Read lumasaaba Zekariya 13 Bible Online

Zekariya 13 - lumasaaba bible

Zekariya 13

¹Umukasya aloma ari: “Nga shifukhu isho shoolile, ise akhaayabile be lisaaye lya Dawudi isebele iye kameetsi iye khuubapyeluusa nibo, ni khupyeluusa babaandu be mu Yerusalemu khukhwaama mu byoonako byaabwe, ni bunyaalu bwe khukhwisaaya ba wele babaandi busa.

²Mu mbuka iyo ise Umukasya, umunyali uwa byoosi, ikhaarusewo mu shibala isho kamasiina ke ba wele babaali be bifwaani, nio ilekhe khubawo na mutweela ubishebulila ta. Ise ikhaaruse mu shibala umwo abo boosi babeyila khuuba baŋoosi, naluundi induse mu baandu kumwooyo kukwikoomba khukhwisaaya bifwaani.

³Nio lwanyuma uri ibonekhayo umuundu ukhola kwe buŋoosi, paapa weewe umweene ni maayi weewe umweene, bamulomele bari ali ni khukhwiiribwa, khulwekhuuba uyo ekholisa busa khuukanikha mu lisina lya Wele, ne ikhumaliilisa waakanikha bye kamatsi. Kane uri akhola bye buŋoosi, paapa weewe ni maayi weewe babeene bamuwunake ni bibyooki bamwiire.

⁴Nga imbuka iyo yoolile, imbaawo umuŋoosi ukheniinise angaaki khulwe buŋoosi bweesi akhola, namwe ebirise nga umuŋoosi ta. Namwe mbaawo ukhaakwaare bikwaaro byeesi baŋoosi bakhiile khukwaara, bari nio akosaase babaandu ta.

⁵Akhali akhaalome ari, ‘Ise s'iindi umuŋoosi ta; ise ndi busa umulimi. Khulwekhuuba ise khukhwaama mu bwaana bwase ndi umulimi.’

⁶Ne umuundu n'amureeba ari, ‘Ne tsimbaaso tsye khu shifuba itsyo tsya shiina?’ Elamo nga aloma ari, ‘Tsimbaaso tsino ise natsifuna nga natsiile muntsu iya musaale wase khumukeniyila.’ ”

⁷Umukasya umunyali uwa byoosi alikho aloma ari, “Luurima lwase, yiinyukha! Yiinyukha wiibwakale umwaayi uwaayisa kamasheese kaase! Iwe mwiire, nio akile kamasheese kasalanile. Ikhaba nase samweene kane niibwakale kamasheese kakaashiili kamaana.

⁸Khu shibala khwoosi, bisiintsa bibiilikho bikhaafwe biwewo, iramewo shisiintsa shitweela she khaataru shoonyene.

⁹Shisiintsa shitweela she khaataru shishikhaaramewo shino, ise ikhaashipyeluuse nga ni bapyeluusila ifeetsa mu mulilo. Ise ikhaabapyeluuse nga ni bapyeluusa izaabu. Nio lwanyuma lwayo baloombe isi ise, ni nase imbeelemo khuuloomba khwaabwe. Ise ikhaalome indi bali babaandu baase; ni nabo bakhaalome bari ise ndi Wele waabwe.”