Read lumasaaba Zekariya 5 Bible Online

Zekariya 5 - lumasaaba bible

Zekariya 5

¹Ise ni nenyusa tsiimoni luundi indi indola, naabona luupapula luwulukuse lulikho lupamburukha mu mbewo.

²Malayika tsana waandeeba ise ari, “Waaboone shiina?” Ise naamwiilamo indi, “Ise naaboone lupapula luwulukuse nga lupamburukha. Buleeyi bwalwo buli tsimita syeenda, ne buubalaayi buli tsimita tsine ni shisiintsa.”

³Kila malayika tsana anomela ise ari, “Khu kupapula ukhwo, baamala khuuronakho shiitsubo isho shishiitsya khukhwibotookhelela shiibala shoosi. Khu luwaande lutweela shiloma shiri, uyo yeesi uwiiba shishiindu bali ni khuumurusawo khuurura mu shibala isho. Ni khu luwaande luluundi shiri, uyo yeesi ukanikha bye bubeeyi naye bali ni khuumurusawo khuurura mu shibala isho.

⁴Umukasya uwe kamahe aloma ari, kane niye asiindikhe shiitsubo shino shitsye, shiingile muuntsu iya buli umwiifwi, ni muuntsu iy'ooyo yeesi ukanikha bye bubeeyi, ate nga waamalile khaale khukhwitsuba. Kane shimenye muuntsu tsyaabwe, shoonakise intsu yoosi, nga shoonakisa ikhaba bisaala ni kamabaale, birame busa kamakubili.”

⁵Malayika tsana wambonekhela ise luundi kila aloma ari, “Yiinyusa tsiimoni mu ngaaki, ubone shishiindu shishiili khukhwiitsa.”

⁶Kila ise imureeba ndi, “Shili shiina?” Waantsiilamo ari, “Shili shishiipo; nga shino shookesanisa bubwoonaki bwe babaandu be mu shibala shoosi.”

⁷Shishiipo isho abe shilikho shiifunikho nga baashikhola mu shibya. Ne ni benyusakho shiifunikho isho, ise naabona nga abe iliwo umukhasi uwikhaale mu shiipo umwo.

⁸Kila malayika uyo aloma ari, “Umukhasi yuno aliwo mu lisina lye bubwoonaki.” Waamuleba weelayo mu shiipo, naluundi waasiinyakho shifuunikho she shiibya shakhwo.

⁹Lwanyuma ise ni nenyusa tsiimoni ndi ndola, ise naabona baakhasi babili nga balikho baantsitsayo. Abe balikho bapamburukha nga bali ni tsindaha tsye kamaani nga tsye likhuuyi. Baasuta shishiipo shatsana bapamburukha baatsya ni nasho.

¹⁰Ise naareeba malayika tsana uwaanganikhayo ndi, “Balikho bayila waahena shishiipo shatsana?”

¹¹Waantsilamo ari, “Balikho bashiyila mu shibala sha Babulooni, isi batsya khushoombakhila lisaayilo. Nga lisaayilo ilyo lyaweele, bakhaaremo shishiipo isho, nio babaandu bashisaaye.”