Read lumasaaba Habakuku 2 Bible Online

Habakuku 2 - lumasaaba bible

Habakuku 2

¹Kane iniine khu munaala kwe khukhwiitseeta, niimikhe khu shifwo she khukhwiliinda khu ngaaki. Nga indi ibweene iyo, nio imbulile byeesi Umukasya anomela ise, ni khuumanya isaambo isi anyala waantsilamwo byeesi imwilootseele.

²Lwanyuma kila Umukasya naye elamwo ari, N'urone khuukhwiilamwo khwase khwa lubuula khu mabaale ke khuuronakho, nio umurume ekhuune tsiindimo ni nako.

³Khuubonekhelwa khuno khuli khwe mbuka iyiitsa mu moni. Khuubonekhelwa khuno khukanikha khu mbuka iye ntsakamo, naluundi bibibonekha bino bikhaakholikhe. Abe yakhaba nga bibonekha nga bibikyelewelekho khukhwoola, nimubiliindilile buulayi. Ilala bikhaakholikhe, sibikhaakyelewekho na khakyeekhe khoosi ta.

⁴Buurume nibwo buno: Bonakho, umuundu yeesi usitowele lwe bukhali bukwalaafu ta, alikhaasikhila ilala. Ne Umukwalaafu aliimikha lwe khuufukiilila.

⁵Ilala iviini ili iye tsimbomelo naabi, umuundu uwiyiingayiinga s'anyala wekhala atweela wekura ta. Lwekhuuba nga niye naakhekhala ingo weewe waawoleela ta, waayitsula kumuluungo nga kamakoombe, iryo imakoombe niyo siyikura ta. Mu muluungo kumukali babaandu bebuusanisila babeene kamanaambo koosi, baryo baabuusanisa babaandu boosi khuuba baabowe baabwe.

⁶Ne lwanyumakho khakyeekhe, baabowe baabwe tsana kane babatsekhelele luukali lweene, nga baloma bari, Nga kumutaambo kwaabanyoolile inywe babaayila bibiindu bibiikhali bibyeenywe ta. Inywe mukhoolese liina nga muyiindila lwe khuumiinilisa babaandi? Shino kane shikholikhe shiryo khukhwoolisa liina?

⁷Ne abo abe babaababaantsa inywe kane babenyukhile mu khaangu naabi nga mwaakhushimanyakho ta, nga bakana mubasasule ni kamafuurisa. Baryo baasiku beenywe bakhaabakwekho munikine busa, muryo nio mwikyele babaandu beesi banuulakho bibyaabwe.

⁸Lwekhuuba inywe mwatsya mwanuula bibiindu bye kamanaambo kamakali, baryo babaandu babaaramawo baakyeekhe abo nabo bakheetse babanuulekho nanywe bibiindu. Lwekhuuba inywe mwatsukha kamafuki ke babaandu makali naabi; inywe mwatsya mwaahesa bibala ni biriimba biikali naabi, atweela ni babaandu boosi babaabilimwo.

⁹Nga kumutaambo kwaamunyoolile umuundu yeesi uwiyombekha umweene nga abira mu bulyakhani, nga akhakakho khuukhola muungo mweewe khuuba mwe angaaki naabi, khuubona nga alekha khuukwa mu bubi ta.

¹⁰Iwe ukhaareere shikholimo khu be muungo mwoowo ni khuuhela, atweela ni khukhwiyira wamweene.

¹¹Ni kamabaale kakoombekha litikiiyi kakhalilile mukari, ni tsinguulo tse ntsu natso tsikheelemwo nga tsaantsuwa.

¹²Nga kumutaambo kwaamunyoolile umuundu uyo uwombekha shiriimba khuubirira mu khutsukha kamafuki, aryo waaba nga arawo shiriimba lwe bubwoonaki.

¹³Umukasya umweene, uuli Umunyali wa byoosi niye uwakhalawo ari buuraambi bwe babaandu bubweene bube nga kamafura ke kumulilo, ari kamanaambo karaambilile busa nga mbaawo sheesi kafunamwo ta.

¹⁴Ne shiibala shoosi shikheetsusibwe ni khuumanya shiriifwa sh'Omukasya, nga n'ubona inyaantsa niyitsusibwa ni kameetsi kasalasala.

¹⁵Nga kumutaambo kwaamunyoolile umuundu uyo ukila babesanawa beewe baanywa baameela, uyo ubatsukhiilila bye khuumeesa khukhwoolesa ni boola khukyeenda bukhuna.

¹⁶Nawe uryo ukhawaambisibwe tsisoni mu shifwo she khuufuna shiriifwa. Iwe wamweene ukhaanywe khukhwoolesa umeele utilyaate busa, ukyeende bukhuna busa. Umukasya niye ukhaakhuwe iwe shishimeesa unywe khukhwaama mu shikhopo shishiili mu mukhono kweewe, ni shiriifwa shoowo shiikyele tsisoni.

¹⁷Bituluungu byeesi wakhola bye khuuremaka kimisaala kye khu lukiingi Lebanooni bikhaakhushuukhile wamweene; ni khuukhoonya bisolo khweesi iwe wakhola, khukhaakhuriisake iwe wamweene. Shino shikhaabe shiryo lwe kamafuki ke babaandu keesi iwe watsukha, ni bituluungu byeesi wakhola khu baandu be khu shibala ni mu biriimba byeene.

¹⁸Ari shifwaani shili sha mukaso shiina? Nisho shili busa shishiindu sheesi umuundu ebuumbilisa waakhola. Shili busa shishiindu she bubeeyi. Umuundu yeesi ushikhola ara khukhwiyikina khweewe mu shiindu sheesi umweene aakhola, niye akhola bifwaani bibikhaakanikha ta.

¹⁹Nga kumutaambo kwaamunyoolile umuundu ulomela shishiindu shishakholekha khukhwaama mu kuusaala ari, “Yinyukha aasi!”, Namwe waalomela libaale ari “Yinyukha aasi.” Manya shishiindu shibuumbe shinyala shakanikha ilimo yoosi? Shishiindu nga isho shinyala shakholebwa shamiliya nga bashiwakhakho izaabu ni feetsa, ne nga sishilimwo buulamu ta.

²⁰Ne Umukasya niye ali mu Lisaayilo lyeewe Likhulu Likhosefu. Lekha shibala shoosi shisile busa mu moni tseewe.