Read lumasaaba Miika 3 Bible Online

Miika 3 - lumasaaba bible

Miika 3

¹Inywe baaraangirisi ba Isiraeli ni murekeerese byeesi ise inoma. Shaakha inywe mwakhola bibiindu bye bwa ŋali.

²Ne ari inywe mwakhalawo khuukhola bibiindu bye bubwoonaki, mu shifwo she khuukhola bibiindu biilayi.

³Inywe muli busa nga isolo ilya babaandu, n'iilya umuundu yaamumalawo, naluundi muli busa nga umuundu uremaka tsiinyama n'akulisa inyama yeesi amalile khuuremakamo bisiintsa.

⁴Lwanyuma imbuka ikhoole, mulilile Umukasya nga mukana muri abayeete inywe, ne s'akhaabawe sheesi mukhaakane ta. Umukasya akhaalobe khuubeelamo, khulwekhuuba nibo baakhola bibiindu bye bubwoonaki.

⁵Iliwo baŋoosi babekhupila tsimaande tsibili: nga yaabeeleyo ubawa kumukheemba, baloma bari kane ibewo lukoosi; ne isi abo babaakhabawa shishiindu ta, baloma bari itsya khubawo busoolo. Baŋoosi babaafwaana nga abo, Umukasya alikho abalomela ari,

⁶“Baŋoosi, imbuka yeenywe iye khuuba babaandu be angaaki, ili aambi ikana khukhwaakama. Singane mufune bye khuubonekhelwa luundi khukhwaama isi ise ta, khulwekhuuba mwaaborosa babaandu baase. Singane munyalise khuukhola shishiindu shoosi she buŋoosi ta.”

⁷Abo babaakhaakhole bye buŋoosi bakhaaswaale, khulwekhuuba byeesi bakhaabe baalomile sebikhaakholikhe ta. Kamaŋaanyu kakhaabawaambe basile busa, khulwekhuuba Wele s'akhaabeelemo ibyo byeesi bakhaabe nga baloma ta.

⁸Ne ise khu luwaande lwase, Umukasya waantsitsusile buulamu bwase n'Umwoyo w'Omukasya, naluundi wambeele kamaani, ni khuumanya bye bwaŋali ni bunyindaalifu bwe khuuboolela ba Isiraeli bubwoonaki bwaabwe.

⁹Inywe mumuuli baaraangirisi naluundi baawuli mu Isiraeli, babaakhakana bwaŋali ta, naluundi nga mukhola bibiikhali bituufu ta, ni murekeerese byeesi ise inoma.

¹⁰Inywe mulikho mwoombekha Yerusalemu shiriimba sha Wele, khu musiingi kwe bubwiiri ni bubwoonaki.

¹¹Baaraangirisi be mu shiriimba balya iwoongo, ni basaayi baamwo baleekela naluundi bakhalawo bibiwaamba khu makaambila ka Wele, khuuloondekhana ni kumukheemba kweesi umuundu aba waabaweele. Ne shitweela busa baaloma bari nibo byeesi baloma byaama isi Umukasya. Baloma bari, “Mbaawo buwaangafu bubukane bukhwoole khus'iifwe ta, khulwekhuuba Umukasya ali ni nafwe.”

¹²Ni nashiryo khulweenywe, bakhaalime Yerusalemu shibe busa nga kumukuunda. Shikhekele busa shiibilike she kamakubili, ni khu lukiingi khweesi Lisaayilo Likhulu liimikha ari, lukhekele busa shisaali.