Read lumasaaba Habakuku 3 Bible Online

Habakuku 3 - lumasaaba bible

Habakuku 3

¹Khuno nikhwo khuuloomba khwa Habakuku, uwaba umuŋoosi, khusiintsiila khu Shigiyonosi.

²Iwe Umukasya, ise naawulila khaale biilayi bibikhuwaambakho, naluundi niyaanga busa, nga naawuliile khu buraambi bwoowo, O Umukasya. Yiilamwo luundi ukhole buuraambi ubwo mu miboolo kyeefwe, byeesi wakholatsaka, ubikhole luundi bimanyikhane khu mbuka yino. Nga waakhalaale, ukhakhwibilila ta lwe shiisa shoowo.

³Wele eetsa khukhwaama mu Temani, Umukhosefu Wele eetsa khukhwaama mu bikoongo bya Parani. Shiriifwa sheewe shaamalatana likulu lyoosi, ni shiibala shetsulamwo khuruuyibwa khweewe.

⁴Shiriifwa sheewe shili nga khuumulikha khwe nyaanga, khuukhosa khutsasa nga khwaamila mu makhono keewe, mweesi kamaani keewe keebisa.

⁵Niye asiindikha buulwaale buubi naabi bwaraangila iburaangisi weewe, ni bitaambiso bye khuufwa nabyo byaamuloondakho inyuma.

⁶Niye nga weemikhile, shiibala shinikina; nga ni emikha waalolelela, kamanaambo katengaasibwa; lwanyuma tsinjiinji abe tsitsikhawawo ta tsaasalanila busa, ni bikoongo abe bibyabawo biilo ni biilo, byaakwa aasi byaamilikha byoosi. Isaambo isi araambamwo siiwawo ta, ili iye biilo ni biilo

⁷Ise nabona kamasari ke babaandu ba Kushani nga kali mu mutaambo, ni babaandu ba Midiani nga banikina busa.

⁸Ne manya iwe Umukasya, tsintsitsi tse kameetsi nitso tseesi wakhalalila? Namwe lirima lyoowo lyakhuuniina lwe kuyaantsa, nga niwakyeendela khu ŋwaaŋwa, waatsya waafuura busoolo ni kamakaali koowo?

⁹Iwe wasoolayo buyiingo bwoowo, waŋoonaŋoona bufumo bwoowo. Iwe waaranakamwo shiibala shoosi nga uraambisa tsintsitsi tse kameetsi.

¹⁰Tsinjiinji nga tsaakhuboonekho tsanikina busa, kameetsi ke kamaani kaatsutsukha khukhwaama mwikulu, ni naako kakaali aasi mwiloba kayirira busa, ni khukuula khwe khukhwilyebula khwako khwawulilikha khu ngaaki.

¹¹Biryo inyaanga ni kumweesi byeemikha byaalekha khukyeenda ta; nga bufumo bwe mu buyiingo ni kamafumo bilikho bimulikhamulikha busa nga luweni.

¹²Mu lirima lyoowo lye kamaani, iwe wakhuumba khu shibala, uryo waakhaandakilila kamanaambo nga lirima lyakhuniinile.

¹³Iwe weetsa nga ukana khuwonesa babaandu boowo, khuuwonesa umukulwa woowo umurobore. Iwe wahesa umuwuli we linaambo lye bubwoonaki, uryo wamwaabulakho byoosi khukhwaama imurwe khukhwoolesa ibikyele.

¹⁴Iwe waraambisa bufumo bwoowo waawunaka kumurwe kw'omuraangirisi we liiye lyeewe, nga basoolani beewe beetsile nga shishafuusi khuukhusalanisaka ifwe, bafwaane nga babaamiinilisaka bataambi.

¹⁵Iwe wakhaandakilila inyaantsa nga uraambisa tsiŋwaaŋwa tsoowo, khukhwoolesa ni kameetsi ke kamaani koosi keetsula lifulo.

¹⁶Ise nga ni nabiwulila bino byoosi, kumubili kwase kwaanikina, ni kiminwa kyase kyanikina lwe khuurya; ise newulila nga mu makuumba mwase mwayengukhile busa, ni bikyele byase byatengaala busa. Ne ise kane iniindilile shifukhu she kumutaambo ni khukhwikhalilikha khuukali, nga shiitsa khu linaambo ilyo lilikhwibwakala ifwe.

¹⁷Kimisaala kimifigi kinyala kyalekha khuurakho biimuli ta, ni kimisabibu kinyala kyaalekha khurakho kimisabibu ta, namwe kuusaala ku olivu kunyala kwaalekha khwaanakho ta, ni mbuka iye khuukyesa inyala yalekha khukhureerera biilyo ta, kamataala ke kamasheese kanyala karama busa, ni kamataala ke tsikhaafu kanyala kaaba nga mbaamwo tsikhaafu ta,

¹⁸ne abe byakhaba biryo, ise kane nikhoyele mu Mukasya wase, kane imbe umusangaafu, lwekhuuba Wele niye umuwonesi wase.

¹⁹Umukasya Wele niye uwuumba ise kamaani, niye uuwa bikyele byase kamaani byahaandalala nga bye khisi, aryo waanyalisisa ise khuuniina mu bifwo bye tsingoongo.