Read lumasaaba Zefaniya 3 Bible Online

Zefaniya 3 - lumasaaba bible

Zefaniya 3

¹Nga kumutaambo kwaanyoolile shiriimba Yerusalemu, shiriimba she buumiinyi buukali, shishanyaalutikha, luundi shishitsuule khuuminiliisa babaandu baamwo!

²Mbaawo na mutweela isi shiwuliilisa ta, namwe bari shaafukiilisa nga balikho bashikolomosa taawe. Shiriimba isho sishiyikinakho Umukasya namwe shesyeenda aambi ni Wele washo lwe buuyeeti ta.

³Baakhulu baasho babaashilimo bali busa nga tsitalanyi tsitsibuutsa, ni baaraangilisi baasho bali busa nga bitsuutse byeesi intsala iminyile, bilya angoloobe byaamalilawo ilala nga sibilekhakho sheesi binyala byaalya kumutikhinyi ta.

⁴Baŋoosi baasho bali be shikili ate babaandu baabi naabi. Ni basaayi baasho nabo boonakisaka ibyo bibiili bikwalaafu, baashukhaanisa kamakaambila ka Wele khuufuna byeesi bakana.

⁵Ne Umukasya Wele ushimenyamo ali Umukwalaafu, niye s'akholakho shiibi shoosi ta. Buli kumutikhinyi kukwiitsa eesa shiisa bushaakha, nga awa babaandu beewe bwaŋali bweewe. Buli shifukhu niye s'akhaasikhana ta, ne shonyene ndi babaandu babaakhali bakwalaafu nibo bakhola buubi bwonyene nga sibaswaalakho nakhari ta.

⁶Umukasya aloma ari, “Ise naamalilewo kamanaambo koosi, noonakisile kamatikiiyi kaabwe ke khukhwikhiinga ke kamaani. Ise naakilile babaandu baantsukhile tsinguudo tse mu shiriimba shaabwe, nga mbaawo umuundu na mutweela ubonekhelamo ta. Biriimba byaabwe byoonakisibwiile ilala, mbaawo umuundu uramilemo ta, mbaawo abe yangaba na mutweela ta.

⁷Ise samweene nakanikha isi shiriimba nga nambaasa ndi kane babekho ni khuurya lisiina lyase, lwanyuma bafukiilisane ni khuukolomosa khwase. Indi manya nio bashebulile bari buumenyo bwaabwe sibunyala bwaabarusibwakho ta, namwe bari shitaambiso shase sishinyala shaabeetsila taawe. Ne shonyene ndi, nibo beloosela khuutsilila busa nga bakhola bubwoonaki buukali mu buli byoosi byeesi bakhola.”

⁸Umukasya aloma ari, “Ni nashiryo ni muniindiliile ise, lwekhuuba shifukhu shilikho shiitsa isi samweene ikheenyukhile niimikhe nga umujulisi isi kamanaambo. Ari indyo ise naakhalilewo khuubuusanisa atweela kamanaambo ni buyiinga bweene, nio lwanyuma imbokesanise buurafu bwase, imbatsukhiliile lirima lyase lyoosi. Shiryo shibala shoosi shikhaahele lwe kumulilo kwe lirima lyase liikali.”

⁹“Nio lwanyuma khu mbuka iyo indikalusa tsinimi tse babaandu be kamanaambo, nio manya boosi banyale khuukanikha khu lisiina ly'Omukasya Wele yenyene, akhali ba wele babaandi ta, baryo bamwakaanisatsake niye yenyene nga bali atweela.

¹⁰Abe yangaba khukhwaamila ilala shanjelekha we tsintsitsi tsa Esiyopiya, babaandu baase babaantsisaaya, babaandu baase babaasalanilaka abo, bakheetse baanderere ise biwaanwa.

¹¹Khu shifukhu isho inywe babaandu baase, mbaawo na mutweela uuliwaambisibwa tsisoni ta, khulwe buubi bweesi mwakhola khusiise ta. Lwekhuuba ise ikhaaruse khukhwaama mu shiriimba isho babaandu boosi babaali be shiikili babeyiingayiinga. Naluundi shiilibayo na mutweela khusiinywe uliba uwe shikili khu lukoongo lwase lukhosefu taawe.

¹²Ne ikhaalekhe mu shiriimba shase babaandu babaali baawolu luundi babewosa, abo babaali ni khukhwiyikina mu lisiina ly'Omukasya.

¹³Abo boosi babaaliramakho khu baandu ba Isiraeli, mbaawo na mutweela ulikholakho bubwoonaki luundi ta; mbaawo ulikanikha bye buwombesi luundi ta, namwe bari bubeeyi bunyoolekhanekho mu khanwa mwaabwe nakhari ta. Baryo boosi bakhaalye bekure buulayi luundi bakone aasi, mbaawo umuundu na mutweela ulibariisariisa ta.”

¹⁴Inywe babaandu be mu Sayuuni, yeemba kimyeenya; Yeemba ni sangaalo luukali lweene inywe babaandu ba Isiraeli! Ni musangaale luundi mwikhoye ni kimyoyo kyeenywe kyoosi, inywe babaandu babaamenya mu Yerusalemu!

¹⁵Umukasya waarusilewo shitaambiso abe sheesi atsya khubawa, waawoneele aleeyi baasiku beenywe boosi. Umukasya niye Umuyiinga wa Isiraeli, ali atweela ni nanywe. Simuliilayo luundi mubekho ni shishiindu shoosi shishibariisariisa ta.

¹⁶Iliwo shifukhu shishiili khukhwiitsa iburaangisi khweesi balilomela Yerusalemu bari, “Ukharya ta, iwe shiriimba Sayuuni; ni kamakhono koowo kakhalebaleba busa lwe khuuluwa ta.

¹⁷Umukasya Wele weenywe ali atweela ni nanywe, niye ali uwe kamaani unyala khuubawonesa inywe. Wele Umunyali wa byoosi akhekhoye luukali naabi khulweenywe, niye akhaabawoleelese inywe abawe kamaani kamashaakha ni khuukana khweewe khuukali, umweene akhaasangaale luukali naabi ni kimyeenya kikiwulilikhila angaaki luukali,

¹⁸nga nishiba khu shifukhu she kamayiiya.” Umukasya aloma ari, “Intsya khumalilawo ilala buwaangafu bwoosi abe bubuuli akari musiinywe, nio tsisoni tsilekhe khubawaamba khulwe buwaangafu bweene ubwo ta.

¹⁹Khu mbuka iyo nga yeetsile khwoola, ikhaasoolanise abo boosi abe babaabamiinilisa inywe. Samweene ikhaawonese baaleme boosi, naluundi imbuusanise abo boosi abe babaasalanila. Ikhaakaluse tsisoni tsaabwe tsiikyele shiriifwa ni khuufumisibwa, naluundi babaandu be mu shibala shoosi bakhaabafumise luukali.

²⁰Imbuka iyo bona ilikho yoola; ikhaababuusanise inywe babaandu mweesi babaasalanila buli aandu, imbakobose ingo weenywe. Indyo ikhaabekyelise inywe khuuba babaandu babaamanyikhaane luukali, mufune shiriifwa ni luubuyi akari mu baandu be shiibala shoosi. Indyo imbakhole inywe mwikyele baayiindifu luundi nga mwabeene mubona ni tsimoni tseenywe muri.” Bino Umukasya umweene niye ubikanikha aryo.