Read lumasaaba Nahumu 3 Bible Online

Nahumu 3 - lumasaaba bible

Nahumu 3

¹Nga kumutaambo kwaashinyoolile shiriimba isho shishitsuule khuutsukha kamafuki, shiriimba isho shishitsuule bubeeyi atweela ni bunuuli, ate nga sishiwamo bunuuli ta.

²Reekeresa uwulile khuwuuma khwe lunyiti, ni khuwuuma khwe kimipiila kye shikaari, ni tsiŋwaaŋwa nga tsiruukaruuka, ni kamakaali nga kakhweesana!

³Tsiŋwaaŋwa ni basaani babaatsiikyeendelakho balikho beetsa, nga bakalulusa tsiindima tsaabwe, ni kamafumo kaabwe kamulikhamulikha busa! Babaandu babaafwiile nga bali baakali, baabuusakile busa kimilaambo mu nduumi, iliwo kimilaambo kye babaandu kikikhabalikha ta, babaandu bakyeenda ni bakiituyakho busa ni bakwa aasi!

⁴Shino shakholikhile lwe bwamalaaya bwa malaaya uyo bubuuli bukali naabi. Shili nga umukhasi uwimiliisa luukali khuutsya khukhola bye bulakusi, waatsya waawombelesa kamanaambo lwe bwamalaaya bweewe, ni babaandu be bikuuka bibikhali bitweela ta lwe bulosi bweewe.

⁵Umukasya uwe kamahe Umunyali wa byoosi aloma ari, “Samweene naakhwinyukhiile khuukhuwa shitaambiso. Intsya khwinyusa maliinda woowo isi ukwaarire ikhubiimbe mu moni, nio ukyeende nga uli bukhuna isi kamanaambo ni buyiinga bwoosi, uryo tsisoni tsikhuwaambe.

⁶Indyo ikhaakhutumakekho bibiindu bye mbikho, lwanyuma ikhubirisake buubi bubweene, ikhwikyelise shishiindu sheesi babaandu balolelela beyaanga busa.

⁷Buli muundu yeesi ukhaakhulolekho akhaatime atitukhe atsye, nga aloma ari, ‘Nineve ari shaayonekha; naanu ukane alile nga ashilootselakho? Naanu ukane eetse nga akana khuushiwaambila shiisa?’ ”

⁸Iweewe uli umulayi naabi khuufuurakho No Amoni,[1] shiriimba shishiili khu luutsi Nayilo, nga kameetsi kaashibotokhelela khu buli lubeka? Luluutsi luno nilwo she khukhwikhiinga khwasho, naluundi kameetsi niko kutikiiyi kwasho kwe khukhwiliinda.

⁹Esiyopiya[2] nisho shishaba kamaani kaasho, ni Misiri nasho shaba bunyala bwasho bwe kamaani; Puti ni Libiya nibyo bibyaba bibala byasho bye buusaale.

¹⁰Ne abe byakhaba nga byaba biryo, babaandu baayo baayilibwa mu bubowe, baayilibwa mu mutaambo. Ni babaana baasho bakyeekhe babaakhupa aasi mu nguudo tse mu shiriimba, baatikhakamwo busa. Ni babaandu baabwe be shiriifwa babaakhupilakho khakokha, baryo babaandu be kamaani abo, baabayila nga baababowele kiminyololo.

¹¹Ni nawe Nineve ukhaameele buusela utaalataale busa, utsye ukwe aasi wibise. Nawe ukhaatime wilukhe nga uweentsa e khukhwibisa khu baasiku boowo.

¹²Tsimako tsoowo tsili busa nga kimisaala kimifigi kikiilikho kimifigi kikinyoowa kimirobe: siinga umuundu akitengaasa, kimifigi ikyo kilakala aasi kyaakwa mu khanwa mwooyo utsya khukilya.

¹³Bonakho babaandu boowo babaali akari owo babaakhukhiinga iwe bali bakhasi busa. Bilibwa bye shibala shoowo byekukhile bili khwaashe busa, baasiku boowo benjilaka busa. Kumulilo kwookhile kimibya kyoowo kyoosi.

¹⁴Taaha kameetsi nga wirekekhela khukhwibwakalibwa khwoowo, uwaangase bye khukhwiliinda byoowo. Tsya usaambe liloba, uliroke buulayi, uŋoonaŋoone kamatofwaali!

¹⁵Ne abe byakhaba biryo, kumulilo kukhaakhwookhe kukhumalewo, namwe ukhonyebwe ni lurima. Ukhaasakukhe uwewo nga n'ubona bilime ni biliibwa ni tsiisike. Nimusaalane mubalaahe nga tsiisike, mwitsule nga kamateete!

¹⁶Iwe wabalaayisa buukali bwe baasuubusi boowo, betsula bafwaana busa nga tsinieniesi tse mwikulu. Baryo bafwaana busa nga tsiisike, baawulula biilime bye shibala byoosi, baakyelawo baahanyukha baatsya.

¹⁷Babaandu boowo babaakhuliinda bali busa nga tsiisike, ni baakhulu boowo babaakhuli aambi bali busa nga tsiisike tsitsikyeendela atweela, tsitsiitsya tsebuusa khwitikiiyi nga antsye anyirire. Ne nga antsye akyelilewo abilile, tsipaamburukha tsaatsya, yaalekha khubawo umuundu na mutweela umanya kumukhoosi khweesi tsitsiliile ta.

¹⁸O, iwe Umuyiinga wa Asiriya, bona babaayi[3] boowo baakwiile aasi balikho bakona, baakhulu boowo be shiriifwa baakonile aasi bawungukhila. Lolakho babaandu boowo basalaniile busa khu njiinji, nga sibalikho n'umuundu yeesi ubabuusa atweela abakobose ta.

¹⁹Mbaawo shishinyala shawosawosa butsiina bweesi uli nabwo ta, likoontsyo lyoowo lili liikali naabi. Buli muundu yeesi uwulila kamakhuuwa kakaakhuwaambakho khwiiwe akhupa mukhono nga ekhoya lwe khuukwa khwoowo. Lwekhuuba, naanu umweene ukhaabonakho buurafu bwoowo nga ni buli?