Read lumasaaba Khuubala 6 Bible Online

Khuubala 6 - lumasaaba bible

Khuubala 6

¹Luundi ndi Umukasya waalomela Musa

²aboolele babaandu ba Isiraeli ari: Umuundu yeesi ukhalawo khukhwiwoongayo isiindi nga akhola shishitsubo she khuuba umu Naziriti,

³sishimwaakhila khuunywakho shishimeesa she viini namwe indali ta. Umu Naziriti s'akhiile khuunywakho shishiindu shoosi shisuuribwa khukhwaama mu mizabibu shoosi ta, namwe khuulyakho kimizabibu kyoosi ta.

⁴Khukhwaama nga umuundu uyo n'akhalawo khuuba umu Nazariti, akhalyakho shishiindu shoosi shishaama mu muzabibu, abe yakhaba tsimiitso, namwe shihaafu she lituunda ilyo ta.

⁵Umuundu uyo n'aba nga waakhola shitsubo she khuuba umu Nazariti, s'akhiile khuukhalakho namwe waabekakho litsuune lyeewe. Umuundu abowebwa ni shitsubo sheewe isho she khuuba umukhosefu, imbuka yoosi isi aba waayitsuba khuuba umu Naziriti w'Omukasya. Nashiryo akhiile khuuleheesa litsuune lyeewe.

⁶Imbuka yoosi isi umuundu uyo amala nga ali umu Naziriti, akhakhakakho khuutsyakho aambi ni kumulaambo kwoosi ta.

⁷Oba kumulaambo kuno kuli kwa paapa weewe, namwe kwa maayi weewe, namwe kwa wandaaye, namwe kw'omukooko weewe. N'atsyakho aambi ni nakwo, umuundu uyo aba nga wenyaalutakile mu moni ts'Omukasya.

⁸Bifukhu byoosi byeesi kane abewo nga ali mulamu, aba ali umukhosefu uwawaanibwayo isi Umukasya.

⁹Ne siinga umuundu yeesi afwa mu khaangu naabi nga ali aambi ni naye, umu Nazariti uyo aba wekyelile umunyaalu, ni nashiryo aakha khuubekakho litsuune lyeewe, ate lyaakha khuubekebwakho lwanyuma lwe biifukhu musaafu, khu mukholo kwe khukhwipyeeluusa.

¹⁰Ne khu shifukhu shishiilakho she shinaane, umu Nazariti uyo aakha khuureera kamawuusi kabili, namwe bukaburuku bubili isi umusaayi mu lisari likhosefu.

¹¹Umusaayi kane awaaneyo binywiinywi bino, khatweela akhawaaneyo nga shiwaanwa she shishoonako, ni khakhaaramile nga isaayilo intsoshe khukhuuntsikhoyesa ise. Bino byoosi abikhola nga kumukholo kwe khupyeeluusa khulw'omu Nazariti, lwekhuuba etiilakho khu mulaambo. Ni khu shifukhu sheene isho, umusaayi apyeeluuse ni kumurwe kweewe, nga litsuune ni lirakikha khuutsowa luundi.

¹²Umuundu uyo aakha khukhwiwoongayo luundi isi Umukasya, lwekhuuba kumulaambo kwaakila waaba umunyaalu. Nashiryo aakha khukhola shishitsubo shishiindi, she khukhwiwoongayo luundi nga umu Nazariti. Naluundi limiiku lilyoolesa kumwiiko mutweela, lyaakha khuuwaanibwayo khukhwiisayo bibiindu bikwalaale luundi.

¹³Aryo umu Nazariti uyo nga waamalile khuukhola bisuubiso bye khuuba umu Naziriti luundi, kane areerebwe mu lisari likhosefu,

¹⁴awaaneyo shiwaanwa she bibyaayo bitaru, bibikhalikho buuleme bwoosi ta, nga nibyo kumiiku kutweela kukwoolesa kumwiiko mutweela lwe khukhuuntsikhoyesa ise, lisheese likhasi litweela khuuba shiwaanwa lwe bibyoonako, kumiiku kutweela kukumalile khuutsowela ilala khuukuwaanayo lwe khuuloomba lukoosi.

¹⁵Umu Nazariti yuno aakha khuureera ni shishiipo she kimikaati kikikhalimwo kamamela ta, nga waareerekho ni biwaanwa bye bilime, ni kamafura ke kuusaala ku olivu nga, khulikho ni bukaati nga waatubaasilekho biwaanwa bye viini.

¹⁶Lwanyuma lwayo, umusaayi abiwaaneyo khu sheeso isi Umukasya, khuuba nga shiwaanwa she shishoonako, ni shiwaanwa shishooshe.

¹⁷Awaaneyo ni limiiku khuuba isaayilo ireera lukoosi, atweela ni shishiipo she kimikaati kikiikhalimo kamamela ta, khuutubakho ni biwaanwa bye biilime bibyoomu ni biwaanwa bye viini.

¹⁸Lwanyuma lwa bino byoosi, umu Nazariti yuno, ali ni khukhwiimikha ibwiinjililo we liisari likhosefu, abekekho litsuune lye khu murwe kweewe, ni litsuune lino alituume mu mulilo kweesi umusaayi araambisile khuuwaanayo tsisaayilo butweela.

¹⁹Lwanyuma nga inyama iye shinama she bweeni she limiiku nga shaamalile khuuteekhebwa buulayi, umusaayi ashisute, nga ayililakho ni kumukaati mutweela, ni khakaati khakyeekhe khatweela, abyaakaanise umu Nazariti, umalile khukhwipyeeluusa.

²⁰Shishiilakho, umusaayi kane abibukule abiwaaneyo khuuba nga shiwaanwa sha buraawa isi Umukasya, ulwo shibe shekyelile shiwaanwa shikhosefu isi umusaayi. Bino byoosi atweela ni inyama iye shifuba, ni shinama she takho, bili by'omusaayi nga likaambila ni liloma. Nga bino byoosi byaweele, umu Nazariti yuno aba sashiili umu Nazariti ta, ari anyala warakikha khuunywa i viini.

²¹Bino nibyo biilakilo byeesi umu Nazariti yeesi aakha khuuloondelela. Ne siinga umu Nazariti asuubisa khuuwaanayo shiwaanwa shishifuurakho awo bukali, akhiile khukhwoolelesa sheesi aba nga waalomile khuukhola.

²²Umukasya waalomela Musa

²³khuuboolela Aroni ni basooleli beewe ari, “Ni muba nga muloombela babaandu ba Isiraeli tsikhabi, kane muraambisatsake bilomo bino:

²⁴‘Inoomba ndi Umukasya abawe tsikhabi, luundi abatseete buulayi;

²⁵Umukasya abokesanise bubweela bweewe ni shiisa sheewe shikali;

²⁶Umukasya abaloolelele inywe ni buulayi bweewe, luundi abawe lukoosi.’ ”

²⁷Lwanyuma kila Umukasya aloma ari, “Siinga Aroni ni basooleli beewe baanoomba ise khuuwa babaandu ba Isiraeli tsikhabi, ise kane imbawe tsikhabi.”