Read lumasaaba Habakuku 1 Bible Online

Habakuku 1 - lumasaaba bible

Habakuku 1

¹Buno nibwo buurume bweesi Habakuku umuŋoosi aafuna mu khubonekhelwa.

²O Umukasya, kane shikhuyilile imbuka shiina iwe khukhwiilamwo, ise nga nilootsa lwe buyeeti? Kane shikhuyilile imbuka shiina nio iwe ukhuwonese ifwe lwe bibituluungu bino byoosi?

³Lwashiina ukila ise naabona buuraambi bwe bubwoonaki buno bwoosi? Lwashiina wikhaliilikha waalolelela buubi buno bwoosi? Ise imbona khuuhela ni bituluungu buli aandu oosi, naluundi imbona khuusoolana ni khuulomana buli aandu?

⁴Karyo kamakaambila bakalekelesa, ni buukayi buulayi sibabuloondelela mu makayilo ta. Babaandu baabi nibo babaafuura bakwalaafu buukali, isho shaakila baakalusaka kamakaambila.

⁵Lwanyuma kila Umukasya elamwo ari, “Nyukanyuka uloolelele kamanaambo, lola ate wiyaange! Lwekhuuba ise iliwo shishiindu sheesi indi khuukhola mu bifukhu byoowo bino, shishiindu sheesi ukhakane ufukiilise ta, abe yakhaba nga iliwo umuundu ushikhuboolelekho!

⁶Indikhusuluusa ba Babulooni khukhwiitsa mu bunyala, nga nibo babaandu baarafu luundi be bisaayuumba. Babeene bano kane bakhuumbe bebotokhelele, nga batsya bawaambaka biifwo bibikhali bibyaabwe ta.

⁷Nibo bali babaandu baabi naabi, beesi buli muundu eyeembelela, naluundi bakhola buli shiindu shoosi sheesi bekanila.

⁸Tsiŋwaaŋwa tsaabwe tsikhuula tsiindimo nga tsiingwe, naluundi tsili tsindafu khuufuurakho ni biitsuutse bibikhabakhaba lwe ntsala. Basaani baabwe babaatimila khu ŋwaaŋwa, beetsa nga basuna busa khukhwaama i aleeyi. Beetsa bewuta busa nga n'ubona kunywiinywi waasu, ni kwiwuta aasi khukhwaanyula she khuulya.

⁹Baselikhale baabwe boosi beetsa nga bewuniilile khu she khuureera bituluungu byonyene. Beetsa baalulumile nga ikhuungu iye mu mubiimbi, iyiitsa nga iwuutsa, yabuusa baabowe iburaangisi wayo nga n'ubona ibuusa kumuyekhe atweela.

¹⁰Sheesi bakhola batsekhelela busa bayiinga atweela ni bawuli. Balekelesa ni biriimba byaabwe bibiilikho kamatikiiyi; bareera liloba baalibuusa khu matikiiyi kaabwe keene, baaniinilakho babebwakala.

¹¹Lwanyuma baatsya babeeya busa nga n'ubona imbewo iye khuungu, baabamalawo, lwekhuuba babaandu ba Babulooni abo babaali baboonaki beyikina kamaani kaabwe kameene nga wele.”

¹²O Umukasya Wele wase, khukhwaama liina na liina iwe uli Wele. Iwe uli Wele, Umukhosefu wase uwe biilo ni biilo, ukhafwa ta. O Umukasya, iwe Umuliindi weefwe, waasiindikhile ba Babulooni bano khukhwiitsa khuukhukhalila ifwe kumusaango, khuukhuwa ifwe shitaambiso lwe bibyoonako byeefwe.

¹³Ne iwe uli Umukhosefu, unyala uryeena waalolelela busa buubi bubuuli khuukholekha ni babaandu baboonaki nga bano? Iwe kane usile busa uryo nga babaandu baboonaki bano bamilaka bamalawo babaandu babaabafuurakho nibo buukwalaafu?

¹⁴Iwe wakhola babaandu baafwaana busa nga tsinyeeni tse mu nyaantsa, tseesi bawaambaka busa luundi beera? Babaandu boowo bali busa nga bibuumbe bye mu nyaantsa bibiikhalikho n'umuwuli yeesi ta?

¹⁵Umusiku akhweesaka babaandu boowo ni kimilobo, waabawaambaka busa nga araambisa khaatiimba kheewe, waababuusila mu bitowo byeewe. Lwanyuma weetikitya lwe kumwikhoyo kumukali.

¹⁶Lwanyuma wesaaya khaatiimba kheewe nga akhawaanilayo tsisaayilo, wakhooshela bubaane bubuwunya buulayi. Lwekhuuba elomela ari khatiimba khaamukhola niye khuuba umuyiindifu luukali, ni biilyo byeewe bili bye angaaki naabi.

¹⁷Ari umusiku uyo kane eloosele khuukhola aryo buli mbuka yoosi? Umusiku uyo kane eloosele khuuhesa kamanaambo nga s'akalikho ni shiisa ta biilo ni biilo?