Read lumasaaba Khuubala 8 Bible Online

Khuubala 8 - lumasaaba bible

Khuubala 8

¹Ari Umukasya waalomela Musa

²aboolele Aroni ari, “N'uba nga wareerewo tsitaala, urawo tsitaala musaafu khu bisiindi byatso, nio tsinyalise khuuwa buwaanga iburaangisi.”

³Aroni wafukiilila, waarawo tsitaala nga Musa n'amulomela.

⁴Shisiindi she taala shaba shaakholebwa mu zaabu isi bamalile khuukhupa ni nyoondo, khukhwaamila ilala aasi, khukhwoolela ilala khu ngaaki khu bimuli byeesi baaronakakho, nga shili musaambo inyene isi Umukasya aaba nga wabooleele Musa.

⁵Lwanyuma ndi Umukasya waalomela Musa ari,

⁶“Niwawulewo ba Levi, khuubarusa mu baandu ba Isiraeli ba busheele, lwanyuma ubapyeeluuse,

⁷ubasiinge nga uraambisa kameetsi kakaasiinga bibyoonako. Lwanyuma ubalome batsye beebekekho litsuune liliili khu mibili kyaabwe, naluundi basiinge ni bikwaaro byaabwe.

⁸“Lwanyuma bali ni khuureerayo iwuunwa inyana, ni shipimo she buufu shishaakhila, nga baatubaasilemo kamafura ke kuusaala ku olivu. Naluundi baakha khuureerayo iwuunwa iye khaabili khuuba nga shiwaanwa she bibyoonako.

⁹“Lwanyuma Musa iwe, kane ubuusanise babaandu boosi ba Isiraeli, ukyelewo ureere ba Levi, ubeemise iburaangisi we Lisari yase Likhosefu.

¹⁰Nga bali iburaangisi we lisari ilyo, babaandu boosi ba Isiraeli, beetse babarekho kamakhono kaabwe.

¹¹Aroni niye ukane awaaneyo ba Levi bano khuuba nga shiwaanwa khukhwaama mu baandu ba Isiraeli, nio banyale khuuba nga nibo babaakhola kumulimo kwase kuno.

¹²“Lwanyuma ba Levi beetse bare kamakhono kaabwe khu mirwe kye tsiwuunwa tsibili, nio lwanyuma ndweela iwaanibweyo khuuba nga shiwaanwa she shishoonako, ni iramile ndweela bakiwaaneyo nga isaayilo intsoshe, lwe khukhuuntsikhoyesa ise.

¹³Ureere ba Levi beemikhe a sheeso shase iburaangisi wa Aroni ni basooleli beewe, lwanyuma nibo bawaaneyo ba Levi, nga babawoonga isi ise.

¹⁴“Kumukholo kuno kane kwokyesanise kuri ba Levi ari bali barobole baase khukhwaama mu baandu ba Isiraeli babaaramile, bekyelile ba buraawa luundi babaase.

¹⁵Uryo nga waamalile khuupyeeluusa ni khuwoongayo ba Levi bano musaambo iyo, kane babe nga baakhila khukhola kumulimo mu Lisari Likhosefu.

¹⁶Ari baryo bekyeliile ilala babaase, belile mu shifwo abe shishaba she babaana besiinde baakiboole be ba Isiraeli. Ari bali babaase senyene.

¹⁷Khu mbuka isi nakhoonyelakho babaana besiinde baakiboole be ba Misiri, nakhalawo khukhwiwoongela bikiboole byoosi, nga babaana besiinde baakiboole be babaandu ni bye bisolo khuuba bibyase.

¹⁸Ne ari naroboole ba Levi bano khukhwiila mu shifwo she babaana besiinde baakiboole be babaandu ba Isiraeli.

¹⁹Naabawaanileyo nibo khuuba nga biwaanwa isi Aroni ni basooleli beewe, khukhwakaanisatsaka mu Lisari Likhosefu, khulwe babaandu ba Isiraeli boosi. Naluundi nibo kane babonatsake bari mbaawo bukosi bwoosi bubwoola khu ba Isiraeli, babaaba nga besyeendile aambi ni Lisari Likhosefu.”

²⁰Musaambo iyo, Musa, ni Aroni atweela ni ba Isiraeli babaaramile boosi baawoongayo ba Levi, ni khuubonela ilala bari ba Levi bakhola byoosi byeesi Umukasya aalakila Musa ari bakhole.

²¹Baryo ba Levi bepyeeluusa khukhwaama mu byoonako, nga basiinga bikwaaro byaabwe. Lwanyuma Aroni waabareera aambi ni shisheeso, waabawaanayo khuuba nga shiwaanwa sha buraawa isi Umukasya.

²²Lwanyuma lwa bino byoosi, ba Levi baatsya bakhola kumulimo kwaabwe mu Lisari Likhosefu, nga bayeetakho Aroni ni basooleli beewe, nga baloondelela byoosi byeesi Umukasya aalakila Musa.

²³Ndi luundi Umukasya waalomela Musa

²⁴bibiwaamba khu ba Levi ari, “Khukhwaamila khu miiko kabili na kiraano (25) khuuniina angaaki, buli mu Levi aakha khukhwoolelesa kumulimo kweewe mu Lisari lyase likhosefu,

²⁵ne khukhwaamila khu miiko kamakhumi karaano (50), baakha khuuwola khukhwaama mu buraambi bwaabwe.

²⁶Baryo kane babe nga bayeetakho busa ba Levi mu Lisari Likhosefu, ne nga sishibakhila nibo khuuba nga nibo babaakhola kimilimo babeene ta. Isaambo yino niyo isi uli ni khukhwoolelesamo kimilimo kino.”