Read lumasaaba Nahumu 1 Bible Online

Nahumu 1 - lumasaaba bible

Nahumu 1

¹Kumukuku kwa Nineve. Buno buurone bwe kamarooro ka Nahumu, uwaba aama i Elikoshi.

²Umukasya ali Wele uwe libuba luundi niye eliyaasa. Umukasya niye eliyaasa luundi ali ni buurafu bukali. Umukasya niye esaasulisa baasiku beewe, luundi lirima lyeewe lye kamaani liramila ilala khu baasiku beewe.

³Umukasya ayilawo imbuka indeeyi khuukhalala, naluundi ali uwe kamaani kamakali. Aryo Umukasya s'anyala waalekha baamiinyi nga baakhuweebwa shitaambiso ta. Kumukhoosi khweesi Umukasya akyeendelakho mulimo ikhuungu ni luwuutse; ni namufweeli niye lufuumbi lwe mu bikyele byeewe.

⁴Niye arafuyila inyaantsa, yelayo yoomelela busa. Akhola ni tsintsitsi tse kameetsi natso tsomelela. Kimikuunda kya Bashani ni Karumeli kiniaala busa, ni bimuli bye mu Lebanooni biboonga byaakwa aasi.

⁵Tsinjiinji tsinikina nga tsaaboone khu Mukasya, ni bikoongo biyengukhaka busa nga byaamulolilekho. Shibala shoosi shitengaala busa nga shili mu moni tseewe; shibala shoosi atweela ni babaandu boosi babaashimenyamwo.

⁶Naanu unyala waarama nga weemile khu ngaaki siinga nga Umukasya aba waakhalaale? Naanu umweene unyala wenyindaalila buukhafu bwe lirima lyeewe? Buurafu bweewe butsukhibwa busa nga kumulilo kukuutiindiima, ni lulwaanda lwaatikhaka busa nga lwaamulolilekho.

⁷Umukasya ali umulayi; niye ali bubwiibisilo bwe babaandu beewe mu mbuka iye kumutaambo. Niye enaanayo naabi isi abo babaamutimakayo lwe buuyeeti.

⁸Ne isi baasiku beewe, akhaafwaane busa nga kameetsi kaketsuule kaasalasala, keeyawo baasiku beene kaabamalewo. Niye akhaatimise baasiku beewe baweele mu shiilima.

⁹Shiina shisheene sheesi mulikho muboolanila khuukhola khu Mukasya? Niye akheetse abamalilewo ilala. Mbaawo buukosi bubuumwiitsila niye kimiluundi kibili ta.

¹⁰Nga n'ubona kamawa ni kebowaanisaka, ni bameesi nabo baryo nga ni bebowaanisakila mu shiimeesa shaabwe, boosi kumulilo kukhaabooshe baweewo nga kamasakari kamoomu.

¹¹Nineve, khukhwaama musiiwe, iliwo umuundu ukhwaamilemo nga waayitsula tsimbomelo tsingali isi Umukasya, naluundi nga niye uboolela baamoyaani.

¹²Sheesi Umukasya aboolela babaandu beewe nisho shino: “Abe yakhaba nga nibo (ba Asiriya) bali ni liiye liikali lye kamaani, bakhaabakhalekho baryo baweelewo ilala. Indyo abe nakhaba nga naakhuweele iwe Yuda shitaambiso shiikali, ise sikheeleyo luundi ikhuwe shitaambiso shishiindi ta.

¹³Indyo ikhaafuniaakake luundi imbarusekho likyooki abe lyeesi ba Asiriya baababowakho, ikhaalakake ni kiminyololo abe kyeesi baababowelela inywe.”

¹⁴Umukasya waarusile shiilakilo sheewe shishiwaamba khwiiwe Nineve: S'ukhaabeyo luundi ni babetsukhulu babaalisuta lisiina lyoowo liilooseleyo mu moni ta. Ise ikhaahesele ilala bifwaani bibyabeetsebwa, luundi bifwaananyi bibyawaakhibwa buulayi bibiili mu mesaayilo ke bawele beenywe. Ise samweene indi khuuŋoonaŋoona iŋani yeenywe, lwekhuuba inywe simushaakhila khuuba baalamu ta.

¹⁵Yinyusa tsimoni tseenywe mulole iyo khu njiinji, mubone umurume wase nga eetsa waabasutiile kamakhuuwa kamalayi, alikho abareerera kamakhuuwa ke lukoosi! Nimwiloosele khukhwikhoyela kamayiiya keenywe, inywe babaandu ba Yuda, muryo mwoolelesele ilala bibitsubo byeenywe. Babaandu bamoyaani sibakheeleyo luundi khuubebwakala inywe ta. Nibo bakhaahele baweelewo ilala.