Read lumasaaba Miika 6 Bible Online

Miika 6 - lumasaaba bible

Miika 6

¹Ni murekeerese kumusaango kweesi Umukasya alikho awaabila ba Isiraeli. Mukasya, iwe ni wiimikhe khu ngaaki usontsoole kumusaango kwoowo; khayo tsingoongo ni bikiingi biwulile byeesi iwe uloma.

²Inywe tsingoongo ni kimisingi kikiiliwo biilo ni biilo kyeesi shibala shiimikhilekho, ni murekeerese kumusaango kweesi Umukasya alikho awaaba! Khulwekhuuba Umukasya ali ni kumusaango kweesi alikho awaabila babaandu beewe. Alikho atsya khukhwikula khu ba Isiraeli kumusaango.

³Umukasya alikho ereeba ari, “Baandu baase, shibi shiina sheesi ise nabakhola inywe? Ise nabaluyisa inywe musaambo shiina? Ni mumboolele!

⁴Khulwekhuuba ise nabamusa inywe khukhwaama mu Misiri, yaba isi mumenya mu baandu abo nga muli mu bukulwa. Ise naabasiindikhila inywe Musa, Aroni ni Miryamu, khuubaraangirira inywe.

⁵Baandu baase, inywe ni mushebulile byeesi Balaka, umuyiinga uwa Mowabu abe arengekharengekha khuubakhola, ni byeesi Balamu, umwaana uwa Beyori isaambo yeesi amukobolamo. Shebulila bibiindu bibyakholikha nga mwaama i Shitimu mulikho mutsya i Giligali, nio mumanye bibiindu byeesi ise Umukasya nakhola nga ingana khubawonesa inywe.”

⁶Shiina sheesi kane ise imbilile Umukasya? Shiina sheesi kane ise imuyilile niye, nga ise intsya khumwisaaya? Kane ise imuyilile tsinyama tsiinulu nga isaayilo intsoshe?

⁷Kane biikana ni biikana bye kamasheese, namwe kamafura ka kuusaala ku olivu kakerurukukha busa nga luluutsi byeesi ise imuyilila, manya kane bimwikhoyese? Namwe kane ise imbaaneyo umwaana wase umusoleeli umukiboole, yeesi ise samweene isaala, nio ise inyalise khusasula khulwe bibyoonako byaase?

⁸Umukasya wakhwookesanisile ifwe sheesi akana ari ifwe khukhole; wakhwookesanisile sheesi niye akhukana khus'iifwe: akana ari ifwe khukhole bye bwaŋali, khwookesanise khuukana khukhuukhakama ta, naluundi khube baawolu nga khumenya atweela ni naye.

⁹Umuundu uuli ni kamakhula kane esemo Umukasya lukoosi. Likono ly'Omukasya liwulilikhanila mu shiriimba nga likuukuula liri, “Inywe mweesi ni murekeerese, mubuusanile mu shiriimba mweesitsana.

¹⁰Tsiintsu tsye baboonaki tsyaayitsulamo buyiindifu bweesi baanuula busa khukhwaama khu baandu babaandi. Baakhola shishiindu sheesi ise nabiyila, nga nisho she khuuraambisa bibiipima bibikhali bya ŋali ta.

¹¹Ise inyala indyeena neyakhila abo babaraambisa bibiipima bibikhali bya ŋali ta?

¹²Abo babaali bayiinda mus'iinywe bamiinikhilisa abo babaali bataambi, naluundi mweesi mwaayitsula kamatsi konyene.

¹³Nashiryo ise naarakikhile khaale khuubawa inywe shiitambiso, ni khuuboonakisa inywe muwewo, khulwe bibyoonako byeenywe.

¹⁴Abe mwakhalya biilyo, ne singane mwiikuratsake ta; abe mwakhasuta bibiindu bari mutsya khuubibisa, ne shitweela busa kane baasiku beenywe babisutake. Ne isho sheesi mukhakakho mwawonesa, ise samweene ikhaashoonakisile mu busoolo.

¹⁵Abe mwaakhamiitsa biilyo, singane mukese ta; abe mwaakhasuura kamafura ke kimisaala kimi olivu, ne simukhaakewakhekho ta. Abe mwaakhasuura indali, simukhaakinywekho ta.

¹⁶Khulwekhuuba inywe mwaloondelela biikholwa biibi byeesi umuyiinga Omuri n'umwaana weewe umuyiinga Ahabu, baakhola. Nashiryo ise inaboonakisa inywe imbamalewo, khulwe khukhwiloosela ni khuukhola bye bubwoonaki ibyo. Shino shikhaakile babaandu babaandi babalekelese inywe naluundi babatsyuluuse.”