Read lumasaaba Nahumu 2 Bible Online

Nahumu 2 - lumasaaba bible

Nahumu 2

¹Uyo uwiitsa khukhwiibwakala iwe Nineve, bona alikho eetsa. Liinda buulayi kuutikiiyi kweenywe kukwabebotokhelela, muloolelele buulayi kumukhoosi, mwinyweese mwabeene ni kamaani, mwiimikhe shisaani nga mwekumisile.

²Lwekhuuba Umukasya ali aambi khuukobosela Yakobo shiriifwa sheewe, aryo akobosele Isiraeli shiriifwa sheewe shiikali, abe yakhaba nga baasiku beewe baamwibwakala baamunuulakho bibiindu byeewe byoosi, bamwaawulakakho tsisakya tseewe tsoosi.

³Tsingabo tse basoolani be kamaani tsaarandaala tsiri pee, ni baselikhale boosi bakwaarire tsingubo tsinandaafu. Bibyuma bibiili khu makaari kaabwe bilikho bimulikhamulikha nga lumweemwe, khu shifukhu khweesi berekekhela khukhwiibwakala, basoolileyo kamafumo kaabwe bakapaangile ate nga kariisaka naabi!

⁴Kamakaari kalikho kebotoosa khu nguudo tse mu shiriimba, nga katima kebotoosa busa khukhwaama lubeka lutweela khuutsya khwoola khu lubeka luluundi khu nguudo itsyo. Katsya kamulikhamulikha busa nga tsitooki, luundi katsya kahaanya buwaanga nga lumuli lwe fula.

⁵Niye ashebulila baakhulu beewe waabalakila khukhwiitsa, ne beetsa ibweeni nga beesindukha busa. Batsya khwoola khu litikiiyi lye shiriimba nga baanguyilisa busa, nga buli she khukhwikhiinga shoosi sharekekhebwele buulayi.

⁶Biilibwa bibyekalila tsintsitsi tse kameetsi ari byelekhuulile byekukhile, luryo lubili lw'omuyiinga lwaakwiile.

⁷Shamiinilisibwa luundi shafuulibwa sharama busa, shasutibwa shaayilibwa mu bubowe, baryo babaakaanisi baasho bakhaana batoloola kamasika nga kamawuusi ni kakhola, baaba nga bekhupaka mu bifuba.

⁸Nineve shili busa nga kameetsi kakaateembelele atweela, lwanyuma kaarakikha khuutima nga keekha. Nio baarakikha khukhwiilootsa bari, “Yiimisa! Yiimisa!” Ne nga mbaawo na mutweela ulolakho inyuma ta.

⁹Ni munuule ifeetsa! Muryo munuule ni zaabu nyene! Bye buyiindifu bibiili mu shiriimba shino sibyakama ta, buli shiindu shishiilimwo shili she lisuno liikali naabi.

¹⁰Nineve shili busa, shili shiŋaara busa luundi shaakwiile! Kimyoyo kye babaandu kyaayengukhakile, ni kameesikamo kaabwe kalikho kanikina busa, kimibili kiisindukha, ni mu moni mwaashuukhilekho iraangi!

¹¹Ari shili waheena shiriimba abe shishiili bumenyo bwe tsitalanyi, shiifwo abe mweesi tsitalanyi tsiliisila bubwaana bwatso, shiifwo abe mweesi italanyi iseetsa ni khasi tsibirira nga tsitsya khuweentsa she khuulya, naluundi shiifwo mweesi tsitalanyi tsinyana tsiikhala, yaalekha khubawo umuundu ubirayo ta?

¹²Italanyi yakhoonya bisolo biikali lwe bubwaana bwayo, naluundi yeeraka biikali busa lwe talanyi ikhasi yayo; yaatsya yetsusa lifuluma lyayo ni bisolo byeesi yirire, ni bumenyo bwayo bwetsulamwo bye khuulya.

¹³Umukasya umunyali wa byoosi aloma ari, “Bona ari ise ndi umusiku woowo. Indi khuutsya khwooshaka kamakaali koowo ketuukhe lisuusi. Ni lurima lukhaahese lumalewo tsitalanyi tsoowo tsinyana. Mbaawo she khuulya sheesi ikhaakhulekhelewo khu shibala ta. Ni likono lye baarume boowo silikhaawulilikhekho ta.”