Read lumasaaba Miika 2 Bible Online

Miika 2 - lumasaaba bible

Miika 2

¹Nga shili she kumutaambo isi abo babaakona muntsu tsyaabwe, nga bakhala kamakhula ke khuukhola bye bubwoonaki! Nga antsye ni busha kumutishinyi, khukhwaama baafuna busa bari imbuka, bakhola bye bubwoonaki tsana.

²Khukhwaama nga beewotoma kumukuunda kw'omuundu, bakunuula baamurusakho; ikhaba nga baakanile tsiintsu tsye babaandi, batsibukula. Bamiinikhilisa uwe muntsu ni babaana beewe, atweela ni bye buusikha byeesi bali ni nabyo.

³Ni nashiryo Umukasya alikho aloma ari: “Bona, ise ndikho ikhola tsinengekharengekha tsye khukhwoonakisa babaandu nga babeene abo. Buukosi kane buboolekho naluundi inywe singane munyalise khuubwirusakho ta. Kane mube mu bihangafu, mulekhe khunyalisa khuukeenda nga mwiyiinga ta.

⁴Nga bibiindu ibyo byaamalile khuubakholikha khus'iinywe, babaandu bakhaabakhotsele inywe kumweenya kwe khuubatyaabila, bakwiimbe nga balilila angaaki naabi, nga beemba bari: Ifwe khwoonakisibwiile ilala, khwaweelewo! Umukasya waayilile liiloba lyeefwe, waaliweele abo babaakhuwaamba ifwe bakhwiikesa baabowe.”

⁵Nashiryo, nga imbuka yoolile iye khuukoboselayo babaandu ba Wele liiloba ilyo, imbaawo na mutweela khus'iinywe ulifunakho kumukabo ta.

⁶Babaandu baakuukuula nga baloma bari, “Iwe lekhelaawo khuukhukuukuulila ifwe bibiindu ibyo. Iwe ukhakhukuukuulila ifwe bibiindu bibifwaana biryo ta. Wele singane akhureerere ifwe kumutaambo kwoositsana ta.

⁷Iwe wambaasa uri Wele wekelile umusiku isi babaandu ba Isiraeli? Iwe wambaasa uri Umukasya waaluyile khukhwikhalilikha? Umukasya anyala khuukhola bibiindu nga bibyeene ibyo? Busheele Umukasya awa tsiikhabi abo babaamenya mu bulamu bukhosefu.”

⁸Ne Umukasya aabeelamo inywe nga aloma ari, “Inywe mwibwakala babaandu baase, mwaaba busa nga baasiku ni beebwakala. Babaandu baakobola ingo khukhwaama mu busoolo nga bambaasile bari batsya khuba mu lukoosi, ne inywe mwabebuliile khuubanuulakho ikhaba bikwaaro byaabwe.

⁹Inywe mutimisa bakhasi be babaandu baase mwaabarusa mu ntsu tsyaabwe tsyeesi bakana naabi, naluundi mwaanuula buusikha bwe biilo ni biilo bweesi ise namala khaale khuuwa babaana baabwe.

¹⁰Yiinyukha! Inywe yinyukha murure ano mutsye! Inywe singane mufune lukoosi nga muli ano ta. Bubwoonaki bweenywe bwakilile shiifwo shino shonakisibwiile ilala.

¹¹“Babaandu bano bakana umuŋoosi utsya nga ababoolela kamatsi ni bye bubeeyi nga aloma ari, ‘Ise imbalomela inywe ikhaabewo iviini, ni bye khuunywa bibiindi biikali naabi, nga biirurukukha busa.’

¹²“Ne ba Isiraeli, ise ikhaababusaase atweela inywe mweesi mumuramirewo. Imbawuumbe atweela nga kamasheese kakaali mu litaala, mube nga kamaayilwe kaketsuulemo kamasheese. Shiibala sheenywe shiilemo luundi shitsule babaandu luundi.”

¹³Wele akhaabekulilewo nibo intsila, abaraangirire abaruse mu bubowe. Bakhaanyalise khuubira mu bilibwa bye shiriimba batsye nga bali baalekhuule. Umukasya nga niye uuli umuyiinga waabwe, umweene niye ukhaabaraangirire.