Read lumasaaba Miika 1 Bible Online

Miika 1 - lumasaaba bible

Miika 1

¹Mu mbuka yeesi Yosamu, ni Ahazi, ni Hezekiya baaba nga bali bayiinga ba Yuda, Umukasya waaha Miika buurume bubuuwaamba khu Samariya ni Yerusalemu. Miika abe asaalikha mu shiriimba shishiilaangibwa shiri Moresesi.

²Inywe babaandu be kamanaambo koosi, ni murekeerese bibiindu bino; inywe mweesi babaamenya khu shibala ni mubirekeerese. Bona Umukasya Wele nga ali mu Lisaayilo lyeewe Liikhulu, alikho atsya khuwayo bujulisi mu musaango, nga bubatsuntsumilisa inywe naabi.

³Khulwekhuuba bona Umukasya alikho eetsa nga aama mu shifwo sheewe shiikhosefu. Kane eekhe eetse aasi naluundi akeendele khu ngaaki khwe tsingoongo.

⁴Kane uri akhaandaka khu ngoongo tsiyengukhe busa, nga buunini ni buyengukhila mu mulilo; tsiirurukukhe tsiikhe mu matila tsifwaane busa nga ni batsukha kameetsi khukhwiikha i lumya.

⁵Bino bikhaabe biryo khulwekhuuba babaandu be mu Isiraeli baakholile bibiindu bye bubwoonaki, naluundi baaminyaaliile Wele. Bareeba bari, “Ne naanu niye uwaakila nio ba Isiraeli baaminyaalila Wele? S'iili babaandu be mu Samariya nibo babaakila ta? Ne musaango shiina kweesi babaandu be mu Yuda baasaala? Sikuli kwe khukhwombakha bibyeeso bye khukhwisaayilakho ba wele babaandi, mu Yerusalemu ta?”

⁶Nashiryo Umukasya alikho aloma ari, “Ise ikhaashuuse Samariya shikele busa kamakubili, nga mbaamo shishiindu shoosi ta. Akhali kukhekele kumukuunda kwe khubyaala kimizabibu. Kamawuumbu kakaakhaame mu khutikulula shiriimba isho, ise ikhaakayoole intsye ingatsukhe mu litila, nio akile kumusiingi kwe shiriimba isho kwiilulukhilile busa.

⁷Bifwaani byeesi babaandu be mu Samariya besaaya, ise ikhaabikhupakemo biikele bisiintsa busa, ni kimikheemba kyeesi bakhasi babaakholela bwamalaaya mu lisaayilo bafuna, nakyo ise ikhaakyooshe. Ise ikhoonakise biifwaani byaabwe byeesi besaaya, khulwekhuuba baabyaamisa mu khwisaaya ba wele abo. Baasiku baabwe bakhaabisute babiseyo isi bakholela bwamalaaya mu khwisaaya.”

⁸Kila Miika aloma ari, “Khulwe ilomo iyo, kane ise kumutaambo kumaambe, naluundi kane indile kamasika khuumala imbuka ingali. Kane ise ikhalewo ingeende bukhuna nga isaamba aasi busa. Khulwe kumutaambo, kane ise naane busa nga ikhipwe, naluundi niilootse busa nga kunywiinywi kunywoofwe.

⁹Khulwekhuuba Umukasya waaweele babaandu be mu Samariya shitaambiso she kamaani naabi, ni babaandu be mu Yuda nabo bali aambi khufuna shishiindu nisho shitweela. Khukhwoonakisibwa ukhwo khwaabesyendile aambi, khwoolile amulyaango we shiriimba Yerusalemu shisheene, isi babaandu baase bamenya.”

¹⁰Mukhaboolela baasiku beefwe babaali mu Gasi muri ifwe khwaawulibwile mu busoolo ta; bakhaababona inywe nga mulila ta. Babaandu be mu Besi Lefara, ni mwifuufulile mwifukhuulu nga mwokesanisa kumutaambo.

¹¹Babaandu be mu Shafiri, ni mutsye mu bubowe, nga muli bukhuna naluundi nga mwaswaalile. Abo babaamenya mu Zanani, bakhakhakakho baarura mu shiriimba ta. Ni kane muwulile babaandu be mu Bezeli nga balila naabi, kane mumanye muri iyo imbaayo buumuli ta.

¹²Babaandu be mu Marosi baliindiilila nga bali ni kumwiiyikino kumukali bari kane babe buulayi, bari khulwekhuuba Umukasya wasyeendile ingunyi aambi ni Yerusalemu.

¹³Inywe babaamenya mu Lakisi, ni mubowe kamakaali khu ŋwaaŋwa. Inywe nibo babaarakikhisa bubwoonaki bubuuli mu Isiraeli, nashiryo mwaakila ni be mu Yerusalemu nabo baakwa mu byoonako.

¹⁴Ni nashiryo babaandu be mu Yuda, ni musibule shiriimba shilaangibwa Moreshesi Gasi. Bayiinga ba Isiraeli singane bafune buuyeeti khukhwaama mu shiriimba Akizibu ta.

¹⁵Inywe babaandu be mu Maresha, Umukasya akhaabareerere luundi baasiku babawaambe inywe. Baaraangirisi be mu Isiraeli bakhaatsye beebise mwifuluma liliili i Adulamu.

¹⁶Babaandu be mu Yuda, ni mubekekho kamatsuune keenywe khulwe khuulila babaana beenywe, mube busa ni kimirwe kye bibyoole nga tsingosya. Ni mukhole shino khulwekhuuba babaana beenywe bakhaayilibwe mu bubowe.