Read lumasaaba Zekariya 11 Bible Online

Zekariya 11 - lumasaaba bible

Zekariya 11

¹Inywe babaandu be mu Lebanoni ni mwikulewo kimilyaango kyeenywe, nio akile kumulilo kwooshe kimisaala kyeenywe kimi kedali.[1]

²Inywe kimisaala kimi sayipuraasi ni mukuukuule, khulwekhuuba kimi kedali kyoonakisibwile. Inywe kimisaala kimi oko kye mu Bashani, ni mukuukuule, khulwekhuuba kimisaala kye mu shisaali abe shishayindana, baakikhalile kyaaweelewo.

³Rekeeresa, uwulile nga baraangirisi ni balila khulwe kumutaambo; khulwekhuuba shiriifwa shaabwe shoonakisibwile. Rekeeresa, uwulile khuubulukhuma khwe tsitalanyi; khulwekhuuba shisaali she mu Yorudaani baashiremire shaweelewo.

⁴Umukasya Wele waanomela ise ari: “Iwe ni wikyele umwaayi[2] uwe kamasheese kakaali khuutsya khukhoonyebwa.

⁵Abo babaakakula baakakhoonya, mbaawo shitaambiso sheesi bafuna ta. Abo babaakulisa tsiinyama tsyako baloma bari: ‘Umukasya abuyilibwe; khwaafunile buyiindifu!’ Ikhaba babaayi be kamasheese kano sibakawaambila shiisa ta.”

⁶Khulwekhuuba Umukasya umweene aloma ari: “Ise singane niloosele khuuwaambila babaandu be mu liloba lino shiisa ta. Bona ise intsya khukila buli umuundu akwe mu makhono k'omwaayi weewe, naluundi mu makhono k'omuyiinga weewe. Baawuli abo bakhoonakise shiibala isho, ni nase s'iikhaashiwonese khukhwaama mu bunyala bwaabwe ta.”

⁷Ni nashiryo ise neekela umwaayi uwe kamasheese keesi abe batsya khukhoonya, nga ingayiisila abo babaakakula ni babaakakulisa. Ise naatsya ni tsimiimbo tsibili tsye khukhwaayisa kamasheese, nga ndweela bakilaanga bari “Bubweela,” ne ikiindi bari “Buhatweela”. Ise natsya naayisa kamasheese ako.

⁸Mu mweesi mutweela kwoonyene, ise neera babaayi babaandi bataru, khulwekhuuba abe sibangana ise ta, nga abe ise naabekhaliilikhile luukali naabi.

⁹Kila ise inomela kamasheese ako ndi, “Ise singane niloosele khuuba umwaayi weenywe ta. Khayo ako kakaafwa, kafwe. Khayo ako kakeeribwa, keeribwe. Khayo ako kakaaramire kalye kashaabwe.”

¹⁰Lwanyuma ise naabukula imiimbo yase ilaangibwa bari “Bubweela,” naakifunamo. Khuno khwaba khukhwookesanisa khuukhalamo khwe kwangwaani isi abe Umukasya aakhola ni kamanaambo koosi.

¹¹Ni nashiryo khu shifukhu isho ikwangwaani yaakhalibwamo. Abo abe babaakula naluundi ni bakulisa kamasheese, abe babandoleleele ise, baamanya bari abe Umukasya alikho akanikhila mu sheesi ise ikholile.

¹²Kila ise mbalomela ndi, “Nga abe inywe mwaaboone muri shili shiilayi, ni muumbe kimikheemba kyase. Ne nga simukana ta, khayo kibe.” Ni nashiryo baambalila ise tsinusu tse feetsa kamakhumi kataru baamba.

¹³Lwanyuma Umukasya waanomela ise ari, “Yila tsinusu itsyo utsire mu libiikhilo lye Lisaayilo Liikhulu.” Ni nashiryo nase nawaamba tsinusu kamakhumi kataru tsyeesi baasasula ise, nga babona bari abe nitsyo tsitsintsakhila ise, naatsiyila mu libiikhilo lye Lisaayilo Liikhulu.

¹⁴Lwanyumakho, ise naafunamo imiimbo yase ilaangibwa bari, “Buhatweela,” shiryo shaakila buhatweela bwaawawo akari e babaandu ba Yuda ni ba Isiraeli.

¹⁵Kila Umukasya anomela ise ari, “Yiilamo luundi ukhole buraambi bw'omwaayi uwe kamasheese. Ne kwa luno, ube busa nga uyo ukhalimo kumukaso ta.

¹⁶Khulwekhuuba ise naarawo umwaayi uwe kamasheese mu shibala shase, ne s'enaanayo isi ako kakaali khuhela ta; namwe s'enaanayo khuweentsa ako kakaakoraanile ta; namwe s'enaanayo khuukaanga ako kakoolesebwilekho butsiina ta, namwe khuliisa ako kakaali ni kamaani ta. Akhali indi niye alya ako kakaali kamanefu, naluundi akabirisa buubi khukhwoolisa ni bibutusi byako byonuukhamo.

¹⁷Kumutaambo kwaaliindiliile umwaayi wase ukhalimo kumukaso uyo ta, uwantsukha busa kamasheese kaase. Khali busoolo bwoonakisile kamaani ke kamakhono keewe, ni tsiimoni tsyeewe tsilekha khubona buulayi ta. Khali kumukhono kweewe kuniaalile, n'imoni yeewe iseetsa khali ifwiile.”