Read lumasaaba Khuubala 36 Bible Online

Khuubala 36 - lumasaaba bible

Khuubala 36

¹Shifukhu shitweela, baaraangilisi khukhwaama mu khakuuka khakyeekhe kha Gileyadi, umwaana wa Makiri, uwe mu shikuuka sha Manase, umwaana wa Yusufu, baatsya isi Musa ni isi baaraangilisi babaandi ba Isiraeli

²baamulomela bari, “Umukasya aakhulakila iwe khuukabila babaandu ba Isiraeli liiswa nga ukhupa bukokha. Naluundi aakhulakila khuukabila busikha bw'omulebe weefwe Zelofehadi isi bakhaana beewe.

³Ne siinga bakhaana bano batsya bakhwaalikha khu basaani babaama mu bikuuka bya Isiraeli bibiindi, buryo busikha ubwo buba bukhurusibwakho khusiifwe, bwaaba bwe shikuuka isho mweesi umukhaana aba wakhwaalikhile. Nashiryo, busikha ubwo buba sibushiili bubweefwe ta.

⁴Nashiryo siinga Kumwiiko kwe Serukho mu Isiraeli ni kulyoola, busikha ubwo bwoosi bulitubaasibwa khu shikuuka mweesi bakhaana ba Zelofehadi bakhwaalikha, shikile bibiindu ibyo byoosi bibe nga byaarusibwile khu shikuuka she baakuuka beefwe.”

⁵Aryo Musa waaboolela babaandu ba Isiraeli sheesi Umukasya aamulakila khuukanikha ari, “Isho sheesi be mu shikuuka sha Manase baloma shili shaŋali.

⁶Nashiryo Umukasya waalakiile ari bakhaana ba Zelofehadi banyala bakhwaalikha khu muundu yeesi isi basiima, ne khurusakho ndi umuundu uyo ali ni khuuba nga aama mu shikuuka sha paapa waabwe.

⁷Buusikha bw'omuundu yeesi mu Isiraeli sibwaakha bwaakhalisa khuutsya mu shikuuka shishiindi ta. Buli mutweela aakha khukhwiiwaamba khu busikha bwe bakuuka beewe babeene.

⁸Buli mukhaana yeesi uyila kumukabo kwe liiswa mu shikuuka shoosi sha Isiraeli, aakha khukhwaalikha khu musaani uwe mu shikuuka sha paapawe sheene. Musaambo yino, buli muundu wa Isiraeli yeesi anyale khuuyila busikha bwe bakuuka beewe babeene.

⁹Nashiryo mbaawo busikha bwoosi bubuuli ni khuukhalisa khukhwaama mu shikuuka shitweela khuutsya mu shikuuka shishiindi ta. Buli shikuuka shili ni khuurama nga nisho shishiliinda busikha bwasho.”

¹⁰Baryo bakhaana ba Zelofehadi baakhola nga Umukasya n'alakila Musa.

¹¹Bakhaana ba Zelofehadi bano baaba nibo Mahila, Tiruza, Hogula, Milika, ni Nowa. Baakhwaalikha khu basaani babaaba shaananyina shaabwe muunda ya paapa waabwe.

¹²Baatsya bakhwaalikhaka mu bukuuka bukyeekhe bwe mu shikuuka sha Manase, umwaana wa Yusufu. Buryo busikha bwe liiswa lya paapa waabwe bwarama mu shikuuka isho.

¹³Kano niko kamakaambila ni biilakilo byeesi Umukasya aawa Musa khuuwa babaandu ba Isiraeli, nga bashiili khu musaleela kwa Mowabu, aambi ni luluutsi Yorudaani, shanjelekha wa Yeriko.