Read lumasaaba Zekariya 8 Bible Online

Zekariya 8 - lumasaaba bible

Zekariya 8

¹Umukasya uwe kamahe waawa Zekariya buurume nga buloma buri:

²“Ise ndi ni khuukana khuukali naabi isi Yerusalemu, naluundi ise ninaanayo naabi isi babaandu babaamenyamo. Khuukana khweesi ise ingikanamo khwakilile ise liirima lyamaambiile baasiku baabwe.

³Ise Umukasya, ikhaakoboleyo mu Yerusalemu, shiriimba shase shikhosefu, ise imenye ibweene iyo. Babaandu bakhaashiilaange bari shiriimba shishiyikinwa, naluundi lukiingi lw'Omukasya bakhaalulaange bari lukiingi luukhosefu.

⁴Basaakhulu ni baloosi, nga baakora beetilila busa kimisheendo, bakheeleyo luundi batsye beekhale mukari mwe shiriimba Yerusalemu.

⁵Kimikhoosi kye mu shiriimba kikheelemo kiitsulemo basoleeli ni bakhaana nga balikho beenyaha.

⁶“Isi babaandu babaaramawo, shino shinyala shaabonekha nga shishikhanyalikha ta, ne isi ise Umukasya uwe kamahe, isho shili shishiinyalikha.

⁷Ise kane intsye ikhole kwe khuumusa babaandu baase khukhwaama mu bibala byeesi baamala khaale khuubasalanisa.

⁸Kane ise imbakobose nibo khukhwaama ibwaamanyaanga n'ibukwanyaanga, bamenye mu Yerusalemu. Nibo bakhaabe babaandu baase, ni nase ikhaabe Wele waabwe, nga indi umuwuli waabwe umwiyikinwa naluundi uwaŋali.”

⁹Umukasya umunyali uwa byoosi aloma ari: “Inywe ni mube banyindaalifu, mukharya ta. Tsilomo tsyeesi mulikho muwulila ari, tsili nitsyo ndweela tsyeesi baŋoosi baakanikha, mu mbuka isi baarakikhilamo khukhwoombakha kumusiingi kwe Lisaayilo Liikhulu bushaakha.

¹⁰Khulwekhuuba nga yaba imbuka iyo ishili khukhoola ta, abe imbaawo umuundu yeesi unyalisa khuukotiisa, oba bibyaayo namwe babaandu bari bamuraambire ta. Naluundi abe imbaawo uyo yeesi umenya mu lukoosi khukhwaama isi baasiku beewe ta. Ise nakila babaandu bashuukhanakho boonyene na bonyene.

¹¹Ne ari siintsya khubirisa abo babaaramawo nga ni nababirisa amataayi ta.

¹²Naluundi khulwekhuuba babaandu bakhaamiitse biilimwa byaabwe mu lukoosi, nga mbaawo shishibeyembeelesa ta. Bakhaabyaale kimizabibu baamisemo iviini, ni byeesi bakhaamiitse mu liloba bakhaabikese. Ikhaabewo ifula ingali ikhaakhupe. Babaandu be linaambo lyase babaakhaaramewo, ise ikhaabawe tsiikhabi tsye bibiindu bino byoosi.

¹³Baandu baase ba Yuda ni Isiraeli, mu mbuka ibirire, abe babaandu be kamanaambo kakaandi nga batsuba babaandi baloma bari, ‘Khali kumutaambo kukwakwa khu Yuda ni Isiraeli nawe kukhukwiilekho!’ Ne ari ise inabawonesa inywe, ukile umuundu nga awa ukuundi tsiikhabi alome ari, ‘Khali nawe ufunile tsiikhabi nga tsyeesi Yuda ni Isiraeli baafuna.’ Mukhaba ni khuurya ta, ni mube banyindaalifu.”

¹⁴Umukasya uwe kamahe alikho aloma ari, “Nga bakuuka beenywe ni baamaambisa ise liirima, ise naakhalawo indi imbeere boositsana, naluundi ise nalekha khushuusakho shishambaaso isho ta, ne akhali ise naatsya muumoni ni khuukhola nga abe ni khalawo.

¹⁵Ni nashiryo ari, ise naakhalilewo indi kane imbe babaandu be mu Yerusalemu tsiikhabi, ni be lisaaye lya Yuda nabo. Ni nashiryo mukhaba ni khuurya ta.

¹⁶Inywe muli ni khuukhola bibiindu bino: Muli ni khuukanikha bya ŋali isi basheenywe; naluundi nga mwaayilile umuundu isi baakayi, bali ni khuumukhalila kumusaango nga beemikha khu bwa ŋali, bubuukila nio abawo lukoosi.

¹⁷Mukhakhootsa kimikhoosi mu myooyo kyeenywe kye khuukhola buubi khu basheenywe taawe. Mukhawayo bujulisi bwe bubeeyi nga mwaamalile khukhwiitsuba muri mutsya khukanikha bya ŋali taawe. Khulwekhuuba ise Umukasya siingana bye khuubeeha, khuuminikhilisa, ni bye bisayuumba taawe.”

¹⁸Indi luundi Umukasya uwe kamahe waawa Zekariya buurume bubuundi nga buloma buri:

¹⁹“Khuubuya intsala khweesi bakhola mu mweesi kukuukhola khane, ni kukuukhola kharaano, ni kukuukhola musaafu, ni kukuukhola liikhumi, kane khwikelele babaandu be mu Yuda kamayiiya ke kumwikhoyo n'isangaalo. Ne bali ni khuushebulila bari bali ni khuumenya mu bwiyikinwa ni mu lukoosi.”

²⁰Umukasya uwe kamahe alikho aloma ari, “Imbuka ilikho yiitsa, isi babaandu baakali khukhwaama mu biriimba biikali baliitsa mu Yerusalemu.

²¹Abo babaali mu shiriimba shitweela baliitsya isi bashaabwe be mu shiriimba shishiindi babalomele bari, ‘Ifwe khulikho khutsya khukhwisaaya Umukasya Umunyali uwa byoosi, khumuloombe kuri akhuwe tsiikhabi. Nanywe ni mwiitse khutsye fweesi.’

²²Babaandu baakali ni kamanaambo ke kamaani kakheetse i Yerusalemu khukhwiisaaya Umukasya, Umunyali uwa byoosi, ni khuuloomba bari abawe tsiikhabi.

²³Mu bifukhu bibiili khukhwiitsa mu moni, buli aandu, babeetswa baboola liikhumi, bakhaatsye isi buli Umuyudaaya ali, bamwiiwambekho nga bamulomela bari, ‘Ifwe khukana khutsye ni nawe, khulwekhuuba ifwe khwaawuliile bari Wele ali ni linaambo lyeenywe.’ ”