Read lumasaaba Miika 7 Bible Online

Miika 7 - lumasaaba bible

Miika 7

¹Ise nga indi mu mutaambo kumukali! Khulwekhuuba ari ise nekyelile busa nga umuundu uuli intsala naatsya khu kuusaala waalekha khunyoolakho she khuulya ta, namwe khu mizabibu waalekha khunyoolakho shishiindu shoosi ta. Bibyamala khukhwaana byoosi, ni kimifiki kiminulu byoosi baamala khaale khuubibuta.

²Khu shibala khuno sekhushiramakho umuundu na mutweela umwiyikinwa ta; mbaawo na mutweela ushiloondelela bibiindu byeesi Wele aloma ta. Buli mutweela webuliile busa nga waaliindile khukhwiira uwashe. Buli mutweela aweentsa babaandu beewe babeene khuubamalawo.

³Khuukhola bye bubwoonaki kuli nikwo kumulimo kweesi nibo baamanya khuukhola buulayi. Baraangirisi ni baakayi atweela balya iwoongo. Babaandu babaali be angaaki mu shibala baboolela baraangirisi ni baakayi sheesi nibo bakana, nio waakila abo babeene bakhala kamakhula ke khushoolelesa.

⁴Ikhaba uyo ufuura buulayi naluundi uli umwiyikinwa naabi mu baandu bano, s'aalimo lisuno ta, ali busa nga kumusiru kwe mu mukuunda. Ari shifukhu sheesi Wele atsya khuweelakho babaandu shitaambiso shoolile. Wele atsya khubawa nibo shiitambiso khuuloondekhana ni byeesi niye aamala khaale khureewura babaandu abo nga abirira mu baliindi beewe, nibo baŋoosi. Ari babaandu abo kamakesi kaabebowile.

⁵Ukheyikina umwesanwa woowo namwe umusaale woowo ta. Yitsiliilisa mu byeesi uloma, ikhaba isi umukelema woowo umweene.

⁶Khulwekhuuba mu mbuka yino ikhaba babaana basoleeli babirisa basaali baabwe buubi naabi; babaana bakhaana baminyaalila ba maayi baabwe, bakhaana babaakhwaalikha baminyaalila ba maayi baabwe baamasaala. Ari baasiku boowo bali babaandu be muntsu yoowo babeene.

⁷Ne ise, kane niyikine Umukasya, inindiilile Wele utsya khuba niye umuwonesi wase. Ise naamanyile indi kane Wele ambe sheesi ise imuloomba.

⁸Ise ndi khuureewula baasiku baase ndi mukhekhoya bari khulwekhuuba ise ndi mu bihangafu taawe. Ikhaba nga ise naakwiile aasi, ne imbuka ikhoole ise niinyukhe. Ikhaba nga ari ise ndi mu shiilima, ne Umukasya akhaambe ise buwaanga.

⁹Ise naakhola bye bubwoonaki mu moni tsy'Omukasya, ni nashiryo ise ndi ni khukhwikhalilikha lirima lyeesi niye antsokesanisa ise mu mbuka yino. Ne ikhumaliilisa niye akhaabe umutseeti wase, nga akhalawo ari ise siindi ni kumusaango ta. Umukasya akhaandeere ise ibulafu mu buwaanga; ise imenyewo khukhwoolisa nga niye waambonisile ise.

¹⁰Nio lwanyuma uri baasiku baase babona shino, babe ni khuswaala khuukali. Baatsana bali nibo batweela babaandyaabila ise amataayi nga bandeeba bari, “Umukasya Wele woowo ali waahena?” Ise ikhaabaloleelele busa imbatsekhelele, nga babaakhaandakilila busa aasi, babe nga liitosi liliili khu mukhoosi.

¹¹Inywe babaandu babaamenya mu Yerusalemu, imbuka iye khukhwoombakha bushaakha kamatikiiyi ke shiriimba, yoolile. Ili imbuka iye khuubalaayisakho lulwaakha lweenywe.

¹²Babaandu boowo bakhaakobole nga baama mu bisiintsa bibiikhali bitweela ta. Bakheetse khukhwaama ibwaamanyaanga mu Asiriya, imwaalo khukhwaama mu Misiri, ni khukhwaama mu bisiintsa bibiilimo luluutsi Efurati. Bakheetse khukhwaamila aleeyi abweene khu nyaantsa, ni khukhwaama khu ngoongo tsitsiili aleeyi abweene.

¹³Ne shibala shikhaashuukhe shiikele kumubiimbi busa, khulwe bubwoonaki bwe babaandu babaashimenyamo.

¹⁴Mukasya, iwe raambisa imiimbo yoowo iye bubwaayi, waayise babaandu boowo, beesi iwe wamweene weroborera khuuba baboowo. Ikhaba nga bamenya bonyene busa mu mubiimbi, ne iliwo liiloba linulu lilibebotoosheleele. Khayo batsye bamenye mu maayilwe kamalayi ke mu Bashani ni mu Gileyadi, nga ni baamenya amataayi.

¹⁵Mukasya, iwe n'ukhukholele ifwe bye kamakaanga, nga ni wakhola mu mbuka isi wakhurusilayo khukhwaama mu Misiri.

¹⁶Khali baasiku beefwe kamaŋaanyu kabawaambile nga baaboone bibiindu bino, ikhaba nga bali ni kamaani. Khali kamariisyo kabawaambile, baasamilila busa nga imbaawo sheesi banyala khuuloma ta, naluundi nga sibanyala baawulila shishiindu shoosi ta.

¹⁷Bakhekhuruurire busa aasi mu lifukhuulu nga indemu, babe busa nga shisolo shishikhuruurira aasi khwiiloba. Bakhaame mu biriimba byaabwe bibiilikho tsiimako nga banikina busa, isho shikile bakobole isi Umukasya Wele weefwe.

¹⁸Umukasya Wele, naanu uli nga iwe? Iwe wiyakhila bibyoonako, naluundi waabiimbilila buubi bwe babaandu boowo babaaramirewo. Umukasya s'arama nga ali ni lirima khuumala imbuka ingali ta, khulwekhuuba niye waasiima naabi khukhwookesanisa babaandu khuukana khukhuukhakama ta.

¹⁹Umukasya kane akhuwaambile ifwe shiisa ifuunda ikiindi. Kane akhaandakilile bibyoonako byeefwe aasi e bikele byeewe, abituume aasi aleeyi naabi, khu lwaalo lwe nyaantsa.

²⁰Mukasya, iwe ukhokesanise shiisa isi babaandu be lisaaye lya Yakobo luundi, ni khuukana khuukali isi ifwe khukhuuli lisaaye lya Iburayimu. Shino kane shibe nga iwe ni wasubisa bakuuka beefwe mu bifukhu bye khaale akho.