bifwaani byaabwe, mufuniaakake bibyeeso byaabwe byoosi.

⁵³Lwanyuma mwinjilemo, mwiyilile shibala isho, lwekhuuba ise naashibaweele inywe khuuba shisheenywe.

⁵⁴Muli ni khuukabananisamwo liiswa, nga mukhupa bukokha, khuusiintsiila khu buboofu bwe bikuuka byeenywe. Shikuuka shishiili shiboofu, kumukabo kwaabwe kwe liiswa kwaakha khuuba kumuboofu nakwo, ni isi shikuuka shikyeekhe, kumukabo kwaabwe kwe liiswa kuli ni khuuba kumukyeekhe.

⁵⁵Ne siinga mukhaasikha khuuwoonamwo babaandu babaamenyamwo, abo babaakane baramemwo, kane bekyele be busiku isi muli nga bisaala byeesi basongoole khuubawunaka mu moni tseenywe, naluundi babe nga kamakhwa khuubawunaka mu mbafu mweenywe.

⁵⁶Ni nase kane imbakhole inywe buubi naabi, nga ni narekekha khuubakhola nibo.”