Read lumasaaba Khuubala 34 Bible Online

Khuubala 34 - lumasaaba bible

Khuubala 34

¹Umukasya waalomela Musa

²khuutsya aboolele babaandu ba Isiraeli ari, “Nga mwenjiile mu shibala sha Kanaani, liiswa lyeesi intsya khuubawa inywe litsya khuubakho tsintsakha tsino:

³Lulwaakha lwe mwaalo lutsya khwaamila khu mubiimbi kwa Zini, kukuuli khu lwaakha ni Edomu. Khu lubeka lwe bwaamanyaanga, lulwaakha lweenywe lwe mwaalo, lutsya khuurakikhila ibwakamilo we Nyaantsa imboofu Dedi Si.

⁴Nio lwaame ibweene iyo, luweete lwiikhe kwe mwaalo khuuyililamo Bubiriro bwa Akurabimu, lutsye lukhalise kumubiimbi Zini, lwikhilile kwe mwaalo we shiriimba Kadeshi Barineya. Khukhwaama ibweene iyo, lutsye khukhwoola i Hazari-Adari, lwilooseleyo paka i Azimoni.

⁵Ibweene iyo luwete lubirire khwi tila lye khakheetsi khe khu lwaakha lwa Misiri, ni bwakamilo we Nyaantsa imboofu Meditereniani.

⁶“Lulwaakha lwe bukwanyaanga lukhaabe Inyaantsa imboofu Meditereniani.

⁷“Lulwaakha lwe ngaaki lukharakikhile khu Nyaantsa imboofu Meditereniani, lwiloosele paka khu Lukiingi Hori.

⁸Ni khukhwaamila khu Lukiingi Hori ilwo, lutsye i Bubiriro bwa Hamasi, lwiloosele lukhalise lwoole i Zedadi, ikane ibe bubwakamilo bwe lulwaakha.

⁹Khukhwaama i Zedadi, lwiloosele i bwaamanyaanga lwoole i Zifoni, ni bwakamilo bwalwo kane bube i Hazari Enani.

¹⁰“Lulwaakha lwe bwaamanyaanga lukhaarakikhile i Hazari Enani lutsye lwoole i Shefamu.

¹¹Khukhwaama ibweene iyo, lwikhilile kwe mwaalo paka i Ribula, shishiili ibwaamanyaanga wa Ayini. Lulwaakha luno lwiloosele khukhwiikhilila lutsye lwoole khu bikoongo bye bwaamanyaanga we nyaantsa Galilaaya[5]

¹²lwanyuma lwiikhe nga luloondelela luluutsi Yorudaani, khuutsya khwoola khu nyaantsa Dedi Si. Liryo liiswa lilikane libe akari e tsintsakha tsino, kane libe liiswa lyeenywe.”

¹³ Lwanyuma Musa waalomela babaandu ari, “Lino nilyo liiswa lyeesi kane mufune khuubirira mu khukhupa bukokha, lyeesi Umukasya aalakila khuukabila bikuuka bibiramile syeenda ni shisiintsa she shikuuka shitweela.

¹⁴Lwekhuuba shikuuka sha Rewubeni, ni shikuuka sha Gadi, atweela ni shisiintsa shitweela she shikuuka sha Manase she bwaamanyaanga, byaamala khaale khuufuna kumukabo kwaabwe kwe liiswa

¹⁵khu luwaande lwe bwaamanyaanga wa Yorudaani, shanjelekha wa Yeriko.”

¹⁶Umukasya waalomela Musa ari,

¹⁷“Umusaayi Eliyazaari ni Yoswa umusooleli wa Nuni nibo babaakane bakabananise liiswa mu ba Isiraeli boosi.

¹⁸Kane wiroborereyo umuraangilisi mutweelatweela khukhwaama mu buli shikuuka, bayeete mu khukabananisa liiswa.

¹⁹Kano niko kamasiina ke basaani beene: Kalebu umusooleli wa Yefune, khukhwaama mu shikuuka sha Yuda.

²⁰Shelumieli umusooleli wa Amihudi, khukhwaama mu shikuuka sha Simeyoni.

²¹Elidadi umusooleli wa Kisiloni, khukhwaama mu shikuuka sha Benyamini.

²²Buki umusooleli wa Yoguli, umuraangilisi khukhwaama mu shikuuka sha Dani.

²³Haniyeli umusooleli wa Efodi, umuraangilisi khukhwaama mu shikuuka sha Manase, umusooleli wa Yusufu.

²⁴Kemuweli umusooleli wa Shifutani, umuraangilisi khukhwaama mu shikuuka sha Efurayimu, naye umusooleli wa Yusufu.

²⁵Elizafani umusooleli wa Parunaki, umuraangilisi khukhwaama mu shikuuka sha Zebuluni.

²⁶Palitiyeli umusooleli wa Azani, umuraangilisi khukhwaama mu shikuuka sha Isakaari.

²⁷Ahihudi umusooleli wa Shelomi, umuraangilisi khukhwaama mu shikuuka sha Asheri

²⁸Pedaheli umusooleli wa Amihudi, umuraangilisi khukhwaama mu shikuuka sha Nafutali.”

²⁹Bano nibo basaani beesi Umukasya aalakila ari bayeete mu khuukabananisamwo liiswa lye mu shibala sha Kanaani akari mu baandu ba Isiraeli.