Read lumasaaba Zekariya 2 Bible Online

Zekariya 2 - lumasaaba bible

Zekariya 2

¹Ise ni nenyusa tsiimoni indi indola, naabona umusaani uyo nga wawaambile luukhoba luluupima mu mukhono kweewe!

²Kila ise imureeba ndi, “Ulikho utsya waahena?” Naye waantsilamo ari, “Indi khuutsya khuupima Yerusalemu, imanye buuleeyi ni buubalaayi bwasho nga ni bwoola.”

³Khaangukho, ise naabona malayika tsana uwaanganikhayo amataayi wakeenda wesheenda ibweeni, indi waabawo malayika ukuundi uweetsa khuumwakaanana.

⁴Malayika uwanyoowa waalomela ukuundi uyo ari, “Tima utsye uboolele umusoleeli uyo, uuli ni luukhoba luluupima uri, Yerusalemu, babaandu bakhaamenyemo busa nga babaamenya mu byaalo busa akhali kamatikiiyi ta. Khulwekhuuba babaandu batsya khuba baakali naabi ni bibyaayo nabyo biikali naabi.

⁵Khulwekhuuba Umukasya umweene waalomile ari, niye umweene kane abe kuutikiiyi kwe kumulilo kukuukane kutseete shiriimba, naluundi niye kane amenye ibweene iyo mu shiriifwa sheewe shoosi.”

⁶Umukasya waalomela babaandu beewe ari, “Inywe baamuli, abe ise nabasalanisa inywe buli aandu oositsana khu shibala! Ne ari yiinyukha! Yiinyukha waangu naabi, mutitukhe khukhwaama khu ba Babulooni mukoboleyo i Yerusalemu.

⁷Yiinyukha waangu, mutitukhe mutsye i Sayuuni, inywe mumuumenya mu liloba lye ba Babulooni.

⁸Khulwekhuuba Umukasya uwe kamahe, uyo uwe shiriifwa waasiindikhile ise isi kamanaambo kakaabaminiangula inywe, nga aloma ari, uyo yeesi ubakholakho shishiindu shiibi, aba waashikholile khu niye umweene.

⁹Bona, ise samweene kane imbasoolanise inywe, akile babaandu babaabatsaka baakulwa beenywe babaaminiaangule inywe. Isho kane shikile inywe mumanye muri Umukasya uwe kamahe niye uwusiindikhile ise khukhwiitsa.”

¹⁰Kila Umukasya aloma ari, “Inywe babaandu be mu Yerusalemu, ni mwiimbe naluundi mwiikhoye; khulwekhuuba bona, ise samweene indikho niitsa khuumenya akari mus'iinywe.”

¹¹Mu mbuka iyo kamanaambo kamakali kakheetse ketubaase khu Mukasya, keekyele babaandu baase. Ise ikhaamenye akari mus'iinywe, nio akile inywe muumanye muri Umukasya uwe kamahe, niye uwusiindikhile ise khukhwiitsa.

¹²Indi luundi Yuda likhaabe linaambo liliili lya buraawa, nga lili ly'Omukasya, mu liloba lyeewe liikhosefu. Ni Yerusalemu shikhaabe shiriimba sheesi niye asiima khuuminyisakho byoosi.

¹³Buli muundu n'asile busa nga ali mu moni tsy'Omukasya, khulwekhuuba niye wenyukhile khuungaki khukhwaama mu shifwo sheewe shiikhosefu mweesi niye umweene amenya.