Read lumasaaba Zekariya 6 Bible Online

Zekariya 6 - lumasaaba bible

Zekariya 6

¹Indi luundi ise ni nenyusa tsiimoni indi ndola, bona naabona kamakaali keesi tsiŋwaaŋwa tsikhweesa kane, nga kaamila akari we tsingiingi tsibili. Tsingiingi tsino abe tsili tsya buroonzi.

²Abe tsiŋwaaŋwa tsitsiili khukhweesa likaari liikiboole tsili tsimbesemu. Abe tsitsiili khuukhweesa liliikhola khabili, tsili tsiimali.

³Abe tsitsiili khukhweesa liliikhola khataru tsili tsiwaanga, ne lye khaane abe tsili tsye kamakoondo.

⁴Lwanyuma ise nareeba malayika tsana indi, “Musaakhulu, kamakaali ke tsiŋwaaŋwa kano kamanyisa shiina?”

⁵Malayika uyo waantsilamo ari, “Bano bali bamwoyo bane babaama mwikulu, nga bali khuutsya mu maande tsyoosi tsine tsye shiibala.

⁶Likaari lyeesi tsiŋwaaŋwa tsiimali tsilikho tsikhweesa, lilikho litsya ingaaki we shiibala Babulooni; lyeesi tsiwaanga tsilikho tsikhweesa lilikho litsya ibukwanyaanga; ne lyeesi tse kamakoondo tsilikho tsikhweesa litsya imwaalo we shiibala.”

⁷Nga tsiŋwaaŋwa ni tsyarura khukhwaama isi tsyaba, abe tsili mu khaangu naabi, mu khutsya khuulambuula shiibala. Kila malayika wa tsana aloma ari, “Ni mutsye mulambuule shibala!” Ni nashiryo tsaatsya tsyaalambuula shiibala.

⁸Kila malayika tsana akuukuula isi ise nga aloma ari, “Tsiŋwaaŋwa tsitsiile ingaaki we linaambo tsyawosawosile liirima lyeesi Umukasya abeele ni nalyo.”

⁹Umukasya waamba ise buurume nga buloma buri:

¹⁰“Bukula biiwaanwa byeesi baamuli babaakoboole khukhwaama mu Babulooni byeesi beetsile ni nabyo. Baamuli bano bali nibo Helidayi, Tobiya ni Yedayiya.

¹¹Bukula ifeetsa n'izaabu byeesi ubaamisilekho, ukholemo ikuutwa, ukire khu murwe kw'omusaayi umukhulu Yoswa, umusoleeli uwa Yehosadaki.”

¹²Muboolele uri Umukasya umunyali uwa byoosi alikho aloma ari, “Umusaani isi balaanga bari Bulanki, kane eloosele abalaayile mu shifwo sheesi alimo, naluundi niye ukana ombakhe Lisaayilo Liikhulu ly'Omukasya.

¹³Aliba niye ulilyoombakha, isho shikile niye afune shiriifwa shishiweebwa bayiinga, naluundi aliikela umuwuli ekhale khu shitsoloŋo she buwuli. Iliibawo umusaayi ulibawo mu mbafu mweewe, naluundi ilibawo ikholakana indayi naabi akari aabwe.”

¹⁴Ikuutwa iliba mu Lisaayilo Liikhulu ly'Omukasya, nga khali khaabonelo khu khuuwa shiriifwa isi Helidayi, Tobiya, ni Yedayiya, ni Yosiya umwaana uwa Zefaniya.

¹⁵Babaandu babaamenya aleeyi baliitsa bayeete mu khwoombakha Lisaayilo Liikhulu ly'Omukasya bushaakha. Nga baamalile khuulyoombakha bushaakha, nio kane iwe umanye uri Umukasya, umunyali wa byoosi, niye uwaasiindikha ise isi iwe. Shino seshikhaakholikhe ta, akhali nga iwe waalondeleele buulayi bubweene kamakaambila k'Omukasya, Wele woowo.