Read lumasaaba Zekariya 12 Bible Online

Zekariya 12 - lumasaaba bible

Zekariya 12

¹Buno buli buurume bubuwaamba khu Isiraeli, nga bwaama isi Wele, Umukasya, nga niye uwabayuula likhulu, wabuumba shiibala, naluundi waara mu muundu buulamu. Umukasya alikho aloma ari:

²“Bona, ise ndi aambi ingana khuukhola Yerusalemu yiikele busa nga shiikopo she iviini. Kamanaambo kakaashibotokheleele nga kaanyweelekho kane kataalataale busa nga umumeesi. Kane uri beebwakala naluundi beebotokhelela Yerusalemu, biriimba bibiramire bye mu Yuda byoosi nabyo kane babibwakale babibotokhelele.

³Ne khu shifukhu isho, ise ikhaakhole Yerusalemu shibe busa nga libaale lisiro, nio buli linaambo lyoositsana lilikhakakho khuukisuta, lifune butsiina bwe kamaani naabi. Kamanaambo ke khu shibala koosi kakhaabusane atweela katsye khu khwibwakala shiriimba isho.

⁴Khu shifukhu isho, ise samweene ikhaakile tsiŋwaaŋwa tsyaabwe tsyoosi tsibe ni khuurya khuukali naabi, ni babaatsikeendelakho bakwe kamalalu. Ne khu be mu lisaaye lya Yuda ikhaarame nga umuliindi waabwe. Ne ikhaakile tsiŋwaaŋwa tse baasiku baabwe tsifwe tsimoni.

⁵Nio shino shikile bikuuka bye mu Yuda biilomele byonyene biri: ‘Babaandu be mu Yerusalemu bafuna kamaani khukhwaama isi Umukasya Wele umunyali uwa byoosi.’

⁶“Khu shifukhu isho, ise ikheekese bikuuka bye mu Yuda khuuba nga kumulilo kwe buuyi mu shisaali, namwe nga buuyi mu lusaambu. Bakhooshe babaandu babaali tsimbeka tsyoosi. Ne babaandu be mu Yerusalemu bakhaarame nga bali mu shiriimba shaabwe nga imbaawo buhangafu bubuubakwakho ta.

⁷“Ise Umukasya, ikhaanyalise kamahe ke mu Yuda khuunyoowa kawule mu busoolo, nio akile lisuno lyeesi lisaaye lya Dawudi ni babaandu be mu Yerusalemu balifuna, libe shitweela busa ni n'elyo lyeesi babaandu be mu Yuda babaaramire nabo balifuna.

⁸Mu mbuka iyo, ise Umukasya ikhaarewo ingabo khuutseeta babaandu babaamenya mu Yerusalemu, nio ikhaba uyo uuli umutoro abe ni kamaani ekele nga Dawudi umweene n'aaba. Be lisaaye lya Dawudi bakhaaraangirire babaandu babe busa nga malayika uw'Omukasya n'abaraangirira, ifwaane busa nga Wele umweene niye ubaraangiriire.

⁹Mu mbuka iyo, ise ikhoonakise buli linaambo lilikhakakho khukhwibwakala Yerusalemu.

¹⁰ “Ise ikhaatsukhe mwoyo uwe shiisa, ni mwoyo uwe khuloomba, khu lisaaye lya Dawudi ni khu baandu be mu Yerusalemu boositsana. Nio akile uri bakhupa tsiimoni tsyaabwe kh'uyo isi bawunile shishooki waafwa, bamulile nga umuundu n'alila umwaana weewe natweela yenyene, namwe bamulile ni kumutaambo kumukali, nga umuundu n'alila umwaana weewe umukiboole.

¹¹Khu shifukhu isho khuulila baafu mu Yerusalemu khukhaabe khwe angaaki naabi, nga khuulila khweesi baalilila Hadadi Rimoni, mu litila lye Megido.

¹²Babaandu mu shibala shoosi bakhaakuukuule nga balila baafu, buli be muntsu nga balila buraawa. Be lisaaye lya Dawudi bakhaalile nga bali bonyene; ni be lisaaye lya Nasani nabo bakhaakuukuule nga bali bonyene. Mu khukuukuula khuno, basaani bakhaabe buraawa, bakhasi baabwe nabo babe bonyene.

¹³Be lisaaye lya Lefi bakhaalile nga bali bonyene, naluundi ni basaani bakhaabe buraawa khukhwaama khu bakhasi baabwe. Be lisaaye lya Shimeyi bakhaalile nga bali bonyene, ikhaba nabo nga basaani bakhaabe buraawa khukhwaama khu bakhasi baabwe.

¹⁴Ikhaba bikuuka bibiramire nabyo, buli shikuuka shikhaalile khu bwasho shonyene, nga basaani balila buraawa khukhwaama khu bakhasi baabwe.”