Read lumasaaba Zefaniya 2 Bible Online

Zefaniya 2 - lumasaaba bible

Zefaniya 2

¹Inywe linaambo lye babaandu babaakhali ni tsisoni taawe, ni mubuusane atweela, buusana atweela,

²nga shifukhu shishareebwawo isho shishiili khwoola ta, shifukhu isho khweesi mulitaamuusibwila nga likhuutsi mu mbewo, nga lirima liirafu ly'Omukasya lishiili khuuboolakho taawe, nga shifukhu khweesi alibokeselakho lirima lyeewe shishiili khwoola ta.

³Ni mushuukhe mukobole isi Umukasya, inywe babaandu baawolu be mu shibala, inywe babaandu babaakhola byeesi alakila. Ni mukhole isho shishiili shaŋali, muweentse buwolu; manya lukanile kane Umukasya ababiimbekho nga shifukhu she lirima lyeewe sheetsile khwoola.

⁴Mbaawo umuundu na mutweela uuliramakho mu Gaza ta. Ashikeloni nasho babaandu balishaantsukha shirame busa. Kumuusi mwihaangilwe mubweene Ashidodi shilirama busa nga mbaamo muundu ta, ni Ekurooni shilikhuulibwa ni tsiindi tseene.

⁵Nga kumutaambo kwaabanyoolile inywe babaandu babaamenya khu ndulo kwe nyaantsa, O inywe babaandu ba Keresiti. Ilomo y'Omukasya yeetsile khuubatsuntsumilisa inywe, inywe ba Kanaani, mu shibala she ba Firisitiya. Umukasya akheetse abahese mweesi, ilekhe khubawo umuundu na mutweela uramawo ta.

⁶Ni nanywe shibala she khu ndulo khwe nyaantsa, isi Keresiti bamenya, shisiintsa sheenywe shikheekyele kamasari ke babaayi be kamasheese, ni kamaayilo ke kamasheese.

⁷Shiifwo she khu ndulo khwe nyaantsa shino, shikheekyele buusikha bwe babaandu babaaramawo, khu baandu be shikuuka sha Yuda, mubweene umwo nimwo mweesi bakhaanyoole kamaayilo. Antsye ni buliba nga bwilabula, balitsya bakone mu byombekhe bya Ashikeloni. Umukasya Wele umweene akhaabe umuloleleli waabwe naluundi akhaabakobosele bye buyiindifu bwaabwe.

⁸Umukasya umunyali wa byoosi aloma ari, “Ise naawuliile isaambo isi babaandu ba Mowaabu, ni ba Amoni bakhomakamo babaandu baase ba Yuda naluundi nga babatsekhelelela. Baryo baaba nga babariisariisa nga bakana khuubabukula liiswa lyaabwe.

⁹Ni nashiryo ise nga niindi Umukasya Umunyali wa byoosi Wele wa Isiraeli, niitsubila ilala ndi, babaandu ba Mowaabu atweela ni babaandu ba Amoni, batsya khuhelela ilala nga Sodomu ni Gomora ni byaba. Biifwo byaabwe bikhekyele bibyasiimba bunyaasi luundi bibe kamalowo ke kumuunyo, shibala shishoonakisibwa biilo ni biilo. Batweela khu baandu baase babaaliramawo nga baalamu balitsya banuule bibiindu byaabwe, naluundi basikhile liiswa lyaabwe lyoosi.”

¹⁰Shino nisho sheesi babaandu ba Mowaabu ni ba Amoni balifunamwo lwe khukhwiyiingayiinga khwaabwe, ni saambo isi baakhomakamo luundi baabirisaka babaandu b'Omukasya, Umunyali wa byoosi buubi naabi.

¹¹Umukasya akhaabateremise buubi naabi. Niye alihesa luundi amalilewo ilala ba wele be mu shibala shaabwe. Karyo kamanaambo koosi kaliitsa kamwisaaye niye, nga buli linaambo lili khu liswa lyalyo lilyeene.

¹²Ni nanywe babaandu ba Esiyopiya, mukheeribwe ni lurima.

¹³Naluundi Umukasya aliraambisa kumukhono kweewe kwe kamaani ahese shiibala shishiili khu luwaande lwe ngaaki, onakisile ilala shiibala sha Asiriya. Naluundi alekhe shiriimba sha Nineve nga shanjiliile busa, nga shili kumubiimbi busa, mutaambemo kameetsi.

¹⁴Shiliba shiifwo mweesi bibyaayo bimenya, atweela ni tsisolo tsa buli saambo. Ni kiminywiinywi tsikhiikhi ni namuturu kilimenya mu bweene umwo, kiryo kiwuumile khu mirongoolo kyamwo atweela ni mu matilisa kaamwo. Kikhoolo naye alyaanila amulyaango, ni kimirongoolo kye kimisaala kedali kilirama nga kyerurukhiliile busa.

¹⁵Bino nibyo bibiilikholekha khu shiriimba isho abe shishiibona shisheene nga shili buulayi naabi. Babaandu baamwo abe bambaasa bari nibo bali be kamaani nga babona bari mbaawo ukuundi uuli nga nibo mu shibala shoosi. Ne ari bona shanjiliile busa, shekyelile shiifwo mweesi tsisolo tse mwirome tsimenya! Ari buli muundu yeesi uubirawo asisiikha busa kumurwe kweewe, nga esinduukha kumwoyo.