Read lumasaaba Miika 5 Bible Online

Miika 5 - lumasaaba bible

Miika 5

¹Baandu be mu Yerusalemu, bona inywe baasiku baabebotokheleele, baakhalilewo khuubebwakala inywe. Balikho beebwakala umuyiinga wa Isiraeli.

²Umukasya alikho aloma ari, “Beselehemu Efulata, bona iwe niye shiriimba shishiminyisayo bukeekhe mu biriimba bye mu Yuda byoosi. Ne shitweela busa, uyo ukhaabe umuyiinga uwa Isiraeli, ise ikhamwaamise mus'iiwe. Khulwekhuuba be shikuuka sheewe baabawo khukhwaama khaale khakheene.”

³Ni nashiryo Umukasya akhaanyoowe khukhwaantsukha babaandu beewe mu makhono ke baasiku baabwe, khukhwoolisa khu mbuka isi umukhasi uuli shisoombo n'aalisaala umwaana weewe umusiinde. Nio lwanyuma ba Isiraeli boosi babaali mu bubowe mu manaambo kakaandi, bakobole betubaase khu ba Isiraeli bashaabwe.

⁴Nga umuyiinga uyo weetsile, akhaawule babaandu beewe nga araambisa kamaani kakaama isi Umukasya, ni shiriifwa shishaama isi Wele, umweene niye uuli Umukasya. Babaandu beewe bakhaamenye mu lukoosi akhali khukhwiyembeelela ta, khulwekhuuba khukhwaamila abweene awo akhaabe nga ali uwe kamaani mu shibala shoosi.

⁵Naluundi akhaareerere babaandu beewe lukoosi. Nga be liiye lye ba Asiriya bebwakaale shibala sheewe, baahatuna tsiimako tsyeefwe, ifwe khukhaabasiindikhile baraangirisi babaaminyisa kamaani khuutsya khubasoolanisa nibo.

⁶Babeene abo bakhaawule ba Asiriya mu busoolo, ikhaba shibala shilaangibwa Nimurodi, bakhaashiwaambe nga baraambisa kamaani. Nio akile nibo bakhuwonese ifwe khukhwaama mu meeno ke ba Asiriya, nga baakhwibwakaale ifwe.

⁷Nio babaandu ba Isiraeli babaakhaabe baaramirekho khukhwaama khu busoolo, nga abe baasalanila mu bifwo biikali, bakhaamenye akari mu manaambo kamakali babe busa nga liime lilyaama isi Umukasya, ni likwa khu bunyaasi. Bakhaabe nga beyikina kamaani ka Wele, ne akhuba ke babaandu busa ta.

⁸Ne ba Isiraeli babaakhaabe baaramire mu manaambo kakaandi, bakhaabe busa baarafu nga italanyi n'iweentsa she khuulya mu shisaali namwe mukeewa. Nga yoolile mu masheese, ikakulukhila, yaakonuulakamo bisiintsa, nga mbaawo ukatseeta ta.

⁹Inywe mukhaanyalise khuuwula baasiku beenywe boosi mu busoolo, munyalise khuubamalawo boosi.

¹⁰Umukasya alikho aloma ari, “Mu mbuka iyo, ise ikhaabarusekho inywe tsiŋwaaŋwa tsyeenywe, naluundi noonakise kamakaari keesi muraambisa nga muutsya mu busoolo.

¹¹Ise ikhoonakise biriimba byeenywe, naluundi noonakise tsiimako tsitsitseeta biriimba ibyo.

¹²Ise ikhoonakise abo boosi babaakhola bye kamaloko, nio ilekhe khubawo abo babaakhola bye khuulakula ta.

¹³Ise ikhoonakise bifwaani byeesi inywe mwisaaya, ni kimisiindi kyeesi mwisaaya. Isho kane shikile inywe mulekhe khunyalisa khukhwisaaya bifwaani byeesi inywe mwabeene mukhola ta.

¹⁴Ise ikhaatitule kimisiindi kyeesi mwisaayilakho wele umukhasi Ashera, kikiili mu biriimba byeenywe, naluundi noonakise biriimba byeenywe.

¹⁵Khulwe khuukhalala khuukali ni lirima liikali, ise ikhelihaase khu manaambo ako koosi kakaalobile khuurekeeresa byeesi ise inoma.”