Read lumasaaba Zekariya 10 Bible Online

Zekariya 10 - lumasaaba bible

Zekariya 10

¹Loomba Umukasya abawe ifula, mu mbuka iye kimiheeso. Khulwekhuuba Umukasya niye usiindikha kamafuumbi kakaakila ifula yaakhupa, nio waakila buli mutweela waalima biilyo.

²Khulwekhuuba babaandu nga bereebire khu ba wele babaali bifwaani busa, mbaawo sheesi bafuna she lisuno ta. Ikhaba abo babemenielesa kamarooro nabo, baboola bye bubeeyi bibiwoleelesa busa babaandu. Ni nashiryo, babaandu bayiyana busa nga kamasheese mu kyeewa, ni kaba nga sikali n'umuundu ukaayisa ta.

³Umukasya alikho aloma ari, “Ise liirima lyamaambiile abo babaali baraangirisi be babaandu baase. Ise kane imbe baraangirisi abo shitaambiso, khulwekhuuba ise Wele umunyali uwa byoosi, niinaanayo isi babaandu be mu Yuda; bali babaandu baase. Kane ise imbekese nibo khuuba be kamaani nga tsiŋwaaŋwa tsitsiitsya mu busoolo.

⁴Ise ikhaarobore baraangirisi, baawuli, ni baraangirisi be kamahe khukhwaama mu nibo, nio akile baraangirire babaandu baase.

⁵Nga bali atweela bakhaabe busa be kamaani nga basilikhale be kamaani ni batsya mu busoolo, shibanyalise khukhaandakilila baasiku baabwe aasi mu litosi ni mu mikhoosi, babaaminiaangule babafuure lwekhuuba Umukasya ali ni nabo, naluundi abo babasoolanila khu ŋwaaŋwa bakhaswaale.

⁶Ikhaanyalise babaandu be mu Yuda khuuba be kamaani, naluundi inyalise khuuwonesa babaandu be mu Isiraeli. Ise ikhaabawaambile shiisa, imbakoboseyo ingo waabwe. Bakheeleyo babe busa nga babaandu abe beesi ikhaantsukhatsakho ta. Ise ikhaabatimiilile imbawe sheesi baloomba, khulwekhuuba ise ndi Umukasya Wele waabwe.

⁷Babaandu be mu Isiraeli bakhaabe be kamaani nga basoolani banyindaalifu, babe be kumwiikhoyo nga basaani ni banyweele iviini. Lisaaye lyaabwe likhaabone shino libe ni kumwiikhoyo, naluundi libe n'isangaalo ingali khulwe isho sheesi Umukasya akholile.

⁸Ise ikhalaange babaandu baase imbabuusaase atweela. Ikhaabatimiilile imbamuse, beeleyo babe mu bukali nga ni baaba makiboole.

⁹Ikhaba nga ise nabasalanisa nibo mu manaambo kakaandi, ne ikhaba nga bali mu manaambo ke aleeyi, kane baashebulile ise. Nibo atweela ni babaana baabwe bakhaarame nga bali baalamu, banyalise khuukobola ingo waabwe.

¹⁰Ise ikhaabakobose nibo ingo waabwe nga imbaamisa mu Misiri, naluundi imbabusaase khukhwaama mu Asiriya. Ikhaabakabile liiloba lye mu Gileyadi ni lye mu Lebanoni, khukhwoolisa ni betsusa bamalaatane liiloba ilyo lyoosi.

¹¹Nga ni baliba bakhalisa khuubirira mu nyaantsa iye kumutaambo mu Misiri, ise Umukasya ikhaawoosawose khukhwilyeebula khwe inyaantsa, akile luluutsi Nayilo lwoosi lwoomelele. Ikhaba nga Asiriya yiyiinga angaaki, ne ikhaawaambisibwe kamaŋaanyu; ni buyiinga bwa Misiri bwe kamaani, bukhoonakisibwe.

¹²Ise Umukasya ikhaakile babaandu baase babe ni kamaani; naluundi bantsisaaye ise nga balondelela byeesi ise inoma.” Ise Umukasya samweene, niye ulomile bibiindu bino.