Read lumasaaba Miika 4 Bible Online

Miika 4 - lumasaaba bible

Miika 4

¹Mu mbuka iili khukhwiitsa mu moni, lukiingi lweesi Lisaayilo Likhulu lilikho, lukhaabe luleeyi khuuminyisa tsingiingi tsyoosi, naluundi nga lwaayisuta angaaki khuuminyisa ni bikiingi byoosi. Babaandu khukhwaama mu manaambo kamakali bakheetseyo.

²Babaandu be kamanaambo bano bakheetseyo nga baloma bari: “Ni mwiitse khuniine khu lukiingi lw'Omukasya, khutsye mu Lisaayilo ly'Omukasya. Kane niye akhuleekele ifwe byeesi niye akana khukhole, naluundi ifwe khuloondelele byeesi niye akhuboolela khuukhola. Khulwekhuuba kamakaambila k'Omukasya kaama mu Sayuuni, ni byeesi Umukasya aleekela byaamila mu Yerusalemu.”

³Umukasya akhaabe umukayi ukhalawo kimisaango akari e babaandu be kamanaambo, ikhaba akari e kamanaambo ke kamaani, oba kali aleeyi namwe ahaambi. Shino shikhaakile buli mutweela awaambe lurima lweewe alukhootsemo imbako iye tsikhaafu, naluundi buli mutweela awaambe liifumo lyeewe alikhootsemo luwutilo. Mbaawo liinaambo lilikhebwakale lilyasheewe ta, namwe mbaawo linaambo lilikheerekekhele busoolo ta.

⁴Buli mutweela akhaamenye mu lukoosi, nga enaanayo khu mikuunda kyeewe kye kimizabibu ni kimifiki. Mbaawo shishiindu shishikhaakile babe ni khuurya khwoositsana ta. Umukasya Wele umunyali wa byoosi niye ulomile bibiindu bino.

⁵Khulwekhuuba buli linaambo lisaaya naluundi lyalondelela byeesi wele waabwe aloma. Ne ifwe khukhesaaye naluundi khuloondelele byeesi Umukasya Wele aloma, biilo ni biilo.

⁶Umukasya alikho aloma ari, Imbuka ilikho yiitsa, isi ise ikhaabusaasilekho abo beesi ise namala khaale khuuwa shiitambiso, nga nibo babaayilibwa mu bubowe, baryo baatsya bataambisibwa naabi.

⁷Kane ise imaambe abo babaali baaleme nga nibo babaaramirakho khu baandu baase, ni naabo abe babaali mu bubowe, imbekesemo linaambo lye kamaani. Khukhwamila abweene awo ni khuutsya muumoni, ise samweene ikhekele Umuyiinga waabwe, nga niikhala khu Lukiingi Sayuuni.

⁸Nio akile inywe babaali mu Yerusalemu, beesi Wele atseeta nga umwaayi n'aniina khu kwombakhe kwe tsinuungo nga atseeta kamasheese keewe, mwiileyo bushaakha mwikele luundi shiirebe shikhulu she buyiinga bubwabaatsaka bubweenywe.

⁹Babaandu be mu Yerusalemu, shiina kila inywe mulila luukali naabi muri? Shiina kila muli mu butsiina nga umukhasi isi umwaana alikho alya? Inywe simuli n'umuyiinga ta? Namwe simuli ni babaandu babaabawa inywe kamakhula ta?

¹⁰Ni mulile lukali naabi, mwifuumbe mube busa nga umukhasi isi umwaana alikho alya; khulwekhuuba ari mutsya khurura mu shiriimba mutsye mumenye mu shaalo busa. Muli ni khuuyilibwa i Babulooni, ne nga muli ibweene iyo, Umukasya akhaabamuse inywe, abawonese khukhwaama khu baasiku beenywe.

¹¹Shimanye muri kamanaambo kamakali kaabuusaane khuubebwakala inywe. Kalikho kaloma kari, “Ifwe khuli ni khukhwoonakisa shiriimba Yerusalemu; naluundi shili ni khukhwikela kamakubili busa.”

¹²Ne kamanaambo ako sikamanya byeesi Umukasya alikho ambaasa ta, naluundi sikaamanya tsinengekharengekha tsyeewe ta. Sikamanya kari Umukasya waakabusaasa niko atweela, nga umuundu uwuula buulo naabibuusaasa atweela, ari nio akawe shitaambiso ta.

¹³Umukasya alikho aloma ari, “Baandu baase be mu Yerusalemu, ni mutsye mwibwakale baasiku beenywe mufwaane busa nga umuundu n'awuula biilyo nga akhupaka. Kane ise imbashuuse inywe mube busa nga iyeeyi iili ni tsiintsika tsye shiibya ni bibatasi bya buroonzi. Inywe mukhaakhaandakilile kamanaambo kamakali, mubukule buyiindifu bwaabwe bweesi baanuula khukhwaama khu baandu babaandi ni kamaani, mubureere isi ise, uli Umukasya uwe shiibala shoosi.”