Read lumasaaba Zekariya 3 Bible Online

Zekariya 3 - lumasaaba bible

Zekariya 3

¹Mu khubonekhelwa khukhuundi, Umukasya wantsokesa ise Yoswa Umusaayi Umukhulu, nga weemikhile ibweeni wa malayika watsana uw'Omukasya. Ne nga abe Sitaani weemikhile andulo wa Yoswa, nga ali mwireekefu khuwaabila Yoswa.

²Kila Malayika tsana uw'Omukasya alomela Sitaani ari, “Sitaani, iwe khali Wele akhwikiitsile buurafu naabi. Umukasya, umweene nga n'aakana Yerusalemu, khali akhwikiitsile iwe buurafu naabi. Umusaani yuno ali busa nga khasaantsu kheesi bayutuule khukhwaama mu mulilo.”

³Ari abe Yoswa weemikhile awo ibweene wa malayika uyo, nga wakwaarire bikwaaro bibisinyile naabi.

⁴Kila malayika uyo alomela babaakaanisi be mwikulu ari, “Ni mumufuule bikwaaro bibisinyile ibyo mumurusekho.” Kila Malayika tsana alomela Yoswa ari, “Bona, ise naakhurusirekho iwe bibyoonako byoowo, ari intsya khuukhuwa iwe bikwaaro bishaakha ukwaare.”

⁵Malayika uyo waalakila ari, “Khayo bamubowe shitambaala shimiliwu imurwe weewe.” Ni nashiryo baamubowa shitambaala shimiliwu imurwe weewe, naluundi baamukwaarisa bikwaaro. Bino bikholikha nga malayika uyo uw'Omukasya abe weemikhile andulo.

⁶Lwaanyuma malayika tsana waalomela Yoswa ari,

⁷Umukasya, Umunyali uwa byoosi waalomile ari: “Iwe n'uloondelela kamakaambila kaase, naluundi weloosela khuukhola buraambi bwoowo bweesi ise ikhuweele iwe, aba kane iwe wiilosele khuuba umuraangirisi uwe Lisaayilo lyase liikhulu, ni mu buli lulwaanyi luluulibotokheleele. Kane ise ikhufukiilile wiitsaatsake mu moni tsase khukhwisaaya, nga ni mbuliilisa khuuloomba khwe bamalayika babesaayila mu moni tsase.

⁸Ari iwe umusaayi umukhulu Yoswa rekeeresa, iwe wamweene atweela ni basaayi baasho, khulwekhuuba nibo bali khaabonelo khe bibiindu bibiitsya khwiitsa ibweeni. Bona, kane ise imbareerere inywe umwakaanisi wase isi balaanga bari Lusakya!

⁹Khulwekhubeela bona, ibweeni wa Yoswa, ise ndikho indayo liibaale litweela nga lilikho tsimaande musaafu. Kane ise indekho buurone nga naabukhoorire khu libaale ilyo, ni mu waangu naabi ise kane indusewo bubwoonaki bweesi babaandu be mu shibala muno baamala khaale khuukhola.

¹⁰Nga shiifukhu isho shoolile, buli mutweela khus'iinywe alilaanga umuheesanwa weewe eetse muungo mweewe, bekhale aasi we kumusabibu ni kufigi, akabanane khu lukoosi ni buyiindifu bweenywe. Ibyo byoosi Umukasya umweene niye ubikanikha aryo.”