Read lumasaaba Zekariya 9 Bible Online

Zekariya 9 - lumasaaba bible

Zekariya 9

¹ Buno buli buurume khukhwaama isi Umukasya: Umukasya alikho ekiitsa naabi babaandu babaamenya mu Hadulaka, ni n'aabo babaali mu shiriimba Damasiko. Khulwekhuuba akhuba bari bikuuka bya Isiraeli byonyene nibyo bibiili by'Omukasya ta, ne ikhaba shiriimba shikhulu she mu Siriya nasho shili shisheewe.

²Ikhaaba shiriimba Hamasi shishiikabanana lulwaakha ni Hadulaka, nasho shili sh'Omukasya; atweela ni biriimba Tuulo ni Sidoni, ikhaba nga babaandu baamwo bali be kamakhula naabi.

³Babaandu be mu shiriimba Tuulo baayiyombakhila kuutikiiyi kwe khukhwitseeta, naluundi babuunga ifeetsa ili busa nga lifukhuulu, ikhaba izaabu yayitsula ili busa nga kamaandu ke mwibuumbi.

⁴Ne ari, Umukasya atsya khubarusakho buli shitweela sheesi bali ni nasho, atsukutse buyiindifu bwaabwe mu nyaantsa, naluundi ikhaabewo babaakhooshe shiriimba shiweele ilala aasi khwiiloba.

⁵Babaandu babaamenya mu shiriimba Ashekeloni, bakhaabone shino babe ni khuurya khuukali; babaandu babaamenya mu shiriimba Gaza, bakhaabone shino nabo bataambisibwe khulwe butsiina buukali naabi. Ikhaba babaandu babaali mu Ekuroni, nabo shitweela busa, kumwiyikino kwaabwe kwoosi kukhaabawemo. Umuyiinga uwa Gaza akhaafwe; ni shiriimba Ashikeloni shikhaarame busa nga mbaawo babaashimenyamo ta.

⁶Babaandu babaali be tsiikholo tsitsiikhali indweela ta, bakhaamenye mu Ashidodi; naluundi be mu Filisitiya ise ikhaabamalemo khukhwiyiinga khwaabwe.

⁷Sibakheeleyo luundi khuulya inyama nga ilimo kamalasile ta, namwe biilyo byoosi bibikhafukiilisibwa ta. Abo boosi babaakharamewo nga bashiili baalamu, bakhekele batweela khu baandu baase, babe busa nga khaakuuka khaakyeekhe mu shikuuka sha Yuda. Ni babaandu be mu Ekuroni bakhekele batweela khu linaambo lye babaandu baase, nga ba Yebusi ni beekela babaandu baase.

⁸Nio lwanyuma ise samweene ikhaabe umutseeti uwe shiibala shase, ilekhe khubayo kamahe kakaandi kakeengilamo khuubiriramo ta. Ise singane ifukiilise baawuli baabi khuumiinikhilisa babaandu baase luundi ta. Ise samweene naaboone isaambo isi babaandu baase bataambisibwilemo.

⁹Babaandu be mu Sayuuni, ni mwiikhoye, yiikhoya luukali naabi! Inywe babaandu babaali mu Yerusalemu, kuukuula luukali khulwe kumwiikhoyo! Khulwekhuuba, bona Umuyiinga weenywe alikho eetsa! Niye akhola bibiindu bibiili bye baŋali, naluundi afuna buyeeti khukhwaama isi Wele. Ali umuwolu mu mwooyo, naluundi alikho etsa nga wekhaale khu sikilya, ili iikhasi nga ishiili inyana.

¹⁰Umukasya aloma ari, “Ise ikhawaambe kamakaali ke busoolo keesi tsiŋwaaŋwa tsikhweesa, kakaali mu Isiraeli, ingarusemo, ni bye busoolo imbiruse khukhwaama mu Yerusalemu. Ise ikhaafuniaake bye buyiingo bweesi baraambisa mu busoolo. Umuyiinga weenywe akhaareerewo lukoosi akari we kamanaambo; naluundi buyiinga bweewe bukhaabe buubalaayi naabi, nga bwaamila khu luutsi Efurati, khuutsya khukhwoola isi shiibala shaakama.”

¹¹Umukasya alikho aloma ari, Kane ise indekhuule babaandu baase babe baalekhuule, babe baalekhuule khukhwaama mu mubiimbi kwe bubowe, khulwe khuulondekhana n'ikwangwaani isi ise nakhola ni nabo, isi khwakhola khuubirira mu mafuki ke tsisaayilo tsyeesi beera.

¹²Inywe baabowe babaali ni khuusuubila, ni mukobole; ni mukobole ingo weenywe iliyo buuliindi bubuumala. Ari ise imbaboolela inywe ndi, kane ise imbawe tsiikhabi tsitsifuurisamo tsifuunda tsibili, khulwe kumutaambo kweesi inywe mubiriremo.

¹³Khulwekhuuba ari ise ndi khuutsya khuraambisa babaandu ba Yuda ni be mu Efurayimu nga bye busoolo bwase. Kane ise imaambe babaandu be mu Sayuuni imbaraambise nga luurima lwase, khuusoolanisa babaandu be mu Buyonaani.

¹⁴Nio lwanyuma Umukasya abonekhele angaaki we babaandu beewe; akile alase buyiingo bweewe bube busa nga luuheni. Umukasya Wele akhaafuure ifulumbeti, akhuumbe nga ali mu shafuusi she kamaani she imwaalo we shibala.

¹⁵Umukasya umunyali wa byoosi akhaatseete babaandu beewe, naluundi nibo bakhaahese baasiku baabwe bawewo. Babaandu beewe bakhaakuukuulile mu busoolo nga babaameelile, baryo beere baasiku baabwe, shino shikile kamafuki kaabwe keekhe busa nga ke bibyaayo byeesi bawaanayo nga tsisaayilo, ni bakatsukha khu sheeso khukhwaama mu shipwakhuli.

¹⁶Nga shiifukhu isho sheetsile khukhwoola, Umukasya akhaawonese babaandu beewe, nga umwaayi n'awonesa bibyaayo byeewe khukhwaama mu bihangafu. Babaandu beewe bakhaamulikhemulikhe mu shibala sheewe, babe busa nga bibyuuma biimiliwu bibiili khu kuutwa y'omuyiinga.

¹⁷Ilala, babaandu beewe bakhaabe buulayi, ni shibala shikhaabe shiilayi. Abo babaashiili bahele bakhaabe be kamaani, khulwe biilimwa biikali ni ivini bibikhaabe mu bukali.